ក្រុងវ៉ាស៊ីនតោនៈ មន្ទីរបញ្ចកោណ បានឲ្យដឹងកាលពីថ្ងៃចន្ទថា ខ្លួននឹងបន្តការដាក់ពង្រាយទាហាន ដែលមានតួនាទីសកម្ម និងកងឆ្មាំការពារសមុទ្រ រហូតដល់ថ្ងៃទី ៣០ ខែកញ្ញា នៅតាមព្រំដែន អាមេរិក-ម៉ិកស៊ិក នៅអំឡុងពេលធ្វើការពង្រីកបេសកកម្ម ដែលមានការឈ្លបមើល និងការស៊ើបអង្កេតផងដែរ។
ដោយការបន្តបេសកកម្មរបស់កងទ័ពរហូតដល់ឱសានវាទថ្ងៃទី ៣១ ខែមករា នោះ មន្ទីរបញ្ចកោណ បានថ្លែងថាខ្លួន «កំពុងធ្វើការផ្លាស់ប្តូរការគាំទ្ររបស់ខ្លួននៅតាមព្រំដែនភាគនិរតី ចេញពីការពង្រឹងសន្តិសុខនៅច្រកចូលកំពង់ផែដើម្បីឈ្លបមើល និងស៊ើបអង្កេត និងដាក់ខ្សែលួសព័ទ្ធ ជុំវិញរវាងច្រកចូលកំពង់ផែ»។
សេចក្តីថ្លែងការណ៍នោះ បានឲ្យដឹងថា៖ «DoD នឹងបន្តផ្តល់ការគាំទ្រឲ្យមានការហោះហើរនៅទីនោះ» ដោយនិយាយសំដៅទៅលើក្រសួងការពារជាតិ (Department of Defense)។
មន្ទីរបញ្ចកោណ មានកងកម្លាំងដែលមានតួនាទីសកម្មប្រហែល ២ ៣៥០ នាក់ បានឈរជើងនៅតាមបណ្តោយព្រំដែនដែលត្រូវដាក់ពង្រាយស្ថិតនៅក្រោមបញ្ជាដ៏ចម្រូងចម្រាសមួយរបស់ប្រធានាធិបតីលោក ដូណាល់ ត្រាំ បានចេញកាលពីឆ្នាំទៅ នៅមុនការ បោះឆ្នោតពាក់កណ្តាលអាណត្តិកាលពីខែវិច្ឆិកា ខណៈមានជនចំណាកស្រុកអាមេរិកកណ្តាលរាប់ពាន់នាក់បានធ្វើដំណើរទៅកាន់ព្រំដែនដើម្បីស្វែងរកសិទ្ធិជ្រកកោន ដោយសារអំពើហិង្សា និងភាពក្រីក្រនៅប្រទេសរបស់ពួកគេនោះ។
ក្រុមអ្នករិះគន់បានចាត់ទុកបញ្ជារបស់លោក ត្រាំ ថា ជាការរឹតត្បិតផ្នែកនយោបាយយ៉ាងធ្ងន់ធ្ងរមួយដើម្បីជំរុញទឹកចិត្តអ្នកគាំទ្រនៅមុនការបោះឆ្នោតដែលគណបក្សសាធារណរដ្ឋបាត់បង់ការគ្រប់គ្រងសភា។
លោក ដូណាល់ ត្រាំ បានថ្លែងអំពី «ការគ្រោះថ្នាក់ដល់ជាតិ» និង «ការឈ្លានពាន»មួយ កាលពីពេលថ្មីៗនេះ ដោយមានការស្នើសុំឲ្យកងកម្លាំងអាមេរិក អាចធ្វើការបាញ់ប្រហារទៅលើក្រុមជនចំណាកស្រុក ប្រសិនបើពួកគេ គប់ដុំថ្មទៅលើកងកម្លាំងការ ពារព្រំដែនអាមេរិកនោះ។
យោធាអាមេរិក មិនត្រូវបានអនុញ្ញាតឲ្យចូលរួមក្នុងករណីណាមួយ ដែលជាប់ពាក់ព័ន្ធក្នុងការអនុវត្តច្បាប់នៅក្នុងស្រុក និងបេសកកម្មនៅតាមព្រំដែនបានដាក់បញ្ចូលយោធាដែលមិនឲ្យពាក់ព័ន្ធនយោបាយ។
ឆ្មាំជាតិប្រហែល ២ ២០០ នាក់បានកំពុងគាំទ្រកិច្ចប្រតិបត្តិការនៅព្រំដែនរួចហើយនៅមុនលោក ត្រាំ បញ្ជូនទាហានមានតួនាទីសកម្មទៅទីនោះ។
ការដាក់ពង្រាយទាហានដែលមិនធ្លាប់កើតមានពីមុនត្រូវបានសន្មតថា ត្រូវបញ្ចប់នៅពាក់កណ្តាលខែធ្នូ ប៉ុន្តែក្រសួងសន្តិសុខមាតុភូមិ បានស្នើថា ការដាក់ពង្រាយនេះ គួរត្រូវបានបន្តរហូតដល់ខែមករា ជាកាលបរិចេ្ឆទមួយ ដែលត្រូវបានពន្យារពេលយ៉ាងយូរ។
តួនាទីរបស់ទាហាន ត្រូវសាងសង់របងរាប់ពាន់គីឡូម៉ែត្ររួមមានចំណុចឆ្លងកាត់ជាច្រើន។ លោក ត្រាំ បានបង្កើនការទាមទារឲ្យសង់របងព្រំដែនដែលបានបង្កឲ្យមានស្ថានភាពរកច្រកចេញគ្មានជាមួយក្រុមសមាជិកសភានិងបិទតាមផ្នែក នៃរដ្ឋាភិបាលដែលបានឈានចូលសប្តាហ៍ទី ៤ ហើយនោះ។
ការដាក់ពង្រាយទាហាន គឺជាបញ្ហាមួយក្នុងចំណោមបញ្ហាជាច្រើន ដែលប្រធានាធិបតីអាមេរិក លោក ត្រាំ និងអតីតរដ្ឋមន្ត្រីការពារជាតិលោកជីមម៉ាធីស មានការខ្វែងគំនិតគ្នា នៅមុនពេលលោកលាលែងពីតំណែងនៅក្នុងខែធ្នូ ក្រោយពីការសម្រេចចិត្តរបស់មេដឹកនាំនេះឲ្យដកកងទ័ពចេញពីប្រទេស ស៊ីរី នោះ៕ AFP/SK