ក្មេងប្រុស ដែលត្រូវបានចុះឈ្មោះធ្វើការវះកាត់តស្លឹកត្រចៀក។ ហេង ជីវ័ន
ភ្នំពេញ: លោក វេង ចិត ជាឪពុករបស់ វេង ជីម៉េង ប្រឈមនឹងការលំបាក ខណៈកូនប្រុសកើតអាការត្រចៀករួមតូច ឬមីក្រូធា (Microtia)។ នៅពេលដែលវិបត្តិកូវីដ ១៩ បានរំខានឱកាសនៃការវះកាត់កែត្រចៀករបស់កូន លោក ចិត ពិចារណាធ្វើដំណើរទៅប្រទេសថៃតាមសំណើរបស់កូន។
ទោះជាយ៉ាងណាក៏ការចំណាយខ្ពស់បានរារាំងទឹកចិត្ដឪពុករូបនេះ ដោយបានត្រឹមតែវេចបង្វេចត្រឡប់មកផ្ទះវិញ។ មិនយូរប៉ុន្មាន លោកបានឮដំណឹងថា អង្គការស្នាមញញឹមកម្ពុជា (Smile Cambodia) បានផ្សព្វផ្សាយអំពីការចុះបេសកកម្មក្រុមគ្រូពេទ្យមកពីអាមេរិក លោក ចិត ក៏បានធ្វើការទាក់ទងម្ដងទៀត។ កាលពីឆ្នាំ២០២២ ការវះកាត់លើកដំបូង ត្រូវបានធ្វើឡើងនៅមន្ទីរពេទ្យមិត្ដភាពខ្មែរ-សូវៀត បុរសជាឪពុករូបនេះបានបង្ហាញពីអារម្មណ៍រំភើបរីករាយលាយឡំនឹងទឹកភ្នែកស្រក់ នៅពេលវេជ្ជបណ្ឌិតបានហៅលោកមកមើលត្រចៀករបស់កូន។
លោកបានរំឭកថា៖ «ខ្ញុំនិងប្រពន្ធក៏សែនសប្បាយចិត្ដ ស្រក់ទឹកភ្នែក។ អរគុណដល់លោកគ្រូ អ្នកគ្រូពេទ្យ និងអង្គការ ដោយសារយើងខ្ញុំអាណិតកូនពេក ពេលមុនៗ មានគេហៅកូនខ្ញុំអាអត់ស្លឹកត្រចៀក និងចោមរោមមើលគាត់ ដែលធ្វើឱ្យគាត់ខ្មាសគេ»។
ដោយមានស្ថានភាពស្រដៀងគ្នា អ្នកស្រី មាស រំដួល ជាម្ដាយរបស់យុវតី រៀល សុដាលីស និង រៀល សុខេមា បានរំឭកអំពីការប្រសូត្រកូន ដែលមានអាការ Microtia ថា អ្នកស្រី មានការភ្ញាក់ផ្អើល និងតក់ស្លុតយ៉ាងខ្លាំង ដោយសារអ្នកស្រីមិនធ្លាប់ជួបប្រទះ រួមទាំង ក្រុមគ្រួសារសាច់ញាតិមិនមានអាការបែបនេះឡើយ។
អ្នកស្រី បាននិយាយថា៖ «មានកូនបែបនេះ ខ្ញុំកើតទុក្ខ ខ្ញុំយំ និងបង្ខាំងខ្លួនឯងនៅក្នុងផ្ទះជាមួយកូនស្រីរយៈពេលមួយឆ្នាំ។ ខ្ញុំមិនអស់សង្ឃឹមទេ ខ្ញុំចង់បានកូនមួយទៀត ហើយរយៈពេល ៣-៤ ឆ្នាំក្រោយ ខ្ញុំនិងប្ដីទៅពិនិត្យសុខភាពដើម្បីត្រៀមយកកូនមួយទៀត»។
ជាអកុសល កូនក្រោយនេះ ក៏មានអាការ Microtia ដូចគ្នា។ យ៉ាងណាមិញ វាមិនបានធ្វើឱ្យអ្នកស្រី រំដួល បាក់ទឹកចិត្ដនោះទេ តែវាធ្វើឱ្យអ្នកម្ដាយរូបនេះ កាន់តែរឹងមាំផ្លូវចិត្ដ។
