ក្រុងវ៉ាស៊ីនតោនៈ ប្រភពឧស្សាហកម្មយន្តហោះបានឲ្យដឹងកាលពីថ្ងៃចុងសប្តាហ៍មុនថា ក្រុមហ៊ុន Boeing កំពុងធ្វើបច្ចុប្បន្នភាពសូហ្វវែរ ទប់ស្កាត់ការរលត់ម៉ាស៊ីនលើយន្តហោះប៊ូអ៊ីងម៉ូដែល 737 MAX របស់ខ្លួន ខណៈដែលក្រុមអ្នកស៊ើបអង្កេតរបស់ ប្រទេស បារាំង បានស្រាវជ្រាវទិន្នន័យប្រអប់ខ្មៅដែលបានពីការធ្លាក់យន្តហោះចុងក្រោយបំផុតមួយក្នុងចំណោមការធ្លាក់យន្តហោះចំនួន ២ គ្រឿងក្នុងរយៈពេលប៉ុន្មានខែថ្មីៗនេះ។
យន្តហោះម៉ូដែល 737 MAX ត្រូវបានហាមឃាត់ហោះហើរនៅទូទាំងពិភពលោក បន្ទាប់ពីមានគ្រោះថ្នាក់របស់ក្រុមហ៊ុនអាកាសចរណ៍ Ethiopia Airlines កាលពីថ្ងៃអាទិត្យ ទី ១០ ខែមីនា ដែលបានសម្លាប់មនុស្សនៅលើយន្តហោះទាំងអស់ ១៥៧ នាក់ ហើយផលវិបាកពីការធ្លាក់យន្តហោះនេះបានបណ្ដាលឲ្យក្រុមហ៊ុន និយតករ និងក្រុមហ៊ុនអាកាសចរណ៍ ប្រញាប់ប្រញាល់ក្នុងការឆ្លើយតបទៅនឹងបញ្ហានេះ។
ប្រភពចំនួន ២ បានឲ្យដឹងថា ក្នុងរយៈពេល ១០ ថ្ងៃ ក្រុមហ៊ុន Boeing នឹងកែសម្រួលប្រព័ន្ធ MCAS របស់ខ្លួនដែលជាប់ទាក់ទងក្នុងការធ្លាក់យន្តហោះ 737 MAX 8 របស់ក្រុមហ៊ុនអាកាសចរណ៍ Lion Air ក្នុងប្រទេស ឥណ្ឌូនេស៊ី កាលពីខែតុលាឆ្នាំមុន។ ប្រភពដដែលនេះបានឲ្យដឹងថា មូលហេតុ នៃការធ្លាក់យន្តហោះចុងក្រោយបំផុតនេះមិនទាន់ត្រូវបានកំណត់នៅឡើយទេ។
ក្រុមហ៊ុន Boeing បានផ្អាកការចែកចាយយន្តហោះដែលលក់ដាច់បំផុតរបស់ខ្លួននេះ មុនពេលជួសជុលសូហ្វវែររួច ដែលការងារនេះកំពុងត្រូវបានធ្វើឡើងរួចហើយមុនពេលមានគ្រោះថ្នាក់ធ្លាក់យន្តហោះចុងក្រោយបំផុតនៅជិតទីក្រុងអាឌីសអាបេបានេះ។
នៅពេលត្រូវបានសួរអំពីពេលវេលាកំណត់សម្រាប់ការជួសជុលនេះ អ្នកនាំពាក្យក្រុមហ៊ុន Boeing កាលពីថ្ងៃសុក្រ គ្រាន់តែនិយាយថា វានឹងត្រូវដំឡើងក្នុងរយៈពេល «ប៉ុន្មានសប្ដាហ៍ខាងមុខនេះ»។
ប្រអប់ខ្មៅដែលទទួលបានពីយន្តហោះរបស់ក្រុមហ៊ុន Ethiopian ដែលទើបតែមានអាយុកាល ២-៣ ខែប៉ុណ្ណោះ និងបានធ្លាក់ប៉ុន្មាននាទីបន្ទាប់ពីការហោះឡើងនោះត្រូវបានវិភាគដោយអាជ្ញាធររបស់ប្រទេស បារាំង ដើម្បីកំណត់ពីមូលហេតុនៃគ្រោះថ្នាក់នេះ។
ក្រុមគណៈប្រតិភូរបស់ក្រុមហ៊ុន Ethiopian បានប្រគល់សំឡេងនៅក្នុងបន្ទប់អ្នកបើកយន្តហោះ និងឧបករណ៍កត់ត្រាទិន្នន័យហោះហើរ ដែលត្រូវបានខូចខាតនៅក្នុងគ្រោះថ្នាក់នេះ ឲ្យទៅទីភ្នាក់ងារសុវត្ថិភាពផ្លូវអាកាស BEA បារាំង ដែលបានចាប់ផ្ដើមការស៊ើបអង្កេតកាលពីថ្ងៃសុក្រ។
ការធ្លាក់យន្តហោះក្រុមហ៊ុន Lion Air កើតឡើងប៉ុន្មាននាទីក្រោយហោះឡើង ដែលសម្លាប់មនុស្ស ១៨៩ នាក់ ហើយអាជ្ញាធរអាមេរិកឲ្យដឹងថា មានភ័ស្ដុតាងស្រដៀងគ្នារវាងគ្រោះថ្នាក់ទាំង ២ នេះ៕ AFP/LA