លោក មូន ជេអុីន (ឆ្វេង) និងលោកដូណាល់ ត្រាំ ធ្វើសន្និសីទកាសែតរួមគ្នា។ Yonhap
.jpg)
ក្រុងសេអ៊ូល៖ វិមានប្រធានាធិបតី Cheong Wa Dae បានប្រកាសកាលពីថ្ងៃសុក្រថា លោកប្រធានាធិបតីកូរ៉េខាងត្បូង មូន ជេអ៊ីន និងលោកប្រធានាធិបតីអាមេរិក គ្រោងរៀបចំជំនួបកំពូលនៅក្រុងញូវយ៉កនៅចុងខែនេះ នៅក្រៅសង្វៀននៃជំនួបអង្គការសហប្រជាជាតិ។
អ្នកនាំពាក្យវិមានប្រធានាធិបតីលោកស្រី Ko Min-jung បានថ្លែងថា សម្ព័ន្ធមិត្តទាំងអស់បានព្រមព្រៀងរៀបចំជំនួបឲ្យស្របពេលជាមួយដំណើរទស្សនកិច្ចរបស់លោក មូន ទៅកាន់អាមេរិកដើម្បីចូលរួមមហាសន្និបាតលើកទី ៧៤ នៃអង្គការសហប្រជាជាតិពីថ្ងៃទី ២២ ដល់ថ្ងៃទី ២៦ ខែកញ្ញានេះ។
លោកស្រីបានបន្ថែមថា ភាគីទាំង ២ កំពុងពិគ្រោះគ្នាអំពីកាលវិភាគលម្អិតអំពីជំនួបនោះ។
លោក មូន គ្រោងថ្លែងសុន្ទរកថានៅជំនួបអង្គការសហប្រជាជាតិនៅថ្ងៃទី ២៤ ខែកញ្ញា។
លោកក៏នឹងរៀបចំជំនួបទ្វេភាគីជាច្រើនទៀតជាមួយលោកអគ្គលេខាធិការ អ.ស.ប.Antonio Guterres និងមេដឹកនាំមកពីប្រទេសដទៃទៀត។
លោក មូន ត្រូវចូលរួមព្រឹត្តិការណ៍មួយដើម្បីរៀបចំជំនួប P4G និងជំនួបស្តីពីវិធានការអាកាសធាតុរបស់អង្គការសហប្រជាជាតិផងដែរ។ P4G តំណាងឲ្យពាក្យថា ការបង្កើតដៃគូសម្រាប់កំណើនបៃតង និងគោលដៅរបស់ពិភពលោកឆ្នាំ ២០៣០ ជាសម្ព័ន្ធមិត្តអាកាសធាតុថ្មីមួយដែលមានបំណងក្លាយជាម៉ាស៊ីនថ្មីមួយ ដើម្បីជំរុញឲ្យមានកំណើនដែលមិនធ្វើឲ្យប៉ះពាល់បរិស្ថាន។
ដោយត្រូវបានសួរអំពីជំនួបដាច់ដោយឡែករបស់លោក មូន ជាមួយលោកនាយករដ្ឋមន្ត្រីជប៉ុន ស៊ីនហ្សូ អាបេនៅក្រុងញូវយ៉កនោះ លោកស្រី Ko បានថ្លែងថា មិនទាន់មានការសម្រេចចិត្តណាមួយត្រូវបានធ្វើឡើងនៅឡើយទេ។
នៅក្នុងជំនួប មូន-ត្រាំ ជាធម្មតាបញ្ហាកូរ៉េខាងជើងនឹងស្ថិតនៅក្នុងរបៀបវារៈកំពូល៕ Yonhap/PSA
