ធី វ៉ារិទ្ធ (រាប់ពីឆ្វេង) តាញ់ មករា, អេលីត សាន់ និង ឡុង ជិន។ រូប សហការី
ភ្នំពេញ៖ កីឡាករ អេលីត សាន់ ដែលធ្លាប់ឈ្នះប្រាក់លាន ២ លើកមកហើយនោះ ត្រូវបានសង្វៀនថោន ផ្គូផ្គងឱ្យឡើងប្រកួតម៉ារ៉ាតុងដណ្តើមប្រាក់លានជាថ្មីនៅថ្ងៃអាទិត្យនេះ ហើយក៏ជាពេលដែលរូបគេ ត្រូវប្រឈមជាមួយជើងខ្លាំង តាញ់ មករា និង ឡុង ជិន ដែលធ្លាប់ធ្វើឱ្យរូបគេចាញ់យ៉ាងគ្រាំគ្រាផងដែរ ចំណែកបេក្ខភាពម្នាក់ទៀត គឺ ធី វ៉ារិទ្ធ ដែលត្រូវបានដាក់ជំនួសការដកខ្លួនរបស់ ម៉ឺន មេឃា។
សម្រាប់ការប្រកួតលើកនេះ អេលីត សាន់ បានមើលឃើញថា នឹងជួបឧបសគ្គធំ តែរូបគេនៅតែរំពឹងឈ្នះខ្ពស់។ សាន់ បាននិយាយថា៖ «ការប្រកួតលើកនេះ ពិតជាលំបាកឈ្នះណាស់ព្រោះខ្ញុំធ្លាប់ចាញ់ តាញ់ មករា ចាញ់ ឡុង ជិន និងមិនធ្លាប់ប៉ះ ធី វ៉ារិទ្ធ នោះទេ។ តែទោះបីជាយ៉ាងណា ខ្ញុំសង្ឃឹមឈ្នះខ្ពស់ ព្រោះហាត់បានល្អ និងសម្រេចចិត្តចូលវ៉ៃសម្រុកគ្មានញញើតនោះឡើយ គឺខ្ញុំដឹងតែចូលវ៉ៃឱ្យអស់ពីសមត្ថភាព ហើយបើវ៉ៃគេមិនសន្លប់ ខ្ញុំសន្លប់វិញ ក៏មិនដឹងដែរ ដ្បិតអីខ្ញុំមិនមែនឡើងរាំទេ»។
ជាមួយគ្នានេះ លោក ស៊ន អេលីត ជាគ្រូបង្វឹកបានស្នើឱ្យគណៈកម្មការរបស់សហព័ន្ធកីឡាប្រដាល់គុនខ្មែរកាត់សេចក្តីឱ្យបានសុក្រឹត ព្រោះកន្លងមកកូនសិស្សរបស់លោកមួយចំនួនចាញ់ទាំងអយុត្តិធម៌។
លោក ស៊ន អេលីត បានប្រាប់ថា៖ «អេលីត សាន់ ធ្លាប់ឈ្នះប្រាក់រង្វាន់ពីកម្មវិធីនេះ ២ លើកហើយ ប៉ុន្តែមិនធ្លាប់ឈ្នះជើងខ្លាំង តាញ់ មករា និង ឡុង ជិន នេះទេ ហើយមួយរយៈចុងក្រោយនេះ សាន់ បានចាញ់ ម៉ឺន មេឃា និង ឃីម បូរ៉ា។ ទោះយ៉ាងណា បញ្ហាប្រកួតចាញ់ឈ្នះជារឿងធម្មតា ប៉ុន្តែការផ្តល់ពិន្ទុ មិនសុក្រឹតរបស់ចៅក្រម និងគណៈកម្មការ ទើបជាបញ្ហាផ្លូវចិត្តរបស់កីឡាករ និងគ្រូបង្វឹក។ កូនសិស្សខ្ញុំភាគច្រើន បើវ៉ៃគេមិនសន្លប់ មិនងាយបានលទ្ធផលឈ្នះឡើយ ដោយសារខ្ញុំមិនចូលចិត្តអែបអបគេ ហើយចៅក្រមខ្លះគេស្អប់ខ្ញុំ ដែលខ្ញុំរិះគន់តាមការពិតជាក់ស្តែង»។
ស៊ន អេលីត បានរិះគន់ចំៗ ដល់មន្ត្រីសហព័ន្ធកីឡាប្រដាល់គុនខ្មែរ ថា៖ «លក្ខខណ្ឌដាក់ពិន័យរបស់សហព័ន្ធស្រាលៗពេក ព្រោះកន្លងមក ចៅក្រមណាផ្តល់ពិន្ទុខុសប្រក្រតី លម្អៀង ឬខុសអ្វីមួយ ត្រូវពិន័យ ១ ខែ ៣ ខែ ឬច្រើនជាងនេះ គឺមិនឱ្យមកធ្វើការ ប៉ុន្តែនៅតែបើកលុយតម្លៃខ្លួនធ្វើការបានដដែល តើធ្វើអ៊ីចឹង ម៉េចនឹងពួកគាត់រាងចាលទៅ»។
ចំណែក ឡុង ជិន និយាយថា៖ «ខ្ញុំមានទំនុកចិត្តឈ្នះ ៨០ ភាគរយ ប៉ុន្តែលំបាកប្រកួតព្រោះប៉ះសុទ្ធតែចិត្តធំដូចគ្នា»។ រីឯ តាញ់ មករា ដែលមិនធ្លាប់ចូលប្រកួតក្នុងកម្មវិធីនេះ បានប្រាប់ថា៖ «ខ្ញុំបារម្ភខ្លាំង ពេលដែលប៉ះ ឡុង ជិន ប៉ុន្តែក្រៅពីនេះដូចជា អេលីត សាន់ ឬ ធី វ៉ារិទ្ធ ខ្ញុំគិតថា មិនលំបាកខ្លាំងនោះឡើយ»។
ចំពោះលោក ធន់ សុភា ជាគ្រូបង្វឹក បាននិយាយថា៖ «ខ្ញុំបារម្ភដែរ ព្រោះសុទ្ធតែកំពូលកីឡាករលំដាប់ល្អ ហើយម្យ៉ាងទៀត តាញ់ មករា បញ្ចុះទម្ងន់ អាចខ្សោយកម្លាំងដែរ។ ទោះយ៉ាងណា ខ្ញុំរំពឹងឈ្នះ ៧០ ភាគរយ»។
ចំណែក ធី វ៉ារិទ្ធ បាននិយាយថា៖ «ខ្ញុំមិនសង្ឃឹមច្រើនទេ ព្រោះខ្ញុំឡើងជំនួស ម៉ឺន មេឃា។ ទោះយ៉ាងណា ខ្ញុំធានាវ៉ៃអស់ពីសមត្ថភាព ហើយពួកគេទាំងនេះទោះជាឈ្នះខ្ញុំក៏លំបាកដែរ មិនអាចស៊ីផុយស្រួយឡើយ»។ តាមកំណត់ត្រាកាលពីសប្តាហ៍មុន ថៃ រ៉េត បានឈ្នះ ធី វ៉ារិទ្ធ ទាំងវេទនាខ្លួន ខណៈដែល វ៉ារិទ្ធ កំពុងឡើងប្រិយភាពខ្លាំងណាស់ នៅក្នុងទម្ងន់ ៦០ គីឡូក្រាមនេះ៕
