លោក គីម ជុងអ៊ុន កំពុងថ្លែងសុន្ទរកថានៅក្នុងកិច្ចប្រជុំកំពូលជាមួយក្រុមមន្ត្រីជាន់ខ្ពស់របស់លោកនៅក្នុងអគារបក្សនៃទីក្រុងព្យុងយ៉ាង។ AFP
.jpg)
ក្រុងសេអ៊ូលៈ ប្រព័ន្ធផ្សព្វផ្សាយរដ្ឋបានរាយការណ៍ថា មេដឹកនាំកូរ៉េខាងជើង លោក គីម ជុងអ៊ុន កាលពីថ្ងៃពុធ បានកោះប្រជុំគណៈកម្មាធិការកំពូលនៃគណបក្សពលករដែលកំពុងគ្រប់គ្រងអំណាច ដើម្បីដោះស្រាយអ្វី ដែលលោកបានពិពណ៌នាថា ជា «ស្ថានការណ៍តានតឹង» ដែលកំពុងកើតឡើង។
កិច្ចប្រជុំរបស់គណៈកម្មាធិការមជ្ឈិម បានធ្វើឡើងក្រោយពីជំនួបកំពូលនៅក្រុងហាណូយរបស់លោក គីម ជុងអ៊ុន ជាមួយលោកប្រធានាធិបតីអាមេរិក ដូណាល់ ត្រាំ បានបរាជ័យ ដោយមិនបានចុះកិច្ចព្រមព្រៀងអ្វីមួយកាលពី ខែកុម្ភៈ ខណៈប្រធានាធិបតីកូរ៉េខាងត្បូង លោក មូន ជេអ៊ីន បានហោះទៅកាន់ក្រុងវ៉ាស៊ីនតោន ដើម្បីពិភាក្សាជាមួយមេដឹកនាំអាមេរិក។
ប៉ុន្តែទីភ្នាក់ងារសារព័ត៌មាន (KCNA) ផ្លូវការរបស់កូរ៉េខាងជើង បានឲ្យដឹងថា លោក គីម ជុងអ៊ុន អាចនឹងផ្តោតទៅលើការបន្តជំរុញអភិវឌ្ឍន៍សេដ្ឋកិច្ចក្រុងព្យុងយ៉ាង។
KCNA បានរាយការណ៍ឲ្យដឹងថា នៅក្នុងជំនួបមួយជាមួយក្រុមមន្ត្រីជាន់ខ្ពស់កាលពីថ្ងៃអង្គារ លោក គីម ជុងអ៊ុន បានបញ្ជាឲ្យក្រុមមន្ត្រីទាំងនោះ បង្ហាញ «អាកប្បកិរិយាឲ្យស័ក្ដិសមជាមេដឹកនាំបដិវត្តន៍ និងការសាងសង់ស្ថិតនៅក្រោមស្ថានការណ៍ដ៏តានតឹង ដែលកំពុងកើតឡើង និងស្របទៅតាមបណ្តាញយុទ្ធសាស្ត្រថ្មីរបស់គណបក្សពលករកូរ៉េ»។
កាលពីខែមេសា លោក គីម ជុងអ៊ុន បានប្រកាសឲ្យដឹងថា «បណ្តាញយុទ្ធសាស្ត្រថ្មី» របស់គណបក្សដែលកំពុងគ្រប់គ្រងអំណាច គឺការកសាងសេដ្ឋកិច្ចសង្គមនិយម» និងស្វែងរកការអភិវឌ្ឍនុយក្លេអ៊ែររបស់ខ្លួនបានសម្រេចទាំងស្រុង។
ទីភ្នាក់ងារសារព័ត៌មាន (KCNA) បាននិយាយថា៖ «លោក គីម ជុងអ៊ុន បាន «ធ្វើការវិភាគយ៉ាងស៊ីជម្រៅលើបញ្ហាជាច្រើនដែលកំពុងរង់ចាំការដោះស្រាយជាបន្ទាន់នៅ ក្នុងបក្ស និងក្នុងប្រទេស ដោយលោកបន្ថែមថា ជំនួបកាលពីថ្ងៃពុធ គណៈកម្មាធិការមជ្ឈិមនឹង «សម្រេចចិត្តតម្រង់ទិសថ្មី និងមធ្យោបាយនៃការតស៊ូពុះពារឲ្យស្របទៅតាមស្ថានការណ៍បដិវត្តន៍ ដែលកំពុងកើតឡើងនេះ។
ជំនួបនេះត្រូវបានធ្វើឡើងនៅមុនពេលបើកសភាប្រថាប់ត្រាកាលពីថ្ងៃព្រហស្បតិ៍។
លោក ត្រាំ និង គីម ជុងអ៊ុន បានរៀបចំជំនួបជាលើកដំបូងនៅប្រទេស សិង្ហបុរី កាលពីខែ មិថុនា ២០១៨៕ AFP/SK
