ចិន​ ​រុស្ស៊ី​សន្យា​សាង​ទំនាក់ទំនង​ខណៈ​​លោក​ពូទីន​​​ទស្សនកិច្ច


Content image - Phnom Penh Post

ក្រុងស៊ាងហៃៈ ប្រធានាធិបតី​ចិន​លោក​ស៊ី ជីនភីង និង​ប្រធានាធិបតី​រុស្ស៊ី លោក​វ្ល៉ាឌីមៀរ ពូទីន​ដែល​កំពុង​បំពេញ​ទស្សនកិច្ច​នៅ​ចិន​បាន​សន្យា​ពី​ថ្ងៃ​អង្គារ​ថា​នឹង សាង​ទំនាក់ទំនង​រវាង​សមាជិក ក្រុម​ប្រឹក្សា​សនិ្តសុខ​អ.ស.ប.​ទាំង​ពីរ​ដែល​ប្រទេស​ទាំង​ពីរ​ប្រឈម មុខ​នឹង​ការ​រិះគន់​ពី​អន្តរជាតិ និង​ជម្លោះ​ទឹកដី​។

លោក​ពូទីន កំពុង​បំពេញ​ទស្សនកិច្ច​នៅ​ចិន​ជា​លើក​ដំបូង​ចាប់​តាំងពី​លោក​ស៊ីជីនភីង​បាន​ឡើង កាន់​អំណាច​ពី​ឆ្នាំ​មុន​ដើម្បី​ចាប់ផ្តើម​សមយុទ្ធ​ជើងទឹក​រួម គ្នា​មួយ​សប្ដាហ៍​នៅក្នុង​សមុទ្រ​ចិន​ខាង​កើត​និង​ចូលរួម​ក្នុង​ជំនួប​កំពូល សន្តិសុខ​អាស៊ី​មួយ​។

ទំនាក់ទំនង​របស់​រុស្ស៊ី​ជាមួយ​អាមេរិក និង​សហភាព​អឺរ៉ុប បាន​ធ្លាក់​ចុះ​ទាប​ក្រោយ​សង្គ្រាម​ត្រជាក់​ក្នុង​ប៉ុន្មាន​ខែ​ថ្មីៗ​នេះ ជុំវិញ​ការ​ប្លន់​យក​តំបន់​គ្រីមា និង​ការ​ចោទប្រកាន់​របស់​លោក​ខាង​លិច ថា ក្រុង​ម៉ូស្គូ​កំពុង​ញុះញង់​ភាព​ចលាចល​នៅ​តំបន់​ភាគ​ខាង​កើត​អ៊ុយក្រែន ។

20140522_18a
ប្រធានាធិបតី រុស្ស៊ី លោកពូទីន(ស្តាំ) និងប្រធានាធិបតី ចិន លោកស៊ី នៅក្នុងជំនួបកំពូលសន្តិសុខ នៅស៊ាងហៃ កាលពីថ្ងៃពុធ AFP

ក្នុង​ពេល​ជាមួយ​គ្នា​នេះ ក្រុង​ប៉េកាំង​កំពុង​មាន​ជម្លោះ​ជាមួយ​នឹង​ប្រទេស​ជិត​ខាង ជុំវិញ​ជម្លោះ​ទឹកដី​ផ្លូវ​សមុទ្រ​ដែល​ក្នុង​នោះ​មាន​ជាមួយ​វៀតណាម ជប៉ុន និង​ហ្វីលីពីន​។

ទីភ្នាក់ងារ​សារព័ត៌មាន​ផ្លូវការ ស៊ីនហួ​បាន​រាយការណ៍​ថា លោក ស៊ី ជីនភីង ដែល​ហៅ​លោក​ពូទីន​ថា​«មិត្ត​ចាស់​»​ខណៈ​ពួកគេ​បាន​ជួប​សម្រាប់​កិច្ចពិភាក្សា នៅ​ក្រុង ស៊ាងហៃ​បាន​ថ្លែង​ថា ការសាង ភាព​ជា​ដៃគូ​យុទ្ធសាស្រ្ត​មួយ ជា ជម្រើស​ចាំបាច់​ដើម្បី​អភិវឌ្ឍ​ពិភពលោក​ដែល​មាន​ប៉ូល​ច្រើន​មួយ​។

