បុគ្គលិកហាងសម្លៀកបំពាក់ Macy's ដ៏ល្បីនៅអាមេរិកមមាញឹកបម្រើអតិថិជននៅមុនវិបត្តិកូវីដ១៩។ AFP
ទីក្រុងវ៉ាស៊ីនតោនៈ ទិន្នន័យរដ្ឋាភិបាលអាមេរិកបានបង្ហាញកាលពីចុងសប្តាហ៍កន្លងទៅនេះឲ្យដឹងថា ពេលដែលស្ថានភាពសេដ្ឋកិច្ចអាមេរិកខូចខាតដោយសារការបិទអាជីវកម្មបណ្តាលមកពីវីរុសកូរ៉ូណា អាជីវកម្មជាច្រើនបិទទ្វារ រីឯអត្រាការងារធ្វើបានធ្លាក់ចុះដល់កម្រិតព្រួយបារម្ភក្នុងខែមីនា។
នាយកដ្ឋានការងារបានរាយការណ៍ថា ការងាររបស់អាមេរិកបានធ្លាក់ចុះចំនួន ៧០១ ០០០ កន្លែងក្នុងខែមីនា ហើយអត្រាគ្មានការងារធ្វើបានកើនឡើងដល់ ៤,៤ ភាគរយ។
ទោះយ៉ាងណានាយកដ្ឋាននោះបានទទួលស្គាល់ថា គេមិនអាចប្រមូលតួលេខបានទាំងអស់ពីការបាត់បង់ការងារនោះទេ ហើយទិន្នន័យប្រចាំសប្តាហ៍ផ្ទាល់ខ្លួនស្តីពីការអះអាងលើកដំបូងសម្រាប់ការទទួលបានផលប្រយោជន៍ពីការបាត់បង់ការងារបានបង្ហាញថា មនុស្ស ១០ លាននាក់បាត់បង់ការងាររបស់ពួកគេរយៈពេល ២ សប្តាហ៍ចុងក្រោយនៃខែមីនា។
ជាមួយករណីកូវីដ១៩ កំពុងឆ្លងដល់មនុស្សជាង ១ លាននាក់នៅទូទាំងសកលលោកដែល ១ ភាគ ៤ មាននៅអាមេរិកជាទីដែលមានអ្នកស្លាប់ច្រើនជាង ៦ ០០០ ករណី ទីក្រុងជាច្រើនបានក្លាយជាទីក្រុងខ្មោច ហើយមន្ត្រីបានព្យាយាមរកដំណោះស្រាយដើម្បីបន្ថយការខូចខាតដល់សេដ្ឋកិច្ច និងមនុស្ស។
លោកស្រី Diane Swonk នៃក្រុមហ៊ុនប្រឹក្សាយោបល់ Grant Thornton បាននិយាយថា៖ «ការធ្លាក់ចុះការងារក្នុងខែមីនាមិនធ្លាប់ដែលមានសម្រាប់ការចាប់ផ្តើមនៃការថមថយផ្នែកសេដ្ឋកិច្ច ហើយការធ្លាក់ចុះនឹងកាន់តែអាក្រក់ជាងនេះ ២០ ដងទៀតក្នុងខែមេសានេះ»។
របាយការណ៍នោះឲ្យដឹងថា វាជាការបាត់បង់ការងារប្រចាំខែដ៏អាក្រក់បំផុត ចាប់តាំងពីវិបត្តិហិរញ្ញវត្ថុសកលកើតមានក្នុងឆ្នាំ ២០០៩ និង គម្លាតអត្រាគ្មានការងារធ្វើដ៏ធំក្នុងរយៈពេល ១ ខែ ចាប់តាំងពីជាង ៤៥ ឆ្នាំមុន។
ទោះបីយ៉ាងណានាយកដ្ឋានការងារបាននិយាយថាវា «មិនអាចមានប្រសិទ្ធភាពជាក់ស្តែងនៃការរីករាលដាលលើទីផ្សារការងារក្នុងខែមីនានោះទេ» និងភាពល្អៀងនៃការរាប់ចំនួនអ្នកបាត់បង់ការងារមានន័យថា អត្រានៃភាពគ្មានការងារធ្វើទំនងជាដល់កម្រិតខ្ពស់បំផុត។
អ្នកសេដ្ឋកិច្ចព្យាករថា តួលេខក្នុងខែមេសានឹងកាន់តែអាក្រក់ ជាមួយអត្រាគ្មានការងារធ្វើចំនួន ២ ខ្ទង់ និងការងារច្រើនរហូតដល់ ២០ លានកន្លែងដែលបាត់បង់។
របាយការណ៍នោះបង្ហាញថាស្ថិតក្នុងចំណោមវិស័យដែលទទួលរងផលប៉ះពាល់មុនគេនៃការរឹតត្បិតការធ្វើដំណើរដែលដាក់ឲ្យអនុវត្តដើម្បីទប់ស្កាត់វីរុស វិស័យកម្សាន្ត និងបដិសណ្ឋារកិច្ច បាត់បង់ការងារចំនួន ៤៥៩ ០០០ កន្លែងកាលពីខែមុន។
ប៉ុន្តែផលប៉ះពាល់ និងការបាត់បង់ច្រើនត្រូវបានគេសង្កេតឃើញក្នុងវិស័យសុខាភិបាល អាជីវកម្មលក់រាយ និងសេវាកម្មផ្នែកធុរកិច្ច។
ទិន្នន័យត្រូវបានបង្ហាញនៅថ្ងៃជាមួយគ្នានោះគឺពេលរដ្ឋាភិបាលចាប់ផ្តើមកម្មវិធីជួយសង្គ្រោះថ្មីដើម្បីលើកទឹកចិត្តម្ចាស់អាជីវកម្មឲ្យថែរក្សាបុគ្គលិក និងជួលបុគ្គលិកដែលបានបញ្ឈប់ឲ្យមកធ្វើការងារវិញ។
ប៉ុន្តែប្រធានរដ្ឋសភា លោកស្រី Nancy Pelosi បាននិយាយថា រដ្ឋាភិបាលត្រូវការធ្វើកិច្ចការច្រើនដើម្បីបន្ថយសម្ពាធ ហើយពង្រីកហើយពង្រីកទៀតនូវកញ្ចប់សង្គ្រោះដែលមានទឹកប្រាក់ ២,២ ពាន់ពាន់លានដុល្លារអាមេរិកដែលគេស្គាល់ថា CARES ត្រូវបានអនុម័តកាលពី ១ សប្តាហ៍មុនដើម្បីស្រោចស្រង់សេដ្ឋកិច្ចដែលដុនដាប។ RR
