លោក Rodrigo Duterte (កណ្តាល)ក្នុងពិធីទទួលអាវុធពីក្រុម MILF។ AFP
.jpg)
ក្រុងម៉ានីល៖ ប្រទេស ហ្វីលីពីន បានចាប់ផ្តើមធ្វើសមាហរណកម្មអតីតក្រុមឧទ្ទាមឲ្យចូលរស់នៅក្នុងសង្គម ជាវិធានការមួយដែលលោកប្រធានាធិបតីហ្វីលីពីន Rodrigo Duterte បានថ្លែងថា នឹងនាំយក «សន្តិភាពយូរអង្វែង» មកកាន់តំបន់កោះ Mindanao របស់ហ្វីលីពីនភាគខាងត្បូង។
កាលពីថ្ងៃសៅរ៍ ប្រធានរណសិរ្សរំដោះអ៊ិស្លាមម៉ូរ៉ូ (MILF) និងប្រមុខរដ្ឋមន្ត្រីស្តីទីនៃតំបន់កោះ Mindanao មូស្លីមស្វយ័ត Bangsamoro-(BARMM) គឺលោក Al Haj MuradEbrahim បានប្រគល់អាវុធទៅឲ្យលោក Duterte នៅកន្លែងចាប់ផ្តើមប្រារព្ធពិធីទម្លាក់អាវុធនៅទន្លេ Simuay នៅក្នុងខេត្ត Sultan Kudarat នៅហ្វីលីពីនភាគខាងត្បូងនៃខេត្ត Maguindanao។
លោក Murad បានថ្លែងថា ការទម្លាក់អាវុធនោះ «ត្រូវបានធ្វើឡើង» ដោយក្រុម MILF ដើម្បី «អបអរសាទរយ៉ាងជ្រាលជ្រៅ» របស់ខ្លួន សម្រាប់អ្វីដែលលោក (Duterte) បានធ្វើចំពោះប្រជាជនមូស្លីម Bangsamoro និងទឹកដីកំណើតរបស់យើងទាំងអស់គ្នានោះ»។
ដំណើរការទម្លាក់អាវុធរបស់ក្រុមយុទ្ធជន MILF ១ ០៦០ នាក់ គឺជាការអនុវត្តឲ្យមាន «ប្រក្រតីភាវូបនីយកម្ម» នៃកិច្ចព្រមព្រៀងទូលំទូលាយអំពីតំបន់មូស្លីម Bangsamoro-(CAB)។ ក្រុមដំបូងមានចំនួន ១ ២០០ នាក់ ឬស្មើ ៣០ ភាគរយ នៃកងកម្លាំងប្រដាប់អាវុធអ៊ិស្លាម MILF-Bangsamoro ដែលមាន ៤ ម៉ឺននាក់ (BIAF) ហើយសមាជិកក្រុមទាំងនេះត្រូវទម្លាក់អាវុធ រហូតដល់ខែមីនា ឬខែមេសាឆ្នាំ ២០២០ ខាងមុខនេះ។
ការប្រគល់អាវុធបានរាប់បញ្ចូលអាវុធចំនួន ៩២០ ដើម និង «អាវុធធុនធ្ងន់» របស់ក្រុម MILF ប្រហែល ២០ ដើម នៅក្នុងនោះមានជាង ៦០០ គ្រាប់សម្រាប់ជើងទម្របាញ់គ្រាប់រ៉ុក្កែតមាន ៧ ដើម៕ Xinhua/SK
