ក្រុងបាងកកៈ អ្នកនាំពាក្យរដ្ឋាភិបាលលោកស្រី ណារូមូន ភីនយូស៊ីនណាវ៉ាត បានថ្លែងថា លោកនាយករដ្ឋមន្ត្រី ប្រាយុធ ចាន-អូចា កាលពីថ្ងៃចន្ទ បានធ្វើដំណើរទស្សនកិចុ្ចទៅកាន់ខេត្តសុរិន្ទ និងប៊ូរីរ៉ាំនៅភាគឦសាន ដែលរងប៉ះពាល់ដោយគ្រោះរាំងស្ងួត។
នៅខេត្តសុរិន្ទ លោកនាយករដ្ឋមន្ត្រី នឹងផ្តោតការយកចិត្តទុកដាក់ទៅលើអាងស្តុកទឹកហ៊ុយ សាណេង និងអាំភីល ដែលជាប្រភពផ្គត់ផ្គង់ទឹកយ៉ាងសំខាន់នៅក្នុងខេត្តមួយនេះ។
លោកស្រី ណារូមូន បានថ្លែងថា៖ «ចំនួនទឹកមានតិចនៅក្នុងអាងហ៊ុយ សាណេង និងអាំភីល បានបណ្តាលឲ្យមានការខ្វះខាតទឹកប្រើប្រាស់នៅក្នុងស្រុកមឿង និងសាមរ៉ុង ហើយកំពុងធ្វើឲ្យប៉ះពាល់ដល់បណ្តាភូមិទាំង ៣០៨ នៅក្នុងឃុំទាំង ៣១ និងផ្ទៃដីសម្រាប់កសិកម្មចំនួន ១៥០,៩៩៥ ម៉ែត្រការ៉េ»។
ចំណែកឯខេត្តប៊ូរីរ៉ាំវិញ ចំនួនទឹកសរុប ១,៤ លានម៉ែត្រគុប នៅក្នុងអាងហ៊ុយ តាឡាត និងហ៊ុយ ជូរ៉ាក់ខេ បានឈានទៅរកការខ្វះខាតទឹកប្រើប្រាស់យ៉ាងធ្ងន់ធ្ងរផងដែរ។
លោកឧត្តមសេនីយ៍ ប្រាយុធ កាលពេលថ្មីៗនេះ បានណែនាំឲ្យលោក ចាឡើមឆៃ ស្រ៊ីអន ជារដ្ឋមន្ត្រីកសិកម្ម និងកិច្ចសហប្រតិបត្តិការ និងទីភ្នាក់ងារនានា ឲ្យជួយដោះស្រាយបញ្ហាខ្វះទឹក៕ KP/SK