ទីក្រុងប៊ែរឡាំងៈ ក្រុមរដ្ឋមន្ដ្រីបានឲ្យដឹងកាលពីថ្ងៃចន្ទថាទីក្រុងប៊ែរឡាំងនឹងធានាកម្ចី ១០០ ភាគរយដែលបានធ្វើឡើងដោយធនាគារជាច្រើនដល់ក្រុមហ៊ុនខ្នាតតូច និងមធ្យមជាការពង្រីកបន្ថែមមួយដល់កញ្ចប់វិបត្តិវីរុសកូរ៉ូណាតម្លៃ ១,១ ពាន់ពាន់លានអឺរ៉ូនៅក្នុងប្រទេសមានសេដ្ឋកិច្ចឈានមុខគេរបស់តំបន់អឺរ៉ុបមួយនេះ។
លោក Olaf Scholz រដ្ឋមន្ត្រីក្រសួងហិរញ្ញវត្ថុបានប្រាប់ក្រុមអ្នកយកព័ត៌មាននៅទីក្រុងអាល្លឺម៉ង់មួយនេះថា៖ «កម្ចីរហ័សទាំងនេះគួរតែធ្វើឲ្យប្រាកដថា ក្រុមហ៊ុនខ្នាតមធ្យម មានសន្ទនីយភាពយ៉ាងរហ័ស ដោយមិនមានអ្នកជាប់ពន្ធខាតបង់ប្រាក់ច្រើនពេកនោះទេ»។
រដ្ឋាភិបាលសហព័ន្ធនឹងគាំទ្រយ៉ាងពេញទំហឹងចំពោះការផ្ដល់កម្ចី ៥០០ ០០០ អឺរ៉ូ (៥៤០ ០០០ ដុល្លារ) ដល់ក្រុមហ៊ុនជាច្រើនដែលមានបុគ្គលិករហូតដល់ ៥០ នាក់ និង ៨០០ ០០០ អឺរ៉ូសម្រាប់ក្រុមហ៊ុនធំៗដែលមានបុគ្គលិករហូតដល់ ២៥០ នាក់។
វិធានការកាលពីថ្ងៃចន្ទ បង្កើនកម្រិតការធានាពី ៨០ ភាគរយលើកមុន សម្រាប់ក្រុមហ៊ុនធំៗ ឬ ៩០ ភាគរយសម្រាប់ក្រុមហ៊ុនតូចៗកម្រិតនោះនៅតែកំពុងបង្កឲ្យធនាគារគិតឲ្យបានហ្មត់ចត់អំពីការផ្ដល់កម្ចីនេះ។
លោក Peter Altmaier រដ្ឋមន្ដ្រីក្រសួងសេដ្ឋកិច្ចបានឲ្យដឹងថា ក្រុមហ៊ុនខ្នាតនេះ «ជាទូទៅមានតម្រូវការឥណទានក្នុងចំនួនតិចតួច ប៉ុន្តែចំនួននោះត្រូវតែបង់យ៉ាងរហ័សបំផុត»។
លោក Scholz បន្តថា រដ្ឋាភិបាល «ជឿប្រាកដប្រជាថា ទំនងជាមានក្រុមហ៊ុនតិចតួចដែលបរាជ័យក្នុងការសងបំណុលវិញ»។
ក្នុងចម្លើយចំពោះសំណួរសភាគណបក្សប្រឆាំងដែលទទួលបានកាលពីថ្ងៃចន្ទ ក្រសួងហិរញ្ញវត្ថុបានឲ្យដឹងថា ជំនួយសេដ្ឋកិច្ចរបស់ទីក្រុងប៊ែរឡាំងរហូតមកដល់ពេលនេះមានចំនួនសរុបជាង ១,១ ពាន់ពាន់លានអឺរ៉ូ ។
ក្រុមរដ្ឋមន្ដ្រីបានយល់ព្រម «មូលនិធិស្ថិរភាពសេដ្ឋកិច្ច» ៦០០ ពាន់លានអឺរ៉ូ ដែលផ្ដល់ ៤០០ ពាន់លានអឺរ៉ូនៃការធានាសម្រាប់បំណុលរបស់ក្រុមហ៊ុនជាច្រើន ១០០ ពាន់លានផ្ដល់កម្ចីដោយផ្ទាល់ដល់ ឬការទិញភាគហ៊ុននៅក្នុងក្រុមហ៊ុនដែលមានបញ្ហា និង ១០០ ពាន់លានអឺរ៉ូ ដើម្បីផ្ដល់មូលនិធិដល់ KfW ជាធនាគារវិនិយោគរដ្ឋ។
