កុមាររីករាយក្នុងការទទួលទានអាហារនៅ ផ្ទះបាយកុមារ។ រូបថត យូសុះ អាប់ឌុលរ៉ាស់ហ៊ីម
ភ្នំពេញៈ ក្នុងសម្លៀកបំពាក់ខុសគ្នា ខ្លះស្លៀកឯកសណ្ឋានសិស្ស និងខ្លះទៀតស្លៀកខោអាវប្រឡាក់ដីស្រមកមកពីរើសកំប៉ុង ឬដើរសុំទានតាមដងផ្លូវ កុមារប្រុសស្រីត្រូវបានរ៉ឺម៉កម៉ូតូ ដឹកមកកាន់អគារចាស់ ដើម្បីទទួលទានបាយម្ហូបដោយឥតគិតថ្លៃ។
ស្ថិតនៅអង្គការផ្ទះបាយកុមារដែលមានក្តារខៀនពណ៌សសរសេរពីឈ្មោះម្ចាស់ជំនួយ កុមារនាំគ្នាកាន់ចានម្នាក់មួយតម្រង់ជួរចាំចុងភៅបំពេញអាហារក្នុងចានមុននឹងរកកន្លែងគួរសមអង្គុយជុំគ្នា ដើម្បីចម្អែតក្រពះ និងជជែកគ្នាយ៉ាងរីករាយ។
បុរសសក់ស ពាក់វ៉ែនតា ស្បែកជ្រីវជ្រួញ ជាប្រធានអង្គការផ្ទះបាយកុមារ លោក ង៉ូវ ឈីវ វ័យ ៧២ ឆ្នាំបាននិយាយប្រាប់ ភ្នំពេញ ប៉ុស្តិ៍ ថា៖ «អង្គការផ្ទះបាយកុមារបានបង្កើតឡើងតាំងពីឆ្នាំ ២០១០ ខែកុម្ភៈនៅថ្ងៃទី ១ ដោយបានបង្កើតឡើងក្នុងគោលបំណង ដើម្បីឲ្យកុមារដែលហូបមិនឆ្អែត កុមារសុំទាន កុមារដែលរកស៊ីចិញ្ចឹមគ្រួសារ និងគ្មានទីពឹងឲ្យគាត់បានហូបឆ្អែត មានសុខភាពធម្មតាដូចកុមារដទៃ»។
លោក ង៉ូវ ឈីវ (ស្ដាំទី ២) នាយកអង្គការផ្ទះបាយកុមារ។ រូបថត យូសុះ អាប់ឌុលរ៉ាស់ហ៊ីម
ក្រៅពីជាកន្លែងផ្ដល់អាហារឥតគិតថ្លៃ ទីធ្លាតូចល្មមរបស់អង្គការក៏ជាកន្លែងលេងកម្សាន្ត ផ្ដល់ការងូតទឹកសម្អាតខ្លួនប្រាណ ផ្លាស់សម្លៀកបំពាក់ថ្មី កាត់ក្រចក កាត់សក់ ពិនិត្យសុខភាពក្នុង ១ ខែ ៤ ដង និងឱកាសទទួលបានចំណេះដឹងខ្ពង់ខ្ពស់ទៀតផង។ អង្គការផ្ទះបាយកុមារ មិនត្រឹមតែជាកន្លែងផ្តល់អាហារពេលព្រឹក និងថ្ងៃត្រង់សម្រាប់ក្មេងៗក្រីក្ររស់នៅតាមសំណង់អនាធិបតេយ្យប៉ុណ្ណោះទេ ថែមទាំងផ្តល់សិទ្ធិឲ្យកុមារទុរគតដូចជាក្មេងដទៃ។
ពួកគេក៏អាចមានសិទ្ធិក្នុងការលេងបានអាន បានសរសេរ បានជជែកគ្នា ងូតទឹកសម្អាតកាយ ប្តូរសម្លៀកបំពាក់ថ្មី កាត់សក់ កាត់ក្រចក ពិនិត្យសុខភាពក្នុង ១ ខែ ៤ ដង និងឱកាសទទួលបានចំណេះដឹងខ្ពង់ខ្ពស់ទៀតផង។
អតីតនាយករងសាលាបឋមសិក្សាជ័យជម្នះរូបនេះត្រូវបានសប្បុរសជន Yves Jacquin Depeyre ដែលធ្វើការនៅអង្គការបារាំង Enfants d''Asie-ASPECA បានបបួលលោកថា៖ «កុំនៅទំនេរអី នៅជួយដាំបាយកុមាររើសអេតចាយហូបទៅ»។
លោក ង៉ូវ ឈីវ លើកឡើងថា៖ «ព្រោះគាត់ (Depeyre) មានមនោសញ្ចេតនាជាមួយក្មេងរើសអេតចាយខ្លាំងណាស់ អ៊ីចឹងហើយខ្ញុំក៏បានចាប់ផ្តើមធ្វើជាមួយគាត់ ដែលដំបូងឡើងគាត់គឺជាអ្នករ៉ាប់រងលើថ្លៃចំណាយទាំងអស់»។
អ្នកស្ម័គ្រចិត្តជួយងូតទឹកសម្អាតកាយកុមារ។ រូបថត យូសុះ អាប់ឌុលរ៉ាស់ហ៊ីម
