ទាហានអាមេរិកឈរជើងនៅក្នុងក្រុងម៉ូស៊ុល ក្នុងខេត្តនីណេវ៉េហ៍នៃប្រទេស អុីរ៉ាក់។AFP
.jpg)
ក្រុងបាកដាដ៖ ប្រភពសន្តិសុខប្រចាំតំបន់បានថ្លែងថា រ៉ុក្កែត Katyusha ៥ គ្រាប់ បានធ្លាក់នៅជិតក្រុមហ៊ុនប្រេងរបស់អាមេរិក ១ កន្លែង នៅក្នុងខេត្តបាស្រា ប្រទេស អ៊ីរ៉ាក់ភាគខាងត្បូង កាលពីថ្ងៃចន្ទ ដោយមិនបង្កឲ្យមនុស្សស្លាប់ និងរងរបួសទេ។
ប្រភពនោះ បានថ្លែងប្រាប់កាសែតស៊ីនហួ ក្នុងលក្ខខណ្ឌអនាមិកថា ការវាយប្រហារបានធ្វើឡើងនៅពេលព្រឹកព្រលឹម នៅពេលគ្រាប់រ៉ុក្កែតជាច្រើនគ្រាប់បានធ្លាក់នៅក្បែរក្រុមហ៊ុនប្រេងហាល់លីប៊ូរតុនរបស់អាមេរិកនៅក្នុងតំបន់អាល់ហ្សាប៊ៃរ៍ នៅក្នុងទឹកដីនៃខេត្តបាស្រាភាគខាងលិច។
ប្រភពដដែលបានឲ្យដឹងទៀតថា ការវាយប្រហារនោះ មិនបានបង្កឲ្យមនុស្សស្លាប់ និងរងរបួសទេ ប៉ុន្តែមានការខូចខាតបន្តិចបន្តួច ខណៈកងកម្លាំងសន្តិសុខអ៊ីរ៉ាក់ បានធ្វើយុទ្ធនាការស្វែងរកនៅក្នុងតំបន់ខ្លះនៅក្បែរខាង ហើយបានរកឃើញជើងទម្របាញ់រ៉ុក្កែតនៅទីនោះ។
រហូតមកទល់ពេលនេះ មិនមានក្រុមណាមួយ បានចេញមកអះអាងទទួលខុសត្រូវចំពោះការវាយប្រហារនោះទេ ខណៈមូលដ្ឋានយោធាអ៊ីរ៉ាក់ ដែលមានកងកម្លាំងអាមេរិក និងផលប្រយោជន៍អាមេរិកផ្សេងទៀតនៅទូទាំងប្រទេស អ៊ីរ៉ាក់ ជាញឹកញាប់ត្រូវបានកំណត់គោលដៅ ដោយគ្រាប់កាំភ្លើងត្បាល់ និងបានវាយប្រហាររ៉ុក្កែតជាច្រើនគ្រាប់ដោយក្រុមអ្នកបះបោរ។
កាលពីថ្ងៃទី ៥ ខែមករា សភាអ៊ីរ៉ាក់បានអនុម័តសេចក្តីសម្រេចមួយ ដែលតម្រូវឲ្យរដ្ឋាភិបាលបញ្ចប់វត្តមានកងកម្លាំងបរទេសនៅក្នុងប្រទេស អ៊ីរ៉ាក់ ទើបតែ ២ ថ្ងៃប៉ុណ្ណោះ ក្រោយពីយន្តហោះដ្រូនអាមេរិកបានវាយប្រហារទៅលើក្បួនរថយន្តមួយ នៅព្រលានយន្តហោះក្រុងបាកដាដ ដែលបានសម្លាប់លោក ហ្គាស៊ីម ស៊ូឡេម៉ានី ជាអតីតមេបញ្ជាការរបស់កងកម្លាំងការពារបដិវត្តន៍អ៊ីរ៉ង់។
ទាហាន US ជាង ៥ ០០០ នាក់ ត្រូវបានដាក់ពង្រាយនៅអ៊ីរ៉ាក់ ដើម្បីគាំទ្រកងកម្លាំងអ៊ីរ៉ាក់ នៅក្នុងការប្រយុទ្ធប្រឆាំងក្រុម IS ជាពិសេសសម្រាប់បណ្តុះបណ្តាល និងការផ្តល់យោបល់វិស័យយោធា៕ Xinhua/SK