ទន្ទឹមនឹងនេះចំនួនក្រុមហ៊ុនដែលខ្ចីធនាគារ KfW អាចធានាដែលត្រូវបានជំរុញដោយ ៣៥៧ ពាន់លានអឺរ៉ូសម្រាប់ចំនួនសរុប ៨២២ ពាន់លានអឺរ៉ូ។
ដើម្បីរក្សាលំហូរសន្ទនីយភាពរបស់ពួកគេ ក្រុមហ៊ុនជាច្រើនអាចពន្យារពេលការទូទាត់ពន្ធ។
ទីក្រុងប៊ែរឡាំងឲ្យដឹងថា ខ្លួននឹងផ្ដល់ ៥០ ពាន់លានអឺរ៉ូនៃការគាំទ្រសម្រាប់ក្រុមហ៊ុនខ្នាតតូច និងក្រុមហ៊ុនដែលដំណើរការតែម្នាក់ឯងដូចជាជាងថតរូប តន្ដ្រីករ ឬអ្នកមើលថែមនុស្ស។
ការពឹងផ្អែកលើចំនួនបុគ្គលិក ក្រុមហ៊ុនលក្ខណៈបុគ្គលនឹងទទួលបានរហូតដល់ ១៥០០០ អឺរ៉ូក្នុង ១ ក្រុមហ៊ុន ដើម្បីធ្វើឲ្យប្រាកដថាអាជីវកម្មអាចដំណើរការបានក្នុងអំឡុងពេល ៣ ខែ។
ទន្ទឹមនឹងនេះអ្នកប្រកបមុខរបរសេរីដែលដាក់ពាក្យសុំអត្ថប្រយោជន៍គ្មានការងារធ្វើនឹងមិនត្រូវបង្ខំឲ្យស្វែងរកការងារថ្មីផ្សេងពីនោះទេ។
ប្រទេសអាល្លឺម៉ង់ក៏បានបន្ធូរបន្ថយលទ្ធភាពការចូលប្រើកម្មវិធីដែលបន្ថែមប្រាក់ខែរបស់កម្មករជាមួយនឹងសាច់ប្រាក់របស់រដ្ឋាភិបាល នៅពេលម៉ោងធ្វើការងាររបស់ពួកគេត្រូវបានកាត់បន្ថយ។
ផែនការនេះត្រូវបានទទួលស្គាល់យ៉ាងទូលំទូលាយដែលសន្សំការងារចំនួនច្រើនក្នុងអំឡុងវិបត្តិហិរញ្ញវត្ថុឆ្នាំ ២០០៨ និងឆ្នាំ ២០០៩។
ទីក្រុងប៊ែរឡាំងរំពឹងថា ប្រជាជនជាង ២ លាននាក់នឹងធ្វើការងារក្នុងម៉ោងកាន់តែខ្លី ដោយសារតែវិបត្តិវីរុសកូរ៉ូណា ល្អប្រសើរជាងដែលបានមើលឃើញក្នុងរយៈពេល ១ ទសវត្សរ៍ចុងក្រោយនេះ។
ដើម្បីរ៉ាប់រងលើការចំណាយ ទីភ្នាក់ងារការងារសហព័ន្ធ (BA) នឹងចាប់ផ្ដើមប្រើប្រាស់ទុនបម្រុង សាច់ប្រាក់ចំនួនច្រើនរបស់ខ្លួនចំនួន ២៦ ពាន់លានអឺរ៉ូ។
ជាមួយនឹង ១៥៦ ពាន់លានអឺរ៉ូនៅក្នុងការខ្ចីថ្មីដើម្បីផ្ដល់មូលនិធិដល់ផ្នែកមនុស្សធម៌ និងការចំណាយសុខភាពបន្ថែម ទីក្រុងប៊ែរឡាំងត្រូវបានបង្ខំក្នុងការផ្អាក «ការទប់ស្កាត់បំណុល» បន្ថែមដល់រដ្ឋធម្មនុញ្ញនៅក្នុងគ្រានៃវិបត្តិហិរញ្ញវត្ថុកាលពីឆ្នាំ ២០០៩។
ទឹកប្រាក់បន្ថែម ៨២,២ ពាន់លានអឺរ៉ូនៃវិធានការនានាត្រូវបានប្រកាសដោយរដ្ឋសហព័ន្ធរបស់ប្រទេសអាល្លឺម៉ង់ និងរដ្ឋាភិបាលក្រុង ព្រមទាំងការធានា ៦៣,២ ពាន់លានអឺរ៉ូផងដែរ៕ LA