លោកប្រធានាធិបតីបារាំង Emmanuel Macron ថ្លែងទៅកាន់សារព័ត៌មានកាលពីថ្ងៃទី ២៣ ខែតុលា។AFP
.jpg)
ប៉ុន្មានថ្ងៃចុងក្រោយនេះមានការអំពាវនាវឱ្យធ្វើពហិការក្នុងការប្រើប្រាស់ផលិតផលបារាំងជាពិសេសផលិតផលម្ហូបអាហារ នេះបើតាមការប្រកាសឱ្យដឹងរបស់ក្រសួងការបរទេសបារាំង នៅក្នុងសេចក្តីថ្លែងការណ៍មួយចេញផ្សាយកាលពីថ្ងៃអាទិត្យ ទី ២៥ ខែតុលា។
សេចក្តីថ្លែងការណ៍បានបញ្ជាក់ថា៖ «ការអំពាវនាវឱ្យធ្វើពហិការនេះ គឺជារឿងគ្មានមូលដ្ឋាន ដែលគួរតែបញ្ឈប់ជាបន្ទាន់ ហើយក៏ត្រូវបញ្ឈប់ការវាយប្រហារទាំងអស់ប្រឆាំងនឹងប្រទេសបារាំង ដែលកំពុងត្រូវបានជំរុញដោយជនជាតិភាគតិចជ្រុលនិយម»។
កាលពីសប្ដាហ៍មុន លោកMacron បានថ្លែងសារធ្ងន់ៗឆ្លើយតបទៅនឹងការសម្លាប់កាត់ក្បាលសាស្ត្រាចារ្យប្រវត្តិវិទ្យា និងភូមិវិទ្យាឈ្មោះ Samuel Paty បន្ទាប់ពីលោកសាស្ត្រាចារ្យរូបនេះ បានប្រើប្រាស់រូបត្លុកកំប្លែងអំពីព្យាការី Muhammad គូរដោយកាសែតកំប្លែងបារាំង Charlie Hebdo ដើម្បីបង្ហាញដល់សិស្សក្នុងមេរៀនមួយនិយាយពីសេរីភាពនៃការបញ្ចេញមតិ។
លោកប្រធានាធិបតីរូបនេះបាននិយាយថា «គ្រូបង្រៀនឈ្មោះ Samuel Paty ត្រូវបានសម្លាប់ដោយពួកអ៊ិស្លាមជ្រុលនិយមដែលចង់បំផ្លាញអនាគតរបស់យើង ប៉ុន្តែយើងនឹងមិនបោះបង់ចោលរូបត្លុកទាំងនោះឡើយ»។ ជាមួយគ្នានេះ កាលពីថ្ងៃអាទិត្យ លោក Macron បានសរសេរក្នុងបណ្តាញសង្គម Twitter ទៀតថា៖ «យើងនឹងមិនចុះចាញ់ចំពោះបដិវត្តន៍អ៊ិស្លាមជ្រុលនិយមឡើយ។ យើងមិនទទួលយកការនិយាយញុះញង់ឱ្យស្អប់គ្នា ហើយយើងការពារការជជែកវែកញែក ដោយមានហេតុផល»។
ប៉ុន្ដែប្រជាជនមូស្លីមវិញមើល ឃើញថា ការពណ៌នាណាមួយ ឬការនិយាយពីអ្វីក៏ដោយឱ្យតែទាក់ទងនឹងព្យាការីរបស់ពួកគេនោះ គឺជាការប្រមាថ។ ប្រជាជនមូស្លីមបានផ្ទុះកំហឹងចំពោះប្រធានាធិបតីបារាំងដែលនិយាយប៉ះពាល់ដល់អារម្មណ៍ពួកគេថា «សាសនាអ៊ិស្លាមកំពុងមានវិបត្តិនៅទូទាំងពិភពលោកដោយសារតែប្រកាន់ជំហរតឹងតែងខ្លាំង»។
