អ្នកស្រុកបដិសេធមិនឲ្យកប់សាកសពរបស់អ្នកវាយប្រហារអត្តឃាតនៅក្នុងក្រុងមេដាន។AFP
.jpg)
ក្រុងហ្សាការតា៖ ប៉ូលិសបាននិយាយកាលពីថ្ងៃចន្ទថា ជនសកម្មប្រយុទ្ធឥណ្ឌូនេស៊ីរាប់សិបនាក់ ដែលគេសង្ស័យនោះ ត្រូវបានចាប់ខ្លួនក្រោយពីអ្នកវាយប្រហារអត្តឃាតម្នាក់ ដែលមានទំនាក់ទំនងជាមួយក្រុមរដ្ឋអ៊ិស្លាម IS បានបំផ្ទុះខ្លួនឯង និងបង្កឲ្យមនុស្ស ៦ នាក់ផ្សេងទៀតរងរបួស នៅក្នុងការវាយប្រហារទៅលើប៉ុស្តិ៍ប៉ូលិសមួយកាលពីសប្តាហ៍មុន។
យោងតាមអាជ្ញាធរបានឲ្យដឹងថាជនសង្ស័យប្រហែល ៤៥ នាក់ ត្រូវបានចាប់ខ្លួន ចាប់តាំងពីការវាយប្រហារកាលពីថ្ងៃពុធសប្តាហ៍មុន នៅក្នុងក្រុងមេដាននៅលើកោះស៊ូម៉ាត្រា ខណៈដែលអ្នកវាយប្រហារ ២ នាក់ ត្រូវបានបាញ់សម្លាប់នៅក្នុងអំឡុងការវាយឆ្មក់មួយ។
អ្នកនាំពាក្យប៉ូលិសជាតិ លោក Dedi Prasetyo បានថ្លែងប្រាប់ក្រុមអ្នកកាសែតនៅក្នុងក្រុងហ្សាការតាកាលពីថ្ងៃចន្ទថា៖ «អ្នកវាយប្រហារទាំង ២ នាក់នោះ បានទប់ទល់នឹងការចាប់ខ្លួននោះ និងបានព្យាយាមវាយប៉ូលិសដោយប្រើអាវុធមុត និងកាំភ្លើងខ្យល់»។
លោក Prasetyo បានបន្ថែមថាពួកគេ បានផលិតគ្រាប់បែកអាំងតង់ស៊ីតេកម្រិតទាប ១ គ្រាប់ ដែលអ្នកវាយប្រហារមានវ័យ ២៤ ឆ្នាំនោះ បានចងជាប់នឹងខ្លួនរបស់គេ ហើយចុចបំផ្ទុះតែម្តង។
មុននេះបន្តិច អាជ្ញាធរបាននិយាយថា ពួកគេបានសង្ស័យថា អ្នកបំផ្ទុះគ្រាប់បែកអត្តឃាតនោះ គឺជាអ្នកវាយប្រហារតែម្នាក់គត់ បន្ទាប់ពីមានការបំផ្ទុះ ដែលបានបណ្តាលឲ្យមន្ត្រីប៉ូលិស ៤ នាក់ និងជនស៊ីវិល ២ នាក់រងរបួស៕ AFP/PSA
