ក្រុងបាងកក៖ យោងតាមអ្នកនាំពាក្យក្រសួងការពារជាតិលោកឧត្តមសេនីយ៍ទោ កងឆិប តាន់ត្រាវ៉ានិក បានឲ្យដឹងថា រដ្ឋាភិបាលថៃបានស្នើឲ្យឧត្តមស្នងការទទួលបន្ទុកជនភៀសខ្លួនអង្គការសហប្រជាជាតិ (UNHCR) ពន្លឿនការងារដើម្បីបញ្ជូនក្រុមជនភៀសខ្លួន និងក្រុមអ្នកស្វែងរកសិទ្ធិជ្រកកោនពីប្រទេស ថៃ ទៅកាន់ប្រទេសទី ៣។
លោកឧត្តមសេនីយ៍ទោ កងឆិប តាន់ត្រាវ៉ានិក បានថ្លែងថា ឧបនាយករដ្ឋមន្ត្រីលោក ប្រាវីត វង់ស៊ូវ៉ាន បានស្នើសុំនៅឯកិច្ចប្រជុំមួយជាមួយលោក អ៊ីន ឌ្រីការ៉ាត់វ៉ាតទី ប្រធាន UNHCR ប្រចាំនៅអាស៊ី និងប៉ាស៊ីហ្វិក នៅក្នុងអំឡុងដំណើរទស្សនកិច្ចរបស់លោកទៅកាន់ក្រសួងការពារជាតិកាលពីថ្ងៃពុធ។
លោកឧត្តមសេនីយ៍ទោ កងឆិប តាន់ត្រាវ៉ានិក បានថ្លែងថា លោកឧត្តមសេនីយ៍ ប្រាវីត វង់ស៊ុវ៉ាន់ បានអំពាវនាវឲ្យ UNHCR ជួយដោះស្រាយបញ្ហាក្រុមជនភៀសខ្លួន ដែលបានបង្កឡើងដោយជម្លោះប្រដាប់អាវុធ នៅក្នុងប្រទេស មីយ៉ាន់ម៉ា ក្បែរខាង។
លោកបានថ្លែងថា ប្រទេស ថៃ នឹងបន្តបង់វិភាគទានទៅឲ្យក្រុមការងាររបស់ UNHCR នៅក្នុងនោះមានកម្មវិធីទ្រទ្រង់ធ្វើមាតុភូមិនិវត្តន៍ដោយស្ម័គ្រចិត្តរបស់ក្រុមជនភៀសខ្លួន និងក្រុមអ្នកស្វែងរកសិទ្ធិជ្រកកោន ដើម្បីប្រទេសកំណើតរបស់ពួកគេ ការផ្តល់ការអប់រំ និងការពារដល់កុមារដែលត្រូវគេឃុំឃាំងជាដើម។
លោកឧត្តមសេនីយ៍ ប្រាវីត ត្រូវបានគេដកស្រង់សម្តី ដោយថ្លែងប្រាប់លោក រ៉ាតវ៉ាតទីថា ក្នុងនាមជាប្រធានអាស៊ាន ប្រទេស ថៃ ក៏បានប្តេជ្ញាចិត្តពន្លឿនការធ្វើមាតុភូមិនិវត្តន៍របស់ក្រុមជនភៀសខ្លួនឲ្យវិលត្រឡប់ទៅរដ្ឋរ៉ាក់ឃីន ប្រទេស មីយ៉ាន់ម៉ា វិញដែរ។
លោកឧត្តមសេនីយ៍ ប្រាវីត បានថ្លែងថា អាស៊ានក្នុងពេលឆាប់ៗនេះនឹងមានគម្រោងជាលើកដំបូងនៅក្នុងរដ្ឋរ៉ាក់ឃីន ដើម្បីគាំទ្រការរៀបចំរបស់រដ្ឋមួយនេះ សម្រាប់ក្រុមជនមាតុភូមិនិវត្តន៍ទាំងនោះ។
ឧត្តមស្នងការទទួលបន្ទុកជនភៀសខ្លួន បានថ្លែងថា ក្រុមជនមូស្លីមរ៉ូហ៊ីងយ៉ាជាង ៧៤២ ០០០ នាក់ បានរត់ភៀសខ្លួនចេញពីរដ្ឋរ៉ាក់ឃីនទៅរស់នៅក្នុងជំរំនានានៅប្រទេស បង់ក្លាដែស ក្រោយខែសីហា ឆ្នាំ ២០១៧ នៅពេលអំពើហិង្សាបានផ្ទុះឡើងបណ្តាលឲ្យមនុស្សស្លាប់នៅក្នុងរដ្ឋរ៉ាក់ឃីននោះ។
លោកឧត្តមសេនីយ៍ទោ កងឆិប បានថ្លែងថា លោក រ៉ាតវ៉ាតទី បានសន្យាផ្តល់ការគាំទ្រដល់ប្រទេស ថៃ នៅក្នុងការដោះស្រាយក្រុមជនភៀសខ្លួន និងក្រុមអ្នកស្វែងរកសិទ្ធិជ្រកកោនរបស់ខ្លួន។
ចំណែកគណៈរដ្ឋមន្ត្រីកាលពីថ្ងៃអង្គារ បានអនុម័តសេចក្តីព្រាងអំពីការប្តេជ្ញាចិត្តរបស់ប្រទេស ថៃ នឹងត្រូវបានគេប្រកាសនៅឯវេទិកាជនភៀសខ្លួនពិភពលោកលើកទី ១ នៅក្នុងទីក្រុងហ្សឺណែវ នៅថ្ងៃទី ១៧-១៨ ខែ ធ្នូ ឆ្នាំ ២០១៩៕ BKP/SK