IMF ថា កំណែទម្រង់របស់អារ៉ាប៊ីសាអ៊ូឌីត ចាប់ផ្តើមចេញផ្លែផ្កា។ AFP
ក្រុងឌូបៃៈ កំណែទម្រង់របស់ប្រទេសអារ៉ាប៊ីសាអ៊ូឌីតរួមទាំងអាករលើតម្លៃបន្ថែម (VA-T) និងការដំឡើងតម្លៃថាមពលបានចាប់ផ្តើមផ្តល់លទ្ធផលហើយ ប៉ុន្តែមានកិច្ចការបន្ថែមទៀតដែលត្រូវធ្វើ ដើម្បីបំពេញចន្លោះឱនភាពថវិកាដ៏រ៉ាំរ៉ៃ។ នេះបើយោងតាមមូលនិធិ IMF កាលពីថ្ងៃចន្ទ។
បន្ទាប់ពីតម្លៃប្រេងធ្លាក់ចុះខ្លាំងដែលបានទាញទម្លាក់ប្រាក់ចំណូលរបស់អារ៉ាប៊ីសាអ៊ូឌីត និងបានឈានទៅរកកង្វះថវិការយៈពេល ៥ ឆ្នាំជាប់គ្នារួចមក ប្រទេសនាំចេញប្រេងឆៅច្រើនជាងគេក្នុងពិភពលោកមួយនេះបានដាក់ចេញវិធានការជាច្រើន ដើម្បីធ្វើពិពិធកម្មសេដ្ឋកិច្ចរបស់ខ្លួន។
មូលនិធិ IMF បានឲ្យដឹងក្នុងរបាយការណ៍ជាប្រចាំមួយថា៖ «កំណែទម្រង់បានចាប់ផ្តើមផ្តល់លទ្ធផលហើយ ហើយចក្ខុវិស័យសម្រាប់សេដ្ឋកិច្ចមានភាពវិជ្ជមាន»។
ប៉ុន្តែ IMF បានឲ្យដឹងថា ព្រះរាជាណាចក្រនេះដែលប្រាក់ចំណូលពីប្រេងនៅតែមានចំណែក ៧០ ភាគរយនៃប្រាក់ចំណូលសាធារណៈនោះ ត្រូវតែពង្រីកការកែសម្រួលតម្លៃសេវាទឹក អគ្គិសនី និងប្រាក់កម្រៃដែលដកហូតលើជនបរទេស។
មូលនិធិ IMF ក៏បានអំពាវនាវឲ្យអាជ្ញាធរអារ៉ាប៊ីសាអ៊ូឌីតពិចារណាដំឡើង VAT ទ្វេដងផងដែរពោលគឺពី ៥ ភាគរយទៅ ១០ ភាគរយ។
អារ៉ាប៊ីសាអ៊ូឌីត បានដាក់ចេញ VAT ក្នុងឆ្នាំ ២០១៨ ជាឆ្នាំមួយដែលប្រាក់ចំណូលរបស់ប្រទេសនេះមានតែចំនួន ១២,៥ ពាន់លានដុល្លារប៉ុណ្ណោះ ឬស្មើនឹង ១,៦ នៃផលិតផលក្នុងស្រុកសរុប។
មូលនិធិ IMF បានឲ្យដឹងថា ការប្តេជ្ញាចិត្តចំពោះកម្មវិធីកែទម្រង់នឹងជាគន្លឹះឆ្ពោះទៅរកភាពជោគជ័យក្នុងការ «ជំរុញកំណើនសេដ្ឋកិច្ចដែលមិនបានមកពីប្រេង បង្កើតការងារសម្រាប់ពលរដ្ឋ និងសម្រេចបានគោលបំណងនៃរបៀបវារៈចក្ខុវិស័យឆ្នាំ ២០៣០ របស់អាជ្ញាធរ»៕ KC
