ក្រុងរីយ៉ាដៈ ប្រទេសអារ៉ាប៊ីសាអ៊ូឌីតបានផ្អាកផលិតកម្មបណ្តោះអាសន្ននូវទីតាំងផលិតប្រេងចំនួន ២ របស់ក្រុមហ៊ុន Aramco ដែលត្រូវបានរងការវាយប្រហារពីក្រុមឧទ្ទាមយេម៉ែន ដែលបង្កការអាក់ខានប្រហែលពាក់កណ្តាលនៃទិន្នផលប្រេងសរុបរបស់ក្រុមហ៊ុន។ នេះបើយោងតាមក្រសួងថាមពលកាលពីថ្ងៃសៅរ៍។
ព្រះអង្គម្ចាស់ Abdulaziz bin Salman រដ្ឋមន្ត្រីក្រសួងថាមពលបានឲ្យដឹងក្នុងសេចក្តីថ្លែងការណ៍មួយដែលចេញផ្សាយដោយទីភ្នាក់ងារព័ត៌មានផ្លូវការរបស់អារ៉ាប៊ីសាអ៊ូឌីតថា ការវាយប្រហារនេះ «បានបង្កឲ្យមានការផ្អាកបណ្តោះអាសន្ននូវផលិតកម្មនៅរោងចក្រ Abqaiq និងរោងចក្រ Khurais»។
ព្រះអង្គម្ចាស់បានបន្ថែមថា ការវាយប្រហារបានឈានទៅរកការអាក់ខានផលិតកម្មប្រហែល ៥០ ភាគរយនៃផលិតកម្មសរុប។
ក្រុមហ៊ុន Aramco របស់រដ្ឋបានឲ្យដឹងក្នុងសេចក្តីថ្លែងការណ៍ដាច់ដោយឡែកពីគ្នាមួយថា៖ «ការរាយប្រហារទាំងនេះបានបង្កឲ្យមានការផ្អាកផលិតកម្មប្រេងឆៅចំនួន ៥,៧ លានបារ៉ែលក្នុងមួយថ្ងៃ»។
លោក Amin Nasser អគ្គនាយកក្រុមហ៊ុន Aramco បានថ្លែងថា ការងារកំពុងធ្វើឡើងដើម្បីស្តារផលិតកម្មឡើងវិញ ហើយការធ្វើបច្ចុប្បន្នភាពពីវឌ្ឍនភាព នឹងត្រូវបានផ្តល់ជូនក្នុងរយៈពេល ២ ថ្ងៃទៀត។
ការវាយប្រហារតាមរយៈយន្តហោះដ្រូនទៅលើរោងចក្រប្រេង Abqaiq និង Khu-rais ដែលជារោងចក្រសំខាន់របស់ក្រុមហ៊ុន Aramco នៅភាគខាងកើតប្រទេសអារ៉ាប៊ីសាអ៊ូឌីត ដែលបង្កឡើងដោយក្រុមឧទ្ទាម Huthi របស់ប្រទេសយេម៉ែន គឺជាការវាយប្រហារចុងក្រោយបំផុតក្នុងចំណោមការវាយប្រហារជាច្រើនទៅលើការដំឡើងហេដ្ឋារចនាសម្ព័ន្ធប្រេងរបស់ព្រះរាជាណាចក្រមួយនេះក្នុងរយៈពេលប៉ុន្មានខែថ្មីៗនេះ។
លោក Nasser បានថ្លែងថា៖ «គ្មានការរងរបួស» ត្រូវបានរាយការណ៍នោះទេក្នុងការវាយប្រហារ។
ទូរទស្សន៍ Al-Masirah របស់ក្រុមឧទ្ទាម Huthi ដែលមានទំនាក់ទំនងជាមួយអ៊ីរ៉ង់រាយការណ៍ថា ពួកគេបានបើក «ប្រតិបត្តិការទ្រង់ទ្រាយធំដែលមានយន្តហោះដ្រូនចំនួន ១០ គ្រឿង» ទៅលើរោងចក្រទាំង ២ នេះ៕ KC