ការប្រកួតលីគកំពូលកម្ពុជា រវាងក្រុមទ័ព (ក្រហម) និងក្រុមអាស៊ីអឺរ៉ុប កាលពីរដូវកាលឆ្នាំ ២០២០។សហការី
ភ្នំពេញ៖ គ្រូបង្វឹកក្រុមអាស៊ីអឺរ៉ុប លោក សុក វាសនា នៅតែបង្ហាញពីការបារម្ភចំពោះការស្វាគមន៍ក្រុមកងយោធពលខេមរភូមិន្ទ (ទ័ព) សម្រាប់ការប្រកួតលីគកំពូលកម្ពុជា នៅកីឡដ្ឋាន AEU នារសៀលម៉ោង ៣:៣០ ថ្ងៃពុធនេះ ចំណែកក្លិបវិសាខា បានប្រកាសដំណឹងដ៏រីករាយមួយ គឺមនុស្សទាំង ១៦៦ នាក់របស់ក្លិបមួយនេះ មិនមាននរណាម្នាក់បានឆ្លងជំងឺកូវីដ ១៩ នោះទេ។
ការវិលមកជួបគ្នារវាងក្រុមអាស៊ីអឺរ៉ុប និងទ័ព នៅថ្ងៃនេះ វាបានក្លាយជាការប្រកួតតែ ១ គត់ ដែលត្រូវបានធ្វើឡើងនៅក្រោមសម្ពាធនៃការរីករាលដាលនៃជំងឺកូវីដ ១៩ ខណៈជំនួបរវាងក្រុមចំនួន ១០ ទៀត សុទ្ធតែត្រូវបានលើកពេល ដើម្បីបញ្ចៀសការឆ្លងជំងឺកូវីដ ដែលកំពុងផ្ទុះខ្លាំងនៅកម្ពុជានោះ។
ជាមួយគ្នានេះ លោក សុក វាសនា បានអះអាងថា ការផ្ទុះឡើងជាថ្មីនៃជំងឺកូវីដ ១៩ ក៏បានប៉ះពាល់ដល់ការហ្វឹកហាត់របស់ក្រុមលោកផងដែរ។ «សម្រាប់ការជួបក្រុមទ័ព លើកនេះ យើងនៅតែមានការបារម្ភ ដោយយើងបានកែប្រែតំបន់ការពារ និងពង្រឹងតំបន់ប្រយុទ្ធ ប៉ុន្តែវានៅមិនទាន់បានគ្រប់គ្រាន់នៅឡើយទេ ព្រោះមានកង្វះខាតនូវពេលវេលាហ្វឹកហាត់ ដោយក្រុមរបស់យើង ហាត់បានតែ ១ ពេល ខណៈក្រុមគេផ្សេងទៀត ហាត់បានដល់ទៅ ២ ពេល ក្នុង ១ ថ្ងៃ ហើយរដូវកាលនេះ មានការផ្ទុះឡើងនូវជំងឺកូវីដ ១៩ ទៅទៀត អ៊ីចឹងធ្វើឱ្យការហ្វឹកហាត់របស់យើងអត់បានពេញ គឺមានផលវិបាកសម្រាប់យើង»។
យ៉ាងណាក៏ដោយ លោក សុក វាសនា បានបន្ថែមថា៖ «យើងតែងតែទទួលបានលទ្ធផលមិនសូវល្អសម្រាប់ការជួបក្រុមទ័ពកន្លងមក អ៊ីចឹងការជួបគ្នាលើកនេះ យើងត្រូវតែខំប្រឹងប្រែងលេងឱ្យបាន ៩០ នាទីពេញ ដើម្បីយើងអាចទទួលបានពិន្ទុខ្លះ មកក្នុងដៃវិញ។ យើងនឹងលេងបែបការពារ រួចវាយបកទៅតាមស្ថានភាពជាក់ស្តែង គឺធ្វើយ៉ាងណា ដណ្តើមឱ្យបានពិន្ទុ ទោះបាន ១ ពិន្ទុក៏យើងយកដែរ»។