អ្នកស្រី ទទួលស្គាល់ថា អ្នកស្រី មានការបារម្ភខ្លាំងមិនថា កូនស្រីទាំង ២ របស់អ្នកស្រីអាចរៀនបាន និងទទួលខុសត្រូវក្នុងជីវិតរបស់ពួកគេដោយរបៀបណានោះទេ។ អ្នកស្រីរំដួលថា៖ «ប៉ុន្ដែរហូតដល់ពេលនេះ យើងមានក្ដីសង្ឃឹម យើងមានស្នាមញញឹម បានជួបក្រុមវេជ្ជបណ្ឌិត ដែលជួយឱ្យពួកយើងមានស្នាមញញឹមទាំងនេះ។ កូនស្រីបងពេលនេះបានរៀនថ្នាក់ទី ១២ និងកូនស្រីប្អូនបានរៀនថ្នាក់ទី ៧ ហើយ។ អរគុណដល់ក្រុមគ្រួសារស្ម័គ្រចិត្ដទាំងអស់ និងអង្គការស្នាមញញឹមកម្ពុជា»។
កញ្ញា រៀល សុដាលីស អាយុ ១៧ ឆ្នាំ រៀនថ្នាក់ទី ១២ ដែលធ្លាប់និយាយពាក្យមិនពេញចិត្ដចំពោះរូបរាងខ្លួនឯង បានឱ្យដឹងថា កញ្ញាមានជំនឿចិត្ដជាងមុន នៅពេលទទួលបានត្រចៀកថ្មីមួយក្រោយការវះកាត់លើកទីមួយ។ កញ្ញានិយាយថា៖«ខ្ញុំមានអំណរគុណណាស់ដែលឥឡូវនេះខ្ញុំអាចមានអារម្មណ៍ធម្មតា។ ម្តាយរបស់ខ្ញុំបានព្យាយាមយ៉ាងខ្លាំងក្នុងការស្វែងរកគ្លីនិកដែលអាចដោះស្រាយបញ្ហារបស់ខ្ញុំបាន។ ពេលឮថា Smile Cambodia រៀបចំកម្មវិធីមិនគិតថ្លៃសម្រាប់អ្នកដែលមាន Microtia ខ្ញុំមានឱកាសបានត្រចៀកមួយទៀត»។
តាំងពីមានត្រចៀក ២ មកកញ្ញាមានអារម្មណ៍ផាសុកភាព ជំនឿចិត្ដ ក្លាហាន ដោយកញ្ញាថ្លែងអំណរគុណដល់ក្រុមគ្រូពេទ្យនិងអង្គការដែលផ្ដល់ក្ដីសង្ឃឹម និងស្នាមញញឹមដល់កញ្ញា រួមទាំងប្អូនស្រី។
សាស្ដ្រាចារ្យ ម៉ក់ ធាវី មកពីក្រសួងសុខាភិបាលថ្លែងថា នេះជាគ្រួសារអង្គការស្នាមញញឹមកម្ពុជា ដែលមានក្រុមប្រឹក្សាភិបាល ដែលដឹកនាំដោយលោកស្រី ពេជ្រ ច័ន្ទមុន្នីភរិយាលោកនាយករដ្ឋមន្ត្រីហ៊ុន ម៉ាណែត។ «ការរៀបចំកម្មវិធីនេះបានបង្ហាញពីភាពស្និទ្ធស្នាលរវាងបងប្អូនទាំងអស់ ដែលទទួលការព្យាបាលនៅអង្គការស្នាមញញឹមកម្ពុជា ដែលលោកជំទាវខិតខំកសាងមជ្ឈមណ្ឌលស្នាមញញឹមកម្ពុជានៅមន្ទីរពេទ្យមិត្ដភាពខ្មែរ-សូវៀត។ យើងបង្កើតទំនាក់ទំនងជាមួយអង្គការអន្ដរជាតិផ្សេងៗ»។
បេសកកម្មថ្មីដើម្បីនាំមកនូវក្តីសង្ឃឹម និងទំនុកចិត្ត
Smile Cambodia គាំទ្រដោយអ្នកស្ម័គ្រចិត្តផ្នែកវេជ្ជសាស្ដ្រមកពី North West Medical Volunteers (NWMV) សហរដ្ឋអាមេរិក និងមូលនិធិ Standish សហរដ្ឋអាមេរិក ប្រកាសធ្វើការវះកាត់អ្នកជំងឺ Microtia រួមទាំងបញ្ហាមាត់ឆែបដោយឥតគិតថ្លៃ នៅមន្ទីរពេទ្យមិត្តភាពខ្មែរ-សូវៀត ចាប់ពីថ្ងៃទី ៧ ដល់ ១២ ខែមករា ឆ្នាំ ២០២៤។