ក្រោយពីបង្កើតផ្ទះបាយកុមារ អង្គការបានទាក់ទាញការឧបត្ថម្ភពីប្រទេសអ៊ីតាលី បារាំង ស្វ៊ីស បែលហ្ស៊ិក និងអំណោយពីប្រជាជនកម្ពុជាដោយបានជួយជាសាច់ បន្លែ សម្ភារផ្ទះបាយ និងគ្រឿងទេសផ្សេងៗ។ សាច់មាន់ ឬសាច់ជ្រូកមានការឧបត្ថម្ភពីក្រុមហ៊ុន CP ក្នុង ១ អាទិត្យចំនួន ៦៥ គីឡូក្រាម។ នំប៉័ង ឬនំខេក ជាអំណោយពីហាងនំប៉័ង TSL សម្រាប់ជាអាហារសម្រាប់ឲ្យកុមារដែលអាចខ្ចប់យកទៅផ្ទះបាន។ ក្នុង ១ ថ្ងៃផ្ទះបាយកុមារត្រូវចំណាយប្រាក់ចំនួន ២៥០ ដុល្លារ។
គោលការណ៍ដំបូងរបស់អង្គការគឺផ្តល់អាហារ ២ ពេលសម្រាប់កុមារក្នុង ១ ថ្ងៃ ដែលមានអាហារពេលព្រឹក និងថ្ងៃត្រង់ និងទទួលតែកុមារអាយុចាប់ពី ៦ ឆ្នាំដល់ ១៤ ឆ្នាំ។
ប៉ុន្តែដោយលោក ង៉ូវ ឈីវ សង្កេតឃើញថាកុមារបានមកបរិភោគអាហារនៅផ្ទះបាយកុមារ តែងតែនឹកឃើញដល់ប្អូនៗដែលមិនមានអីទទួលទាននៅឯផ្ទះ លោកក៏សម្រេចចិត្តទទួលទាំងកុមារតូចៗរហូតជួយទៅដល់ទារកដោយផ្តល់ជាម្សៅទឹកដោះគោសម្រាប់ម្ដាយដែលមិនអាចបំបៅកូនបាន។
ផ្ទះបាយកុមារមានកន្លែងផ្ដល់ការកម្សាន្តដល់កុមារ។ រូបថត យូសុះ អាប់ឌុលរ៉ាស់ហ៊ីម
ក្នុង ១ ថ្ងៃ ផ្ទះបាយកុមារ ទទួលបានក្មេងៗមកបរិភោគអាហារចាប់ពី ២៥០ ទៅ ៣៥០ នាក់។ មកដល់បច្ចុប្បន្ននេះ អង្គការផ្ទះបាយកុមារ មានចំនួន ៧ ទីតាំងដោយនៅទីក្រុងភ្នំពេញចំនួន ៣ កន្លែង ខេត្តកំពង់ស្ពឺ ៣ កន្លែង និងខេត្តកណ្តាល ១ កន្លែង។ អង្គការបានផ្តល់អាហារដល់កុមារចំនួន ៦២០០០០ ចាន។
យុវតី ល័ក្ខ សូរីតា វ័យ ១៩ ឆ្នាំជាយុវជនជំនាន់ទី ២ ដែលលោក ង៉ូវ ឈីវ បានបណ្តុះបណ្តាលបានឲ្យដឹងថា៖ «ខ្ញុំបានស្គាល់អង្គការផ្ទះបាយកុមារអស់រយៈពេល ៦ ឆ្នាំមកហើយតាមរយៈមិត្តភក្តិរើសអេតចាយជាមួយគ្នាតាំងពីខ្ញុំអាយុ ១៣ ឆ្នាំ»។
យុវតីធ្លាប់មកទទួលទានអាហារនៅ ផ្ទះបាយកុមារ រូបនេះបានបន្តថា៖ «ភាសាវិញខ្ញុំចេះភាសាអង់គ្លេសស្ទាត់ហើយ ចំណែកភាសាអ៊ីតាលីនៅស្ទើរជាងអង់គ្លេស ហើយគោលបំណងខ្ញុំក្នុងថ្ងៃអនាគតចង់ធ្វើជា Guide (មគ្គុទេសក៍)»។
ស្ថាបនិកអង្គការដែលមានវ័យជ្រេ តែនៅតែបន្តរំលេចស្នាមញញឹមស្វាគមន៍កុមារមកទទួលទានអាហារលោក ង៉ូវ ឈីវ បាននិយាយថា៖ «ខ្ញុំគ្រាន់តែសង្ឃឹមថាថ្ងៃខាងមុខទៅពួកគេទាំងអស់បញ្ចប់ការរស់នៅតាមសួន ដើររើសអេតចាយបានចូលរៀនសូត្រមានការងារល្អធ្វើ។ សូមឲ្យបញ្ចប់អាជីពនេះត្រឹមពួកគេ មិនបន្តដល់កូនចៅគេទៀត បើទោះបីជាលែងមានខ្ញុំរស់នៅ»៕
រ៉ឺម៉កម៉ូតូដឹកកុមារមកទទួលទានអាហារនៅអង្គការ។ រូបថត យូសុះ អាប់ឌុលរ៉ាស់ហ៊ីម
វីដេអូ៖