ជាប្រតិកម្មតបតនឹងសម្តីនេះនៅប្រទេសអារ៉ាប់ប៊ី សាអ៊ូឌីត ដែលជាប្រទេសមានសេដ្ឋកិច្ចធំជាងគេនៅតំបន់អារ៉ាប់ មានការអំពាវនាវឱ្យធ្វើពហិការមិនលក់ទំនិញបារាំងនៅតាមហាង ដែលនេះ គឺជានិន្នាការទី២ ប្រឆាំងនឹងប្រទេសបារាំង។ ទន្ទឹមនឹងនេះការតវ៉ាត្រូវបានគេឃើញមាននៅប្រទេសលីប៊ី ស៊ីរី និងតំបន់ហ្គាហ្សាដែរ។ នៅតាមផ្សារទំនើបមួយចំនួនក្នុងប្រទេសហ្ស៊កដានី កាតា និងកូវ៉ែត ផលិតផលបារាំង ក៏ត្រូវបានគេដកចេញពីហាងផងដែរ ដូចជាសក់ និងគ្រឿងសម្អាង ដែលផលិតនៅបារាំងជាដើម។
ចំណែកឯមេដឹកនាំនយោបាយនៅក្នុងប្រទេសតួកគី និងប៉ាគីស្ថាន បានចោទប្រកាន់លោក Macron ថា មិនគោរព «សេរីភាពនៃជំនឿ» និងបានធ្វើឱ្យជនជាតិម៉ូស្លីមរាប់លាននាក់នៅបារាំងបាត់បង់ឱកាស។ កាលពីថ្ងៃអាទិត្យ ប្រធានាធិបតីតួកគីលោក Recep Tayyip Erdogan បានស្នើជាលើកទី២ ថា លោក Macron គួរតែស្វែងរក «ការព្យាបាលបញ្ហាផ្លូវចិត្ត» ក្រោយបញ្ចេញទស្សន:របស់លោកចំពោះសាសនាអ៊ិស្លាម។ មេដឹកនាំប៉ាគីស្ថានលោក Imran Khan បានចោទប្រកាន់មេដឹកនាំបារាំងថា បាន «វាយប្រហារលើសាសនាអ៊ិស្លាមដោយគ្មានការយល់ដឹងអំពីសាសនានេះឡើយ»។
លោកបានសរសេរតាមបណ្តាញសង្គម twitterថា៖ «ប្រធានាធិបតី Macron បានវាយប្រហារ និងធ្វើឱ្យប៉ះពាល់ដល់អារម្មណ៍ប្រជាជនម៉ូស្លីមរាប់លាននាក់នៅអឺរ៉ុប និងទូទាំងពិភពលោក»។
នៅប្រទេសកូវ៉ែត ប្រធានសហជីពលោក Fahd Al-Kishti បានប្រាប់សារព័ត៌មានរ៉យទ័រថា៖ «រាល់ផលិតផលបារាំងទាំងអស់ត្រូវបានដកចេញពីសហករណ៍អ្នកប្រើប្រាស់ទាំងអស់»។ សមាគមក្រៅរដ្ឋាភិបាលនៃក្រុមអ្នកប្រើប្រាស់ ដែលមានសហគ្រាសជាង ៧០ ជាសមាជិកបានចេញសេចក្តីថ្លែងការណ៍ធ្វើពហិការនៅថ្ងៃទី ២៣ ខែតុលា។
ប្រធាន និងសមាជិកក្រុមប្រឹក្សាភិបាលនៃសមាគម Al-Naeem បានសម្រេចធ្វើពហិការផលិតផលបារាំងទាំងអស់ និងដកយកផលិតផលទាំងនោះចេញពីផ្សារទំនើប។ កូវ៉ែតនាំចូលផលិតផលពីប្រទេសបារាំង មានតម្លៃជាទឹកប្រាក់ប្រមាណ ១,១៦ ពាន់លានដុល្លារ ក្នុងឆ្នាំ ២០១៩។ នេះបើយោងតាមព័ត៌មានពីការិយាល័យស្ថិតិកូវ៉ែត៕
សុខ ស្រីលុច
