បុគ្គលិកអាជីវកម្មសេវាដឹកជញ្ជូនអាហារ ដែលត្រូវបានអនុញ្ញាតក្នុងអំឡុងពេលបិទខ្ទប់។ ហុង មិនា
ភ្នំពេញ៖ រាល់សេវាកម្មដឹកជញ្ជូនអាហារ ត្រូវបានរដ្ឋាភិបាលសម្រេចអនុញ្ញាតឲ្យធ្វើសកម្មភាពអាជីវកម្មអំឡុងពេលអនុវត្តវិធានការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ (ខេត្តកណ្តាល) ដើម្បីទប់ស្កាត់ការឆ្លងរាលដាលជំងឺកូវីដ ១៩។
សេចក្តីសម្រេចរបស់រដ្ឋាភិបាល ដែលចុះហត្ថលេខាដោយលោក ហ៊ុន សែន នាយករដ្ឋមន្ត្រីកាលពីថ្ងៃទី ១៧ ខែមេសា បានឲ្យដឹងថា ក្នុងអំឡុងពេលនៃការអនុវត្តវិធានការបិទខ្ទប់ ត្រូវបានហាមឃាត់រាល់សកម្មភាពការងារ មុខរបរ ឬអាជីវកម្មទាំងអស់ ដែលមិនមែនជាតម្រូវការចាំបាច់ប្រចាំថ្ងៃ ប៉ុន្តែសកម្មភាពការងារ មុខរបរ និងអាជីវកម្មមួយចំនួនត្រូវបានអនុញ្ញាតក្នុងករណីចាំបាច់។
សេចក្តីសម្រេចថ្មីនេះបញ្ជាក់ថា រោងចក្រ សហគ្រាស សិប្បកម្ម ឬទីកន្លែងផលិតឱសថ និងសម្ភារបរិក្ខារពេទ្យ ម៉ាស់ អាល់កុល និងអុកស៊ីសែន ត្រូវបានអនុញ្ញាតឲ្យមានសកម្មភាពអាជីវកម្មក្នុងអំឡុងពេលអនុវត្តវិធានការបិទខ្ទប់ភូមិសាស្រ្តរាជធានីភ្នំពេញ និងក្រុងតាខ្មៅ។
សេចក្តីសម្រេចថ្មីនេះ ឲ្យដឹងទៀតថា រដ្ឋាភិបាលក៏បានអនុញ្ញាតឲ្យមានសកម្មភាពអាជីវកម្មចំពោះទីកន្លែងផលិតម្ហូបអាហារ និងគ្រឿងឧបភោគបរិភោគ ព្រមទាំងទីសត្តឃាត ដែលជាតម្រូវការចាំបាច់ប្រចាំថ្ងៃ។
រាល់សកម្មភាពការងារ មុខរបរ ឬអាជីវកម្ម ដំណើរការតាមរយៈប្រព័ន្ធអនឡាញត្រូវកាត់បន្ថយចំនួនអ្នកធ្វើការឲ្យនៅត្រឹមកម្រិតអប្បបរមាមិនលើសពី ២ ភាគរយ និងត្រូវអនុវត្តគោលការណ៍អាហារថ្ងៃត្រង់នៅហ្នឹងកន្លែងបំពេញការងារ។
ទន្ទឹមនឹងនេះ សេវាកម្មដឹកជញ្ជូនម្ហូបអាហារ ឬគ្រឿងឧបភោគបរិភោគ ដើម្បីឲ្យភូមិសាស្ត្រដែលត្រូវបានបិទខ្ទប់។ រាល់សេវាកម្មដឹកជញ្ជូនទំនិញទូទៅចេញ និងចូល ឬឆ្លងកាត់ភូមិសាស្ត្រដែលត្រូវបានបិទខ្ទប់ ដើម្បីបម្រើឲ្យសង្គមនិងសេដ្ឋកិច្ចរបស់ប្រទេស។ សកម្មភាពដឹកជញ្ជូនខាងលើនេះ មិនត្រូវបានអនុញ្ញាតឲ្យដឹកជញ្ជូនមនុស្សឡើយ។
បន្ថែមពីនេះ ស្ថាប័នសាធារណៈដែលជាប្រធានស្ថាប័នសាមីត្រូវកាត់បន្ថយចំនួនអ្នកធ្វើការឲ្យមកនៅត្រឹមកម្រិតអប្បបរមាមិនឲ្យលើសពី ២ ភាគរយ នៃចំនួនបុគ្គលិកសរុប។ ប្រធានស្ថាប័នសាមីត្រូវសម្រេចផ្អាកការងារដែលមិនចាំបាច់ជាបណ្តោះអាសន្នក្នុងអំឡុងពេលបិទខ្ទប់ និងត្រូវណែនាំជាក់ស្តែង ដើម្បីអាចធ្វើការពីចម្ងាយ ឬតាមប្រព័ន្ធអនឡាញ៕
