ក្រុងបេរូត៖ ក្រុមជនភៀសខ្លួនប៉ាឡេស្ទីន និងស៊ីរីរាប់សែននាក់ ដែលកំពុងរស់នៅក្នុងជំរំទ្រុឌទ្រោមយ៉ាងណែនណាន់តាន់តាប់ នៅក្នុងប្រទេស លីបង់ កំពុងប្រឈមជាមួយវីរុសផ្លូវដង្ហើមកូរ៉ូណាប្រភេទថ្មី ខណៈក្រុមអ្នកផ្តល់ជំនួយមនុស្សធម៌ បានរួមគ្នាដើម្បីជួយដល់ពួកគេទាំងនោះ។
ប្រទេស លីបង់ គឺជាកន្លែងដើម្បីដាក់ក្រុមជនភៀសខ្លួនប៉ាឡេស្ទីនរាប់ម៉ឺននាក់នៅក្នុងជំរំមួយចំនួន ដែលអស់ជាច្រើនទសវត្សរ៍ បានធ្វើឲ្យសង្កាត់ខ្លះមានការមមាញឹកយ៉ាងខ្លាំង ហើយប្រជាជនស៊ីរីយ៉ាងតិច ១,៥ លាននាក់ ដែលបានរត់ភៀសខ្លួនចេញពីសង្គ្រាមជាបន្តបន្ទាប់។
យោងតាមមន្ត្រីបានឲ្យដឹងថា រហូតមកទល់ពេលនេះ មានពលរដ្ឋប៉ាឡេស្ទីនតែម្នាក់ប៉ុណ្ណោះ ដែលបានរស់នៅខាងក្រៅជំរំមួយ និងប្រជាជនស៊ីរី ៣ នាក់ផ្សេងទៀត បានធ្វើតេស្តរកឃើញមានផ្ទុកជំងឺកូវីដ ១៩ បានប្រៀបទៅនឹងអ្នកឆ្លងមាន ៥២០ នាក់ និង ១៧ នាក់ផ្សេងទៀតបានស្លាប់ នៅទូទាំងប្រទេស លីបង់។
ប៉ុន្តែក្រុមជនភៀសខ្លួនប៉ាឡេស្ទីន និងស៊ីរី ដែលបានរស់នៅក្នុងជំរំយ៉ាងច្រើន នៅក្នុងនោះមានជំរំបោះតង់ជាទីដែលផ្តល់សេវាកម្មជាមូលដ្ឋាន ដូចជាការផ្តល់ទឹកស្អាតមិនបានគ្រប់គ្រាន់ ជាពិសេសបានធ្វើឲ្យពួកគេមានជំងឺ ដោយសារស្ថានភាពរស់នៅមិនបានល្អ។
អ្នកនាំពាក្យទីភ្នាក់ងារជនភៀសខ្លួន របស់អង្គការសហប្រជាជាតិ UNRWA លោកស្រី ហ៊ូដា សាមរ៉ា បានថ្លែងថា៖ «ការព្រួយបារម្ភយ៉ាងសំខាន់ អំពីការឆ្លងរីករាលដាលវីរុសផ្លូវដង្ហើមកូរ៉ូណាប្រភេទថ្មី នៅក្នុងជំរំជនភៀសខ្លួនប៉ាឡេស្ទីនយ៉ាងច្រើនណែនណាន់តាន់តាប់ ជាទីដែលមានការដាក់កម្រិតយ៉ាងខ្លាំង ទៅតាមលទ្ធភាពឲ្យនៅក្នុងផ្ទះដាច់ដោយឡែកពីគេ»។
លោកស្រីបានថ្លែងថា ទីភ្នាក់ងារនោះ កំពុងស្វែងរកដើម្បីរៀបចំបង្កើតឲ្យមាន «មជ្ឈមណ្ឌលដាក់ឲ្យនៅដាច់ដោយឡែកពីគេ» នៅក្នុងជំរំ ដើម្បីដាក់អ្នកណាម្នាក់ ឲ្យនៅដាច់ដោយឡែកពីគេ ដែលចាំបាច់។
ទីភ្នាក់ងារជនភៀសខ្លួនរបស់ UN បានថ្លែងថា រចនាសម្ព័ន្ធទាំងនោះ ត្រូវបានគេកំពុងរៀបចំបង្កើតឡើង សម្រាប់ការរស់នៅរបស់ប្រជាជនស៊ីរី នៅក្នុងជំរំជិតគ្នានៅក្នុងសមុទ្រតង់ប្រក់ក្រណាត់ នៅក្នុងប្រទេស លីបង់ភាគខាងកើត៕AFP/SK