បេក្ខជននាយករដ្ឋមន្ត្រីបក្សភឿថៃ Sudarat Keyuraphan។ BKP
.jpg)
ក្រុងបាងកកៈ សមាជិកសំខាន់របស់ គណបក្សភឿថៃ គឺលោកស្រី Khunying Sudarat Keyuraphan កាលពីថ្ងៃចន្ទបានទាមទារចង់ដឹងថា តើគណបក្សប្រជាធិបតេយ្យ នឹងពិចារណាអំពីការចូលរួមជាមួយបក្សផាឡាំងប្រាឆារ៉ាត់ (PPRP) គាំទ្ររបបសឹក ឬយ៉ាងណា ក្រោយពីមេដឹកនាំរបស់ខ្លួន លោក អាភីស៊ីត វេចាជីវ៉ា ដែលបានប្រកាសថា លោកនឹងមិនគាំទ្រការវិលមកកាន់អំណាចជានាយករដ្ឋមន្ត្រីវិញរបស់លោកឧត្តមសេនីយ៍ ប្រាយុធចាន-អូចា ក្រោយការបោះឆ្នោតនោះទេ។
លោកស្រី Khunying Sudarat ជាបេក្ខជននាយករដ្ឋមន្ត្រីបក្សភឿថៃមួយរូប និងប្រធានគណៈកម្មាធិការយុទ្ធសាស្ត្ររបស់បក្សនេះ បានថ្លែងថា គណបក្ស នឹងមានជម្រើស ២ ក្រោយការបោះឆ្នោតនៅថ្ងៃទី ២៤ ខែ មីនា ខាងមុខនេះ នឹងជាផ្នែកមួយរបស់រដ្ឋាភិបាលចម្រុះមួយ ឬជារបស់គណបក្សប្រឆាំងនោះ។
«លោកអាភីស៊ីត និងគណបក្សប្រជាធិបតេយ្យ ត្រូវតែមានជម្រើស ពីព្រោះគ្មានភាគីអព្យាក្រឹតនៅក្នុងរដ្ឋាភិបាលទេ។ លោក អាភីស៊ីត ត្រូវតែពន្យល់ថា តើគណបក្សរបស់លោកនឹងចូលរួមរដ្ឋាភិបាលចម្រុះដឹកនាំដោយបក្ស ផាឡាំងប្រាឆារ៉ាត់មួយនេះ ឬអត់?»។
លោកស្រី Khunying Sudarat បានថ្លែងថា៖«ការចូលរួម ឬមិនចូលរួមនោះនៅតែស្ថិតនៅក្នុងភាពមន្ទិលសង្ស័យដដែល ពីព្រោះប្រជាជនថៃភាគច្រើន នឹងគិតថា ទោះបីជាអ្នក [លោក អាភីស៊ីត] នឹងមិនគាំទ្រលោកឧត្តមសេនីយ៍ ប្រាយុធ ក៏ដោយ ក៏បក្សរបស់លោកនៅតែមានឆន្ទៈចង់ធ្វើការជាមួយគណបក្សផាឡាំងប្រាឆារ៉ាត់ដែរ»៕ BKP/SK
