អ្នកជួយសង្រ្គោះឥណ្ឌាប្រើទូកដើម្បីជម្លៀសអ្នកស្រុកចេញពីតំបន់លិចលង់។ AFP
.jpg)
ក្រុងកូជីៈ ក្រុមមន្ត្រីបានប្រាប់ AFP ថា ចំនួនស្លាប់បណ្តាលមកពីទឹកជំនន់នៅតំបន់ទាក់ ទាញទេសចរនៃខេត្ត Kerala របស់ប្រទេសឥណ្ឌា បានឡើងដល់ ៧៧ នាក់កាលពីថ្ងៃព្រហស្បតិ៍ ខណៈភ្លៀងធ្លាក់ខ្លាំងបានគំរាមកំហែងតំបន់ថ្មីៗមួយចំនួនទៀត។
មន្ត្រីគ្រប់គ្រងគ្រោះមហន្តរាយនៅរដ្ឋ Kerala បាននិយាយថា មនុស្សជាង ៦ ម៉ឺននាក់ បានចូលទៅជ្រកនៅក្នុងជំរំជួយសង្រ្គោះជាច្រើន និងកងទ័ពជើងគោកនិងកងទ័ពជើងទឹក បានបង្កើនកិច្ចប្រតិបត្តិការជួយសង្គ្រោះនៅក្នុងរដ្ឋនោះ ភាគខាងត្បូង ដោយប្រើឧទ្ធម្ភាគចក្រជាច្រើនគ្រឿង ដើម្បីដឹកមនុស្ស។
មន្ត្រីរូបនោះ បានបន្ថែមថា៖ «ស្រុកទាំងអស់ត្រូវប្រុងប្រយ័ត្នខ្ពស់ ខណៈភ្លៀងជាច្រើនទៀត ត្រូវរំពឹងថានឹងធ្លាក់នៅក្នុងរយៈពេល ២៤ ម៉ោងក្រោយនេះ»។
ចំនួនស្លាប់ បានកើនឡើងត្រឹម ១០ នាក់នៅពេលយប់ និងមន្ត្រីរដ្ឋនោះបាននិយាយថា ចំនួនស្លាប់ត្រូវបានរំពឹងថានឹងកើនឡើងខ្ពស់ជាងនេះ។
សេវាហោះហើរ រថភ្លើង និងរថភ្លើងក្រោមដី ត្រូវបានផ្អាកនៅក្នុងរដ្ឋដែលញាំញីដោយទឹកជំនន់មួយនេះ។ រាប់រយភូមិត្រូវជន់លិចដោយផ្លូវប្រមាណ ១ ម៉ឺនគីឡូម៉ែត្រ និងផ្ទះសំបែងរាប់ពាន់ខ្នងត្រូវបានបំផ្លាញដោយទឹកជំនន់។ ខេត្ត Kerala ល្បីដោយសារឆ្នេរសមុទ្រមានដើមដូងជាជួរនិងចម្ការតែត្រូវរងការវាយប្រហារដោយជំនន់ទឹកភ្លៀងជារៀងរាល់ឆ្នាំ ប៉ុន្តែការខូចខាតឆ្នាំនេះអាក្រក់បំផុតនៅក្នុងប៉ុន្មានទសវត្សរ៍នេះ។
ទឹកជំនន់ ក៏បង្កគ្រោះមហន្តរាយនៅក្នុងរដ្ឋ Karnataka និង រដ្ឋ Andhra Pradesh ដែលនៅជិតខាង៕
