កងកម្លាំងប៉ារ៉ាត្រូវបានដាក់ពង្រាយដើម្បីការពារព្រំដែន។ រូបថត AFP
.jpg)
ក្រុងដាក្កាៈ ឧទ្ទាម «ជ្រុលនិយម» បង់ក្លាដែសរាប់រយនាក់គ្រោងទម្លាក់អាវុធរបស់ពួកគេដើម្បីចុះចូលជាមួយរដ្ឋាភិបាល ជាអ្វីដែលប៉ូលិសបាននិយាយថា គឺជាការចុះចូលទ្រង់ទ្រាយធំបំផុតក្នុងរយៈពេលជាច្រើនទសវត្សរ៍នៅប្រទេសអាស៊ីខាងត្បូងនេះ។
ក្រុមមន្ត្រីបានថ្លែងថា ក្រុមឧទ្ទាមជាង ៦០០ នាក់ ត្រូវបានគេរំពឹងថា នឹងប្រគល់អាវុធផលិតក្នុងស្រុក និងអាវុធផ្សេងៗទៀតទៅឲ្យរដ្ឋមន្ត្រីមហាផ្ទៃបង់ក្លាដែស និងប្រមុខប៉ូលិសនៅឯពិធីផ្លូវការមួយនៅពហុកីឡដ្ឋានមួយ។
លោក Sheikh Rafiqul- Islam ជាប្រមុខប៉ូលិសនៅស្រុក Pabna ភាគពាយព្យបានថ្លែងប្រាប់ AFP ថា៖ «រដ្ឋាភិបាលនឹងជួយស្តារនីតិសម្បទាពួកគេ ដូច្នេះហើយពួកគេអាចត្រឡប់ទៅរស់នៅក្នុងសង្គមដូចប្រជាជនដទៃដែរ»។
តំបន់ភាគខាងលិចនៃបង់ក្លាដែសត្រូវបានរងការបំផ្លិចបំផ្លាញដោយជម្លោះ ចាប់តាំងពីទសវត្សរ៍ឆ្នាំ ១៩៧០ រហូតដល់ពេលបច្ចុប្បន្នដោយមានក្រុមចលនាឆ្វេងនិយម នៅក្នុងនោះ រួមមានក្រុមម៉ៅនិយម និងក្រុមកុលសម្ព័ន្ធជាច្រើនក្រុមទៀត ដែលកំពុងវាយប្រហាររដ្ឋ ចេញពីទីតាំងជាច្រើននៅក្នុងព្រៃ។
បង់ក្លាដែសបានពិពណ៌នាពីពួកគេទាំងនោះថាជា «ក្រុមជ្រុលនិយម» ហើយបានស្តីបន្ទោសពួកគេជុំវិញការធ្វើឃាតក្រុមឥស្សរជនអ្នកនយោបាយ និងក្រុមអ្នកកាសែត ហើយបានវាយប្រហារទៅលើកងកម្លាំងប្រដាប់អាវុធ និងប៉ូលិសបណ្តាលឲ្យស្លាប់ជាច្រើននាក់៕ AFP/SK
