ក្រុងតូក្យូៈ ក្រុមហ៊ុន Z Holdings របស់ជប៉ុនដែលជាឈ្មោះថ្មីក្រុមហ៊ុន Yahoo Japan នឹងច្របាច់បញ្ចូលគ្នាជាមួយក្រុមហ៊ុន Line ដែលជាប្រតិបត្តិករកម្មវិធីជជែកកម្សាន្តចល័តក្នុងគោលបំណងបង្កើនមូលដ្ឋានអតិថិជនសម្រាប់សេវាឌីជីថលរបស់ពួកគេ។ នេះបើយោងតាមការឲ្យដឹងរបស់ក្រុមហ៊ុនទាំង ២ កាលពីថ្ងៃចន្ទ។
ក្រុមហ៊ុនប្រតិបត្តិការសេវាទូរស័ព្ទចល័ត SoftBank ដែលជាក្រុមហ៊ុនមេរបស់ក្រុមហ៊ុន Z Holdings (ZHD) និងក្រុមហ៊ុន Naver បានឲ្យដឹងនៅក្នុងសេចក្ដីប្រកាសព័ត៌មានរួមមួយថា ក្រុមហ៊ុន SoftBank Corp និងក្រុមហ៊ុន Naver របស់ប្រទេសកូរ៉េខាងត្បូងដែលជាក្រុមហ៊ុនមេរបស់ក្រុមហ៊ុន Line បានយល់ព្រមច្របាច់បញ្ចូលគ្នារវាងក្រុមហ៊ុន ZHD និងក្រុមហ៊ុន Line។
ក្រុមហ៊ុន Line នឹងត្រូវលុបឈ្មោះចេញពីផ្សារហ៊ុន បន្ទាប់ពីក្រុមហ៊ុន SoftBank និងក្រុមហ៊ុន Naver ធ្វើការដាក់តម្លៃទិញ ហើយការច្របាច់បញ្ចូលគ្នារំពឹងទុកថា នឹងធ្វើឡើងនៅខែតុលា ឆ្នាំ ២០២០។
សេចក្ដីប្រកាសព័ត៌មានមួយនេះបានឲ្យដឹងថា ការសម្រេចចិត្តនេះ «មានគោលបំណងនាំយករួមគ្នានូវធនធានអាជីវកម្មរបស់ក្រុមហ៊ុន ZHD Group និងក្រុមហ៊ុន LINE Group ដែលមានមូលដ្ឋានអ្នកប្រើប្រាស់លើសលុប និងទ្រព្យសកម្មជាច្រើននៅប្រទេសជប៉ុន ដើម្បីផ្ដល់បទពិសោធងាយស្រួលដល់អ្នកប្រើប្រាស់នៅជប៉ុន»។
ក្រុមហ៊ុន SoftBank ក៏គ្រោងនឹងវិនិយោគលើការពង្រីកទៅក្នុងវិស័យអាជីវកម្មថ្មីៗផងដែរ និង «មានគោលបំណងក្លាយជាក្រុមហ៊ុនឈានមុខគេមួយ ដែលជាកម្លាំងជំរុញនៅទូទាំងជប៉ុន អាស៊ី និងទូទាំងពិភពលោក»។
សេចក្ដីប្រកាសព័ត៌មាននេះបន្តថា ការច្របាច់បញ្ចូលគ្នា «នឹងត្រូវបានធ្វើឡើងដោយឈរលើមូលដ្ឋានស្មើគ្នាដោយក្រុមហ៊ុន ZHD និងក្រុមហ៊ុន LINE ក្នុងគោលបំណងបង្កើតសម្ព័ន្ធអាជីវកម្មមួយដែលអាចជម្នះលើការប្រកួតប្រជែងយ៉ាងខ្លាំងក្នុងស្រុក និងលើពិភពលោក» ហើយក្រុមហ៊ុនដែលច្របាច់បញ្ចូលគ្នាថ្មីនេះនឹងអនុវត្ត «ការវិនិយោគអាជីវកម្មដែលកំណត់ទិសដៅកំណើនក្នុងវិស័យនៃបញ្ញាសិប្បនិម្មិត (AI) ពាណិជ្ជកម្ម បច្ចេកវិទ្យាហិរញ្ញវត្ថុ (Fintech) ការផ្សព្វផ្សាយពាណិជ្ជកម្ម» ក្នុងចំណោមវិស័យផ្សេងទៀត។
តម្លៃចុងក្រោយសម្រាប់ការដាក់តម្លៃទិញសម្រាប់ការច្របាច់បញ្ចូលគ្នានេះគឺនៅតែកំពុងស្ថិតក្រោមការពិភាក្សានៅឡើយ៕ LA