បន្ទាប់ពីបានចុះបញ្ជីលក់មូលបត្រជាផ្លូវការនៅក្រុមហ៊ុនផ្សារមូលបត្រកម្ពុជា (ផមក) ដោយជោគជ័យ តើបុគ្គលចុះបញ្ជីលក់មូលបត្រត្រូវអនុវត្តកាតព្វកិច្ចអ្វីខ្លះ?
បន្ទាប់ពីបានចុះបញ្ជីលក់មូលបត្រជាផ្លូវការនៅ ផមក ដោយជោគជ័យបុគ្គលចុះបញ្ជីលក់មូលបត្រមានកាតព្វកិច្ចក្នុងការបង្ហាញព័ត៌មានសាជីវកម្មរបស់ខ្លួនជូនវិនិយោគិន ដើម្បីធានាបាននូវប្រសិទ្ធភាព តម្លាភាព គណនេយ្យភាព នៅក្នុងទីផ្សារនិងជាពិសេសធានានូវកិច្ចគាំពារវិនិយោគិនសាធារណៈ តាមរយៈការធ្វើសេចក្តីសម្រេចចិត្តវិនិយោគរបស់ពួកគេឱ្យបានត្រឹមត្រូវ និងទាន់ពេល។
តើអ្វីទៅជាព័ត៌មានសាជីវកម្ម? តើព័ត៌មានអ្វីខ្លះដែលចាត់ទុកជាព័ត៌មានសាជីវកម្ម?
ព័ត៌មានសាជីវកម្ម សំដៅដល់ឯកសារផ្តល់ព័ត៌មានជាប្រចាំ ដែលពណ៌នាអំពីព្រឹត្តិការណ៍ដែលកើតឡើងនៅពេលណាមួយ នៃអាយុកាលរបស់បុគ្គលចុះបញ្ជីលក់មូលបត្រ ដែលរួមមាន ព័ត៌មានទាន់ពេល របាយការណ៍សាមាយិក ព័ត៌មានពិសេស និងព័ត៌មានតាមការស្នើសុំ។ការបង្ហាញព័ត៌មានសាជីវកម្មនេះ ត្រូវធានាឱ្យបាននូវភាពត្រឹមត្រូវ ពេញលេញ ច្បាស់លាស់ និងទាន់ពេល។
ព័ត៌មានទាន់ពេល សំដៅដល់ព័ត៌មានទាំងឡាយណា ដែលអាចមានផលប៉ះពាល់ដល់ថ្លៃ ឬការជួញដូរមូលបត្ររបស់បុគ្គលចុះបញ្ជីលក់មូលបត្រ ហើយនៅពេលដែលព័ត៌មានទាំងនោះ កើតមានឡើង បុគ្គលចុះបញ្ជីលក់មូលបត្រត្រូវធ្វើការបង្ហាញ ព័ត៌មាននោះភ្លាម។ ព័ត៌មានទាន់ពេលនេះ គឺមានសារៈសំខាន់ណាស់សម្រាប់វិយោគិន ដើម្បីធ្វើការសម្រេចចិត្តទិញ ឬលក់ភាគហ៊ុនរបស់ក្រុមហ៊ុននោះ ដូចនេះ បុគ្គលចុះបញ្ជីលក់មូលបត្រ ត្រូវធ្វើការផ្សព្វផ្សាយភ្លាមៗនៅលើគេហទំព័រ ផមក ក្នុងករណីមានព្រឹត្តិការណ៍ណាមួយកើតឡើងទាក់ទងនឹងព័ត៌មានទាន់ពេលនេះ។
របាយការណ៍សាមាយិក សំដៅដល់របាយការណ៍ ដែលត្រូវបានរៀបចំ សម្រាប់រយៈពេលនៃការរាយការណ៍ជាក់លាក់ណាមួយ រួមមាន របាយការណ៍ប្រចាំត្រីមាស និងប្រចាំឆ្នាំ។របាយការណ៍សាមាយិកមានសារៈសំខាន់សម្រាប់វិនិយោគិនក្នុងការពិនិត្យ និងតាមដានប្រតិបត្តិការអាជីវកម្ម និងស្ថានភាពសុខភាពហិរញ្ញវត្ថុរបស់បុគ្គលចុះបញ្ជីលក់មូលបត្រ តួយ៉ាង ប្រាក់ចំណូល ប្រាក់ចំណេញ/ខាត មានការកើនឡើង ឬថយចុះ ធៀបនឹងឆ្នាំកន្លងទៅជាដើម។
