បុរីញូវយ៉កៈ រដ្ឋមន្ត្រីការបរទេស បានថ្លែងកាលពីថ្ងៃអង្គារថា ប៉ាឡេស្ទីន គ្រោងចាប់ផ្តើមកិច្ចប្រឹងប្រែងមួយ ដើម្បីក្លាយជាសមាជិកពេញសិទ្ធិរបស់អង្គការសហប្រជាជាតិ ថ្វីបើកិច្ចប្រឹងប្រែងនេះ ត្រូវបានរារាំងដោយអាមេរិកក្តី។
ប៉ាឡេស្ទីន មានឋានៈជាអ្នកសង្កេតការណ៍មិនមែនជាសមាជិកនៅអង្គការសហប្រជាជាតិ និងការក្លាយជាសមាជិកភាពពេញសិទ្ធិ លុះត្រាតែមានការទទួលស្គាល់ពីអន្តរជាតិថាជារដ្ឋប៉ាឡេស្ទីន។
សំណើណាមួយដើម្បីក្លាយជារដ្ឋសមាជិកពេញសិទ្ធិ របស់អង្គការសហប្រជាជាតិ ត្រូវតែអនុម័តដោយក្រុមប្រឹក្សាសន្តិសុខជាដំបូងដែលអាមេរិកមានអំណាចវេតូ មុនសំណើនោះត្រូវបានអនុម័ត ដោយមហាសន្និបាតរបស់អង្គការនេះ។
រដ្ឋមន្ត្រីការបរទេសប៉ាឡេស្ទីន លោក Riyad al-Maliki បានថ្លែងប្រាប់ក្រុមអ្នកកាសែតថា៖ «យើងដឹងថា យើងកំពុងប្រឈមនឹងការបោះឆ្នោតវេតូរបស់អាមេរិក ប៉ុន្តែវានឹងមិនរារាំងយើងមិនឲ្យដាក់សំណើដើម្បីក្លាយជាសមាជិកពេញសិទ្ធិរបស់អង្គការសហប្រជាជាតិនោះទេ»។
លោក Maliki បានថ្លែងថា ប៉ាឡេស្ទីន នឹងគ្រោងផ្តើមបញ្ចុះបញ្ចូលក្រុមសមាជិកនៃក្រុមប្រឹក្សាសន្តិសុខ ដោយមានលិខិតមួយច្បាប់ ដើម្បីដាក់ពាក្យស្នើសុំក្លាយជាសមាជិកពេញសិទ្ធិរបស់អង្គការសហប្រជាជាតិ។
ប៉ាឡេស្ទីន បានដាក់សំណើសុំក្លាយជាសមាជិកពេញសិទ្ធិ អ.ស.ប. កាលពីឆ្នាំ ២០១១ ប៉ុន្តែសំណើមិនបានទៅដល់ក្រុមប្រឹក្សានេះទេ៕ AFP/PSA