ក្រុងវ៉ាស៊ីនតោន៖ ប្រធានាធិបតីអាមេរិកលោក ដូណាល់ ត្រាំ បានព្រមានពលរដ្ឋអាមេរិកថា អាចមានចំនួនអ្នកស្លាប់ដោយសារការឆ្លងវីរុសកូរ៉ូណាច្រើនថែមទៀតនៅក្នុងរយៈពេលប៉ុន្មានថ្ងៃខាងមុខ ខណៈដែលចំនួនអ្នកស្លាប់ជាសកលបានកើនឡើងជាង ៦០ ០០០ នាក់។
ចំនួនករណីឆ្លងជំងឺកូវីដ ១៩ នៅអាមេរិកកាលពីថ្ងៃសៅរ៍បានកើនឡើងជាង ៣០ ម៊ឺននាក់ ប៉ុន្តែប្រទេសនៅអឺរ៉ុបបានបន្តទប់ស្កាត់ការឆ្លងរីករាលដាលកាន់តែខ្លាំងឡើង ដែលបានបង្កឲ្យមនុស្សជិតពាក់កណ្តាលនៅលើភពផែនដីបានស្នាក់នៅក្នុងផ្ទះដាច់ដោយឡែកពីគេ ដោយបានបង្កឲ្យប៉ះពាល់យ៉ាងធ្ងន់ធ្ងរដល់សេដ្ឋកិច្ចសកលលោក។
មនុស្សជាង ៤៥ ០០០ នាក់បានស្លាប់នៅអឺរ៉ុប ដោយប្រទេស អង់គ្លេស បានរាយការណ៍ អំពីចំនួនអ្នកស្លាប់ថ្មីកើនឡើងជារៀងរាល់ថ្ងៃ ដោយបានកើនឡើងដល់ជាង ៤ ៣០០ នាក់ នៃចំនួនជិត ៤២ ០០០ ករណី។
ម្ចាស់ក្សត្រីអេលីហ្សាប៊ែតទី ២ បានធ្វើសុន្ទរកថា «ផ្ទាល់ខ្លួនដ៏កម្រមួយ» កាលពីថ្ងៃអាទិត្យ ដើម្បីស្នើឲ្យប្រជាជនទាំងនោះ បង្កើនការទប់ស្កាត់ជាមួយវីរុសផ្លូវដង្ហើមកូរ៉ូណាប្រភេទថ្មី និងថ្លែងអំណរគុណដោយផ្ទាល់ដល់ក្រុមគ្រូពេទ្យនៅសមរភូមិមុខ។
យោងតាមអត្ថបទដកស្រង់បានចេញផ្សាយកាលពីថ្ងៃសៅរ៍បានឲ្យដឹងថា ម្ចាស់ក្សត្រីបានមានព្រះរាជបន្ទូលថា៖ «ខ្ញុំមានក្តីសង្ឃឹមនៅក្នុងរយៈពេលប៉ុន្មានឆ្នាំមកនេះ ចំពោះការមកដល់របស់អ្នកគ្រប់ៗគ្នា នឹងអាចមានមោទនភាពថា តើពួកគេបានឆ្លើយតបទៅនឹងឧបសគ្គមួយនេះ ដោយរបៀបណា»។
យោងតាមចំនួនសរុបរបស់សាកលវិទ្យាល័យ John Hopkins បានឲ្យដឹងថា បច្ចុប្បន្នបើតាមការអះអាងមានករណីឆ្លងជាង ១,២ លាននាក់ នៅទូទាំងពិភពលោក ហើយមនុស្សប្រហែល ៦៥ ០០០ នាក់បានស្លាប់ ចាប់តាំងពីវីរុសមួយនេះ បានផ្ទុះជាលើកដំបូង នៅក្នុងប្រទេស ចិន កាលពីឆ្នាំ ២០១៩។
ប្រធានាធិបតីអាមេរិកលោក ដូណាល់ ត្រាំ បានថ្លែងថា អាមេរិកកំពុងឈានដល់ «ពេលវេលាមួយដែលនឹងត្រូវឈានដល់កម្រិតគួរឲ្យខ្លាចបំផុត» ដោយមានមនុស្សមួយចំនួនបានរងផលប៉ះពាល់យ៉ាងអាក្រក់បំផុតនៅអាមេរិក»។
លោក ដូណាល់ ត្រាំ បានថ្លែងនៅឯសេតវិមានថា៖ «បញ្ហានេះ នឹងប្រហែលជាកាន់តែអាក្រក់ខ្លាំងឡើង» «ហើយនឹងមានអ្នកស្លាប់យ៉ាងច្រើនបន្ថែមទៀត»។
នៅពេលស្រដៀងគ្នានោះ ប្រធានាធិបតីអាមេរិក លោក ដូណាល់ ត្រាំ បានសង្កត់ធ្ងន់ថា អាមេរិកមិនអាចបិទប្រទេសជារៀងរហូតបានទេ។
លោក ដូណាល់ ត្រាំ បានថ្លែងថា៖ «ការបន្ធូរបន្ថយបានធ្វើឡើង ប៉ុន្តែជាថ្មីម្តងទៀត យើងនឹងមិនបំផ្លាញប្រទេសរបស់យើងជាដាច់ខាត»។«ខ្ញុំបាននិយាយថា វាចេញពីការចាប់ផ្តើមដំបូង ការព្យាបាលអាចធ្វើឲ្យស្ថានភាពនេះល្អប្រសើរឡើង»។
ការគំរាមកំហែងចេញពីការប្រមូលផ្តុំទ្រង់ទ្រាយធំ ត្រូវបានគេបញ្ជាក់ម្តងទៀតនៅសប្តាហ៍នេះ ពេលនេះនៅក្នុងប្រទេស ប៉ាគីស្ថាន ជាទីដែលអាជ្ញាធរកំពុងព្យាយាមស្វះស្វែងរកមធ្យោបាយ និងដាក់ក្រុមអ្នកគោរពបូជារាប់ម៉ឺននាក់ ដែលបានចូលរួមនៅក្នុងព្រឹត្តិការណ៍មូស្លីមទ្រង់ទ្រាយធំកាលពីខែមុននោះ ឲ្យនៅដាច់ដោយឡែកពីគេ។
មនុស្សជាង ១៥០ នាក់ រហូតមកទល់ពេលនេះ ដែលបានចូលរួមបានធ្វើតេស្តរកឃើញមានផ្ទុកវីរុសផ្លូវង្ហើមកូរ៉ូណាប្រភេទថ្មី ដោយមានមនុស្ស ២ នាក់បានស្លាប់។ ក្រុមជនបរទេសមកពីបណ្តាប្រទេសមួយចំនួន ក៏បានទៅចូលរួមក្នុងព្រឹត្តិការណ៍នោះ ដែលត្រូវបានរៀបចំធ្វើឡើង ទោះបីជារដ្ឋាភិបាលបានស្នើសុំឲ្យលុបចោលព្រឹត្តិការណ៍នោះ ដោយសារមានការព្រួយបារម្ភអំពីវីរុសនេះក្តី។
ចំណែកអ៊ីតាលី ដែលរងប៉ះពាល់យ៉ាងអាក្រក់បំផុតនោះ បានសម្តែងការត្រេកអរ ក្រោយពីមើលឃើញថាករណីបានថយចុះជាលើកដំបូងពីចំនួន ៤ ០៦៨ ករណី មកត្រឹម ៣ ៩៩៤ ករណី កាលពីថ្ងៃសៅរ៍៕ AFP/SK