តាមប្រវត្តិជួបគ្នាចំនួន ៣ រដូវកាលចុងក្រោយ កន្លងមកនេះ ក្រុមអាស៊ីអឺរ៉ុបបានឈ្នះក្រុមទ័ព តែ ១ លើកគត់ និងបានចាញ់ដល់ ៤ លើក គឺពួកគេបានចាញ់ ២-១ និង ៣-១ កាលពីឆ្នាំ ២០១៨ រួចបានបន្តចាញ់ ៤-១ និងឈ្នះវិញ ២-១ សម្រាប់ការជួបគ្នាទាំង ២ ជើង កាលពីឆ្នាំ ២០១៩ ចំណែកការជួបគ្នាត្រឹម ១ លើក នាការប្រកួតលីគកំពូលកាលពីឆ្នាំ ២០២០ ក្រុមអាស៊ីអឺរ៉ុបបានចាញ់ក្រុមម្ចាស់ផ្ទះ ទ័ព ២-០ នៅកីឡដ្ឋានស្តាតចាស់។
យ៉ាងណាមិញ សម្រាប់ការបង្ហាញខ្លួនចំនួន ១ លើកដូចគ្នានៅរដូវកាលថ្មី ឆ្នាំ ២០២១ នេះ ក្រុមអាស៊ីអឺរ៉ុប បានចាញ់ក្រុមម្ចាស់ផ្ទះគិរីវង់សុខសែនជ័យ ៤-២ រីឯក្រុមទ័ព បានស្មើ ០-០ ជាមួយក្រុមវិសាខា ដែលបង្ហាញបានថា ក្រុមទ័ព នៅតែមានទម្រង់លេងល្អ។ ចំណែកការជួបក្រុមអាស៊ីអឺរ៉ុបលើកនេះ មន្ត្រីព័ត៌មានរបស់ក្រុមទ័ពបានប្រាប់ថា ក្រុមទ័ព ត្រៀមខ្លួនបានល្អសម្រាប់ជំនួបនេះ ព្រោះពួកគេត្រូវបានដាក់ឱ្យរស់នៅជុំគ្នា នៅស្តាតចាស់ តែហ្វឹកហាត់នៅទីលានជើងទឹក ដ្បិតអីកីឡដ្ឋានស្តាតចាស់ ពេលនេះ កំពុងជួសជុល។
ដោយឡែកថ្នាក់ដឹកនាំ បុគ្គលិក គ្រូបង្វឹក និងកីឡាករទាំងអស់របស់ក្លិបវិសាខាសរុបចំនួន ១៦៦ នាក់ ដែលបានធ្វើចត្តាឡីស័ក តាមគោលការណ៍របស់ក្រសួងសុខាភិបាលតាំងពីថ្ងៃទី ៨ ខែមីនា មកនោះ គឺបានធ្វើសំណាកជាលើកទី២ ហើយ ដោយទទួលបានលទ្ធផលអវិជ្ជមានជំងឺកូវីដ ១៩ ទាំងអស់។
ក្លិបវិសាខាបានបញ្ជាក់ តាមសេចក្តីជូនដំណឹងរបស់ខ្លួនថា៖ «ជាលទ្ធផល ដោយមន្ទីរពិសោធន៍នៃក្រសួងសុខាភិបាលនៅថ្ងៃទី ២២ ខែ មីនា ឆ្នាំ ២០២១ បានបញ្ជាក់ថា ការធ្វើតេស្តសំណាកលើកទី២ គឺអវិជ្ជមានទាំងចំនួន ១៦៦ នាក់ ដែលមានន័យថា ក្រោយធ្វើតេស្តសំណាកចំនួន ២ លើក និងការធ្វើចត្តាឡីស័ក រយៈពេល ១៤ ថ្ងៃ ថ្នាក់ដឹកនាំ បុគ្គលិក គ្រូបង្វឹក និងកីឡាករទាំងអស់របស់យើង គឺមិនមានករណីឆ្លងជំងឺដ៏កាចសាហាវនេះឡើយ»៕
