ក្រុងវ៉ាស៊ីនតោនៈ ប្រធានមូលនិធិរូបិយវត្ថុអន្តរជាតិ (IMF) លោកស្រី Kristalina Georgieva បាននិយាយកាលពីថ្ងៃចន្ទថា សេដ្ឋកិច្ចពិភពលោកប្រឈមនឹងការខូចខាតដ៏ខ្លាំងពីការរីករាលដាលនៃវីរុសកូរ៉ូណាដែលអាចបណ្តាលឲ្យខាតបង់សេដ្ឋកិច្ចច្រើនជាងកាលពីឆ្នាំ ២០០៩ និងទាមទារឲ្យមានការឆ្លើយតបដែលមិនធ្លាប់ធ្វើក្នុងពេលកន្លងមក។
លោកស្រី Georgieva បានអំពាវនាវដល់បណ្តាប្រទេសមានសេដ្ឋកិច្ចជឿនលឿនឲ្យផ្តល់ការគាំទ្រកាន់តែច្រើនដល់ប្រទេសដែលមានចំណូលទាប ដែលប្រឈមនឹងការបាត់បង់ហិរញ្ញវត្ថុដ៏ច្រើន ហើយនិយាយថា IMF ត្រៀមលក្ខណៈរួចរាល់ដើម្បីដាក់ចេញប្រាក់កម្ចីចំនួន ១ ពាន់ពាន់លានដុល្លារ។
នៅពេលប្រទេសជាច្រើនក្នុងពិភពលោកប្រឈមការបិទទ្វារស្ទើរទាំងស្រុង លោកស្រី Georgieva ក៏បានព្រមានរដ្ឋមន្ត្រីហិរញ្ញវត្ថុនៃក្រុមប្រទេសអភិវឌ្ឍន៍សេដ្ឋកិច្ចជឿនលឿន (G-20) ថា ទស្សនវិស័យសេដ្ឋកិច្ចពិភពលោកសម្រាប់ឆ្នាំនេះគឺអវិជ្ជមានដែលការធ្លាក់ចុះយ៉ាងហោចណាស់អាក្រក់ដូចកាលពីវិបត្តិហិរញ្ញវត្ថុសកលនៅក្នុងឆ្នាំ ២០០៨ ឬអាក្រក់ជាងនោះទៅទៀត។
កំណើនសេដ្ឋកិច្ចពិភពលោកបានធ្លាក់ចុះត្រឹម ០,៦ ភាគរយក្នុងឆ្នាំ ២០០៩ ជាលទ្ធផលនៃវិបត្តិហិរញ្ញវត្ថុឆ្នាំ ២០០៨ ប៉ុន្តែទីផ្សារកំពុងងើបឡើងនាពេលនោះដែលរួមមាន ប្រទេសចិន និងឥណ្ឌាបានរីកលូតលាស់ក្នុងល្បឿនយ៉ាងរហ័ស។
ផ្ទុយទៅវិញការរីករាលដាលវីរុសកូរ៉ូណាកំពុងបង្កសោកនាដកម្មដល់សេដ្ឋកិច្ច និងមនុស្សទូទាំងសកលលោក និងអ្នកព្យាករណ៍ខ្លះបាននិយាយថា ការធ្លាក់ចុះអាចដល់ ១,៥ ភាគរយឯណោះ។
លោកស្រី Georgieva បាននិយាយថា៖ «ការស្លាប់បាត់បង់មនុស្សជាតិដោយសារការរាលដាលវីរុសកូរ៉ូណាមិនអាចវាស់វែងបានរួចទៅហើយ ដូច្នេះប្រទេសទាំងអស់ត្រូវការធ្វើការងាររួមគ្នា ដើម្បីការពារប្រជាជន និងកម្រិតការខូចខាតផ្នែកសេដ្ឋកិច្ច»។
ទោះបីជាយ៉ាងណាទីផ្សារដែលកំពុងងើបឡើង និងប្រទេសដែលមានចំណូលទាបប្រឈមខ្លាំងណាស់ ហើយប្រហែលជាត្រូវការការគាំទ្រហិរញ្ញវត្ថុបន្ថែមទៀត និងសូម្បីជំនួយដោះបំណុល។
លោកស្រីនិយាយថា៖ «អ្នកវិនិយោគបានដកចេញរួចទៅហើយនូវប្រាក់ប្រមាណ ៨៣ ពាន់លានដុល្លារពីទីផ្សារកំពុងលូតលាស់ចាប់តាំងពីការចាប់ផ្តើមវិបត្តិ ដែលនេះគឺជាការបាត់បង់ទុនដ៏ច្រើនបំផុតដែលត្រូវបានកត់ត្រា»។
ជិត ៨០ ប្រទេសបានស្នើរួចរាល់ហើយនូវជំនួយគ្រាអាសន្នពី IMF ដើម្បីទប់ទល់នឹងការផ្ទុះឡើងនៃវីរុសនេះ៕ RR