ក្រុងបេរូត៖ សង្គ្រាមនៅស៊ីរីបានចាប់ផ្តើមផ្ទុះឡើង ខណៈការបះបោរដោយសន្តិវិធីមួយ ដែលត្រូវបានបរាជ័យទាំងស្រុង នៅក្នុងការបង្ក្រាបដោយរបបមួយនៅស៊ីរី។ ក្នុងរយៈពេល ៨ ឆ្នាំមកនេះ មនុស្សជាង ៣៧ ម៊ឺននាក់ បានស្លាប់ ហើយមនុស្សរាប់លាននាក់ផ្សេងទៀតត្រូវបានបង្ខំចិត្តឲ្យរត់ភៀសខ្លួនចេញក្រៅប្រទេស។
នេះ គឺជាការសង្ខេបអំពីព្រឹត្តិការណ៍សំខាន់ៗនៅក្នុងជម្លោះនៅប្រទេស ស៊ីរី។
កាលពីខែ មីនា ឆ្នាំ ២០១១ ការតវ៉ាបានផ្ទុះឡើងដើម្បីទាមទារឲ្យមានការផ្លាស់ប្តូរនយោបាយ ក្រោយពីការគ្រប់គ្រងមានការគាបសង្កត់អស់ ៤ ទសវត្សរ៍របស់សន្តិវង្សត្រកូល អាសាដ មកនោះ។
របបប្រធានាធិបតីស៊ីរីលោក បាសារ អាល់-អាសាដ បានបង្ក្រាបទៅលើក្រុមបាតុករ ប៉ុន្តែការប្រមូលផ្តុំនៅតែបន្តធ្វើឡើងនៅទីនោះ។
កាលពីខែកក្កដា វរសេនីយ៍ឯកយោធាម្នាក់ ដែលបានរត់ចោលជួរចេញពីអង្គភាពយោធា បានបង្កើតកងកម្លាំងសេរីភាពស៊ីរី (FSA) ធ្វើការប្រឆាំងមានមូលដ្ឋាននៅតួកគី។
ការបះបោរប្រដាប់អាវុធបានផ្ទុះឡើង ដោយមានការគាំទ្រពីប្រទេសលោកខាងលិច និងបណ្តាប្រទេសនៅអារ៉ាប់ផងនោះ ក្រុមឧទ្ទាមបានវាយដណ្តើមកាន់កាប់យកទឹកដីសំខាន់ៗ នៅក្នុងនោះមានទឹកដី ១ ផ្នែកធំដែលមានទីក្រុង ៣ ដូចជាក្រុងហូម និង ១ ផ្នែកទៀតនៃទីក្រុងបុរាណអាឡិបប៉ូ។
នៅឆ្នាំ ២០១២ កងកម្លាំងរបបស៊ីរី បានបង្កើនការបង្ក្រាបរបស់ពួកគេដោយធ្វើប្រតិបត្តិការវាយលុកយ៉ាងបង្ហូរឈាម ជាពិសេសនៅកណ្តាលទីក្រុងហូមតែម្តង ដែលជាទីតាំងមូលដ្ឋានឈរជើងប្រឆាំងរបបអាសាដនោះឯង។
កាលពីខែ កក្កដា ឆ្នាំ ២០១២ ក្រុមយុទ្ធជន FSA បានបើកការវាយប្រហារទៅលើក្រុងដាម៉ាស ប៉ុន្តែរដ្ឋាភិបាលបានការពារយ៉ាងស្វិតស្វាញ។
ចាប់ពីឆ្នាំ ២០១៣ ឧទ្ធម្ភាគចក្រ និងយន្តហោះចម្បាំងរបស់របបស៊ីរីជាច្រើនគ្រឿង បានបើកការវាយប្រហារផ្លូវអាកាសយ៉ាងខ្លាំងក្លា ដោយមានយន្តហោះខ្លះ បានប្រើប្រាស់គ្រាប់បែកធុង ទម្លាក់ទៅលើតំបន់ឈរជើងរបស់ក្រុមឧទ្ទាមទាំងនោះ។
នៅក្នុងឆ្នាំ ២០១៣ នេះដែរ ក្រុមសកម្មប្រយុទ្ធលីបង់គាំទ្រដោយអ៊ីរ៉ង់ គឺក្រុមហេបូឡាហ៍បានទទួលស្គាល់ថា ខ្លួនបានដាក់ពង្រាយក្រុមសកម្មប្រយុទ្ធ ដើម្បីគាំទ្រកងកម្លាំងរដ្ឋាភិបាលប្រទេស ស៊ីរី។
ចំណែកប្រទេស អ៊ីរ៉ង់ វិញ ក៏បានបង្កើនការគាំទ្ររបស់ខ្លួនដល់លោក អាសាដ ផងដែរ។
កាលពីថ្ងៃទី ២១ ខែ សីហា ឆ្នាំ ២០១៣ ការវាយប្រហារអាវុធគីមីត្រូវបានគេស្តីបន្ទោសទៅលើរបបស៊ីរី ទៅលើតំបន់ ២ គ្រប់គ្រងដោយក្រុមឧទ្ទាមនៅជិតក្រុងដាម៉ាស ដែលតាមការរាយការណ៍បានឲ្យដឹងថា មានមនុស្សជាង ១ ៤០០ នាក់ បានស្លាប់ ហើយរបបស៊ីរី បានបដិសេធការចោទប្រកាន់នោះ។
កាលពីខែ មេសា ឆ្នាំ ២០១៧ ការវាយប្រហារឧស្ម័នគីមីសារិនលើទីក្រុង Khan Shei-khun បានបង្កឲ្យមនុស្សជាង ៨០ នាក់ស្លាប់៕ AFP/SK