ស៊ីនហួ​បាន​និយាយ​ថា លោក​ពូទីន បាន​អំពាវនាវ​ឲ្យ​បង្កើន​ពាណិជ្ជកម្ម ទ្វេភាគី​ឲ្យ​ដល់​១០០ ពាន់​លាន​ដុល្លារ​អាមេរិក​ក្នុង​ឆ្នាំ​២០១៥ ដោយ​កើន​ពី​ចំនួន​ជិត​៩០​ពាន់​លាន​ដុល្លារ​អាមេរិក​កាលពី​ឆ្នាំ​មុន​តាមរយៈ កិច្ចសហប្រតិបត្តិការ​ផ្នែក​អាកាសចរណ៍ លំហអវកាស ការ​ផលិត និង​ផ្នែក ថាមពល​។

ប្រទេស​ទាំង​ពីរ​បាន​ចុះ​ហត្ថលេខា​លើ​កិច្ចព្រមព្រៀង​មួយ​ចំនួន​«ធំ» ប៉ុន្តែ​ភ្លាមៗ​នោះ​មិន​បាន​ផ្ដល់​សេចក្ដី​ពិស្ដារ​ទេ​។

ក្រុម មន្ត្រី​មកពី​ប្រទេស​ទាំង​ពីរ​បាន​និយាយ​ថា ក្រុមហ៊ុន​ជាច្រើន​ស្ទើរតែ​បញ្ចប់​កិច្ចព្រមព្រៀង​ដែល​ត្រូវ​បាន​ពន្យារពេល ជាយូរ​មួយ ដើម្បី​ឲ្យ​រុស្ស៊ី​នាំ​ចេញ​ឧស្ម័ន​ធម្មជាតិ​ទៅ​ចិន ដែល​ត្រូវ​ការ​ថាមពល​យ៉ាង​ខ្លាំង ខណៈ​ក្រុង​ម៉ូស្គូ​បង្កើន​ការ​នាំ​ចេញ​ថាមពល​លើ​ទីផ្សារ​អឺរ៉ុប ប៉ុន្តែ​បញ្ហា​តម្លៃ​គឺ​នៅ​តែ​ជា​ចំណុច​ជាប់គាំង​។

ចិន​ធ្វើ​ជា​ម្ចាស់​ផ្ទះ​វេទិកា​តំបន់​អាស៊ី​ស្ដីពី​សន្តិសុខ​ដែល​គេ​ពុំ​សូវ​ដឹង​មួយ​ពី​ថ្ងៃ​ពុធ​ដោយ​ចង់​បង្កើន​មុខមាត់​ក្នុង​ព្រឹត្តិការណ៍​នេះ​និង​ចង់​បង្ហាញ​ពី​បំណង​ធ្វើការ​ជាមួយ​ប្រទេស​ជិត​ខាង ថ្វីបើ​មាន​ជម្លោះ​បច្ចុប្បន្ន​ជាច្រើន​ជុំវិញ​បញ្ហា​ទឹកដី​ខាង​សមុទ្រ​ក្ដី​។

ថ្លែង នៅ​វេទិកា​សន្តិសុខ​អាស៊ី​នេះ លោក​ស៊ី បាន​ចេញ​ការ​ព្រមាន​បិទ​មុខ​មួយ​ចំពោះ​អាមេរិក ដោយ​ថ្លែង​ថា ប្រទេស​ទាំងឡាយ មិន​គួរ​សាង​សម្ព័ន្ធភាព​យោធា នៅក្នុង​ទ្វីប​អាស៊ី​ទេ៕ MN

ព័ត៌មានថ្មីៗ