ក្រុងសាណា៖ ប្រព័ន្ធផ្សព្វផ្សាយមួយនៅក្នុងមូលដ្ឋានបាននិយាយថា ទាហានយ៉ាងតិច ៤០ នាក់បានស្លាប់ កាលពីថ្ងៃសៅរ៍ នៅក្នុងការវាយប្រហារមីស៊ីលបាលីស្ទិកមួយ ដោយក្រុមហ៊ូធីមានសម្ព័ន្ធមិត្តជាមួយអ៊ីរ៉ង់ទៅលើមូលដ្ឋានយោធារបស់ក្រុមចម្រុះដឹកនាំដោយប្រទេស អារ៉ាប៊ី សាអ៊ូឌីត នៅក្នុងខេត្តម៉ារីប ប្រទេស យេម៉ែនភាគឦសាន។
ប្រព័ន្ធផ្សព្វផ្សាយនោះ បានប្រាប់កាសែតស៊ីនហួរតាមទូរស័ព្ទក្នុងលក្ខខណ្ឌអនាមិកថា៖ «ចំនួនអ្នកស្លាប់បានកើនឡើងរហូតដល់ ៤០ នាក់ ហើយពួកគេទាំងអស់ដែលបានស្លាប់នោះ គឺជាទាហានរបស់រដ្ឋាភិបាលយេម៉ែន» ដោយបានបន្ថែមថា ទាហានរាប់សិបនាក់ផ្សេងទៀត បានរងរបួសយ៉ាងធ្ងន់ធ្ងរនៅក្នុងការវាយប្រហារនៅទីនោះ។
ការវាយប្រហារនោះបានធ្វើឡើងនៅពេលក្រុមទាហានទាំងនោះ កំពុងប្រមូលផ្តុំគ្នានៅក្នុងមូលដ្ឋានយោធាសំខាន់មួយកន្លែងនៅពេលរសៀល ហើយមិនមានការធ្វើអត្ថាធិប្បាយភ្លាមៗណាមួយ ចេញពីក្រុមឧទ្ទាមហ៊ូធីនោះនៅឡើយទេ។
កាលពីពេលកន្លងទៅ ការវាយប្រហារមីស៊ីលទៅលើមូលដ្ឋានយោធាមួយកន្លែងនៅខេត្តម៉ារីប ត្រូវបានអះអាងដោយក្រុមឧទ្ធាមហ៊ូធីគាំទ្រដោយប្រទេស អ៊ីរ៉ង់។
ក្រុមចម្រុះដឹកនាំដោយប្រទេស អារ៉ាប៊ី សាអ៊ូឌីត បានចូលអន្តរាគមន៍នៅក្នុងជម្លោះយេម៉ែនកាលពីខែមីនា ឆ្នាំ ២០១៥ ដើម្បីគាំទ្ររដ្ឋាភិបាលប្រធានាធិបតីលោក អាប់ដ៍-រ៉ាបប៊ូម៉ាន់ស៊ួរ ហាឌី ប្រឆាំងក្រុមហ៊ូធី ដែលបានបើកការវាយប្រហារទៅលើរដ្ឋធានីសាណា ហើយបានគ្រប់គ្រងទឹកដីជាច្រើនរបស់យេម៉ែននៅភាគខាងជើងកាលពីឆ្នាំ ២០១៤៕ Xinhua/SK