បុរសម្នាក់កាន់រូបថតរបស់លោក ដូណាល់ ត្រាំ ខណៈក្រុមអ្នកតវ៉ាគ្រវីទង់ជាតិអាមេរិកអំឡុងពេលហែក្បួន។ AFP
.jpg)
ក្រុងហុងកុង៖ ប្រមុខប្រតិបត្តិនៃតំបន់រដ្ឋបាលពិសេសក្រុងហុងកុង (HKSAR) នៃប្រទេស ចិន លោកស្រី ការី ឡាម បានថ្លែងកាលពីថ្ងៃអង្គារថា ការជ្រៀតជ្រែក របស់បរទេសក្នុងកិច្ចការផ្ទៃក្នុងរបស់ HKSAR មិនត្រឹមត្រូវទាល់តែសោះ។
លោកស្រី ឡាម បានថ្លែងនៅសន្និសីទសារព័ត៌មានមួយ ជាការឆ្លើយតបទៅនឹងសំណើសុំអ្វីដែលហៅថាច្បាប់សិទ្ធិមនុស្ស និងលទ្ធិប្រជាធិបតេយ្យក្រុងហុងកុង នៅសភាអាមេរិកនោះ។
លោកស្រីបានលើកឡើងពីការប្រឆាំងចំពោះការជ្រៀតជ្រែករបស់រដ្ឋាភិបាលបរទេស ក្នុងកិច្ចការផ្ទៃក្នុងរបស់ HKSAR នៅក្នុងទម្រង់ណាមួយនោះ។
ប្រមុខប្រតិបត្តិតំបន់រដ្ឋបាលពិសេសលោកស្រី ការី ឡាម ថ្លែងនៅក្នុងអំឡុងសន្និសីទកាសែតនៅក្រុងហុងកុង។ Xinhua
នៅក្នុងអំឡុងសន្និសីទសារព័ត៌មាននោះ លោកស្រី ឡាម ក៏បានថ្លែងថា លោកស្រីមានទុក្ខសោកយ៉ាងជ្រាលជ្រៅបំផុត ដោយអំពើហិង្សានៅតាមស្ថានីយរថភ្លើងធំៗ (MTR) គឺស្ថានីយ Prince Edward និងភាគកណ្តាលរបស់ក្រុងហុងកុង ដោយបានអំពាវនាវឲ្យបញ្ចប់ការបំផ្លាញហេដ្ឋារចនាសម្ព័ន្ធរបស់ក្រុងនេះ។
លោកស្រី ឡាម បានថ្លែងថា ព្រលានយន្តហោះ និងប្រព័ន្ធផ្លូវដែក គឺជាអាយុជីវិតរបស់ក្រុងហុងកុង ទាក់ទងទៅនឹងជីវិតប្រចាំថៃ្ងរបស់ពលរដ្ឋនៅក្នុងតំបន់យ៉ាងជិតស្និទ្ធ ដោយបានបន្ថែមថា ការបង្កើនអំពើហិង្សានឹងមិនអាចដោះស្រាយបញ្ហាសង្គមបានទេ ប៉ុន្តែធ្វើឲ្យជម្លោះ ការបែកបាក់ និងការស្អប់គ្នាកាន់តែកើនឡើង។
លោកស្រីបានអំពាវនាវដល់ផ្នែកទាំងអស់នៃសហគមន៍ក្រុងហុងកុង ឲ្យធ្វើការរួមគ្នាដើម្បីបញ្ឈប់អំពើហិង្សា។
ក្រុមអ្នកតវ៉ាហែក្បួនពីសួន Chater Garden ទៅកាន់ស្ថានកុងស៊ុលអាមេរិកនៅក្រុងហុងកុង។ AFP
លោកស្រីបានថ្លែងថា គោលការណ៍ច្បាប់ គឺជាគុណតម្លៃដ៏មានសារៈសំខាន់របស់ក្រុងហុងកុង និងរដ្ឋាភិបាលរបស់ HKSAR នឹងស៊ើបអង្កេតលើឧប្បត្តិហេតុហិង្សាទាំងអស់យោងតាមច្បាប់។
លោកស្រី ឡាម ក៏បានថ្លែងថា រដ្ឋាភិបាល HKSAR ពិតជាមានភាពស្មោះត្រង់ក្នុងការចូលរួមការពិភាក្សាជាមួយប្រជាជនមកពីកន្លែងផ្សេងៗគ្នា ហើយលោកស្រី និងមន្ត្រីដទៃទៀត នឹងទៅដល់សហគមន៍នោះនៅក្នុងខែនេះ ដោយបានបន្ថែមថា លោកស្រីនឹងព្យាយាមធ្វើឲ្យការពិភាក្សានោះបើកចំហដល់សាធារណជនទាំងអស់៕ China Daily/PSA