ព័ត៌មានពិសេស សំដៅដល់ព័ត៌មានទាំងឡាយណា ដែលមានផលប៉ះពាល់ដល់រចនាសម្ព័ន្ធមួយផ្នែក ឬទាំងស្រុងរបស់បុគ្គលចុះបញ្ជីលក់មូលបត្រ រួមមាន ព័ត៌មានពាក់ព័ន្ធនឹងការទិញមូលបត្រកម្មសិទ្ធិមកវិញ ការរំលាយក្រុមហ៊ុនបញ្ចូលគ្នា និងការទិញយក ការទទួលកាន់កាប់បន្ត និងសំណើទិញធែនឌ័រ (Tender offer)។
ព័ត៌មានតាមការស្នើសុំ សំដៅដល់ព័ត៌មានដែលស្នើសុំដោយ ន.ម.ក. ឬ ផមក ក្នុងករណីមានពាក្យចចាមអារ៉ាម ដំណឹង ឬព័ត៌មាន ដែលអាចធ្វើឱ្យមានការប៉ះពាល់ដល់បុគ្គលចុះបញ្ជីលក់មូលបត្រ ឬថ្លៃមូលបត្រ និងករណីមានការប្រែប្រួលថ្លៃ ឬទំហំជួញដូរមិនប្រក្រតីនៃមូលបត្រ ព្រមទាំង ព្រឹត្តិការណ៍ ដែលអាចមានផលប៉ះពាល់ ដល់ផលប្រយោជន៍វិនិយោគិន។
ព័ត៌មានតាមការស្ម័គ្រចិត្ត សំដៅដល់ប្រភេទព័ត៌មានក្រៅពីព័ត៌មានសាជីវកម្ម ដូចមានកំណត់ខាងលើ។បុគ្គលចុះបញ្ជីលក់មូលបត្រអាចស្នើសុំបង្ហាញព័ត៌មានពាក់ព័ន្ធនឹងប្រតិបត្តិការធុរកិច្ចសំខាន់ៗ ឬព័ត៌មានទាំងឡាយណា ដែលផ្តល់ផលល្អដល់កេរ្តិ៍ឈ្មោះរបស់បុគ្គលចុះបញ្ជីលក់មូលបត្រ ដូចជា ការទទួលបានពានរង្វាន់ និងអនុលោមភាពពន្ធដារ។ ផមក អាចបដិសេធការស្នើសុំបង្ហាញព័ត៌មានរបស់បុគ្គលចុះបញ្ជីលក់មូលបត្រ ក្នុងករណីព័ត៌មាននោះ មិនមានភាពចាំបាច់។
តើបុគ្គលចុះបញ្ជីលក់មូលបត្រត្រូវបង្ហាញព័ត៌មានសាជីវកម្មដោយរបៀបណា?
បុគ្គលចុះបញ្ជីលក់មូលបត្រ ត្រូវផ្តល់ព័ត៌មានទាន់ពេល ព័ត៌មានតាមការស្នើសុំ និងព័ត៌មានតាមការស្ម័គ្រចិត្ត ជូន ផមក តាមរយៈប្រព័ន្ធ E-Disclosure និងចម្លងជូន ន.ម.ក. ក្នុងពេលដំណាលគ្នា។ ដោយឡែកបុគ្គលចុះបញ្ជីលក់មូលបត្រ ត្រូវផ្តល់របាយការណ៍សាមាយិក ព័ត៌មានពិសេស ព័ត៌មានតាមការស្នើសុំ ជូន ន.ម.ក. តាមរយៈសារអេឡិចត្រូនិក disclosure@serc.gov.kh និងតាមលិខិតជាលាយលក្ខណ៍អក្សរជូន ន.ម.ក. ដើម្បីស្នើសុំសេចក្តីសម្រេចជាមុន។ ព័ត៌មានសាជីវកម្មទាំងអស់នេះ នឹងត្រូវផ្សព្វផ្សាយនៅលើគេហទំព័ររបស់ ផមក និងបុគ្គលចុះបញ្ជីលក់មូលបត្រ៕
យោង៖ ប្រកាសលេខ ០០៧/១៨ គ.ម.ក./ប្រ.ក. ចុះថ្ងៃទី ៣០ ខែតុលា ឆ្នាំ ២០១៨ ស្ដីពីការបង្ហាញព័ត៌មានសាជីវកម្ម។
រៀបចំដោយ៖ និយ័តករមូលបត្រកម្ពុជា
នាយកដ្ឋានគ្រប់គ្រងការបោះផ្សាយលក់មូលបត្រ
អ៊ីមែល៖ disclosure@serc.gov.kh / ទូរស័ព្ទ៖ ០៩៣ ៨៣៧ ៣៤៥