លោកចាន់ កុកឆយ ហៅ (ខេស៊ី ចាន់) អគ្គនាយករងអង្គការ Smile Cambodia បានឱ្យដឹងថា៖«ក្រុមអ្នកស្ម័គ្រចិត្តមានសមាជិក ៣១ នាក់ របស់ NWMV រួមមាន គ្រូពេទ្យវះកាត់ដែលមានបទពិសោធន៍និងមានសមត្ថភាពខ្ពស់ចំនួន ១២ នាក់ គ្រូពេទ្យវះកាត់កែសម្ជស្ស ៤ នាក់ អ្នកឯកទេសជីវិតកុមារ ២ នាក់ គ្រូពេទ្យកុមារ និងគិលានុបដ្ឋាយិកាជាដើម»។ លោកប្រាប់ភ្នំពេញប៉ុស្ដិ៍ថា៖«យើងផ្តល់អាទិភាពដល់អ្នកជំងឺ Microtia ជាចម្បងដោយសារក្រុមគ្រូពេទ្យមកពីសហរដ្ឋអាមេរិកធ្វើដំណើរមកកម្ពុជាតែម្តងក្នុងមួយឆ្នាំ។ យើងនៅតែសង្ឃឹមថា នឹងព្យាបាលអ្នកជំងឺ Microtia ចំនួន ៥០ នាក់ និងមាត់ឆែប ២០ នាក់ក្នុងឱកាសប៉ុន្មានថ្ងៃនេះ»។
North West Medical Volunteers (NWMV) សហរដ្ឋអាមេរិក គឺជាអង្គការស្ម័គ្រចិត្តមិនរកប្រាក់ចំណេញ ដែលផ្តល់ការថែទាំសុខភាពអន្តរជាតិដល់អ្នកជំងឺដែលមានការខូចទ្រង់ទ្រាយមុខពីកំណើត របួស ឬក្រោយមហារីក។ នៅក្នុងកម្មវិធីជួបជុំគ្រួសារដែលធ្វើឡើងនៅថ្ងៃទី ៦ ខែមករា នៅភោជនីយដ្ឋានទន្លេបាសាក់ លោក ខេស៊ី ចាន់ បាននិយាយថា ព្រឹត្តិការណ៍នេះអនុញ្ញាតឱ្យអ្នកមានបញ្ហាត្រចៀករួមតូចអាចប្រាស្រ័យទាក់ទងគ្នាទៅវិញទៅមក និងក្រុមគ្រួសាររបស់ពួកគេផងដែរ។
លោកបានឱ្យដឹងថា៖«ក្នុងនាមអង្គការ Smile Cambodia យើងមានអំណរគុណក្នុងការរៀបចំព្រឹត្តិការណ៍បែបនេះ ដែលគាំទ្រដោយមូលនិធិ Standish ដើម្បីជួយប្រជាជនកម្ពុជា ឱ្យទទួលបានការវះកាត់ Microtia ដោយមិនគិតថ្លៃ»។ ក្រុមវេជ្ជបណ្ឌិតស្ម័គ្រចិត្ដនឹងធ្វើការជាមួយក៏ដូចជាគាំទ្រដោយអ្នកស្ម័គ្រចិត្តពេទ្យក្នុងស្រុក។
ពួកគេមួយចំនួនបានចូលរួមធ្វើការវះកាត់អ្នកជំងឺបញ្ហាត្រចៀករួមតូចនេះ តាំងពីឆ្នាំ ២០០៦ ហើយបានបំពេញបេសកកម្មវះកាត់ចំនួន ១២ ដងក្រោមអង្គការ Operation Smile Cambodia ក្រោយមកប្ដូរទៅជា Smile Cambodia។ មកដល់បច្ចុប្បន្នពួកគេបានធ្វើការវះកាត់ត្រចៀកចំនួន ២៨៦ នាក់។
លោកវេជ្ជបណ្ឌិត នូ សារុំ អ្នកជំនាញផ្នែកវះកាត់កែសម្ផស្សនៃមន្ទីរពេទ្យមិត្តភាពខ្មែរ-សូវៀត និងជានាយកអង្គការ Smile Cambodia បានសង្កត់ធ្ងន់លើសារៈសំខាន់នៃការចូលរួមរបស់វេជ្ជបណ្ឌិតអាមេរិក។ វានាំមកនូវក្តីសង្ឃឹម និងស្នាមញញឹមដល់គ្រួសារដែលសាច់ញាតិរបស់ពួកគេមានជំងឺត្រចៀករួមតូច។
លោកបន្ដថា៖«កិច្ចសហការរបស់អង្គការ Smile Cambodia ជាមួយមូលនិធិ Standish នាំឱ្យក្រុមវេជ្ជបណ្ឌិតសហរដ្ឋអាមេរិកផ្តល់ជំនាញដែលអាចប្រៀបធៀបទៅនឹងអ្នកជំងឺកម្ពុជាធ្វើដំណើរទៅសហរដ្ឋអាមេរិកដើម្បីព្យាបាល ដោយសារជំនាញវះកាត់របស់ពួកគេក្នុងវិស័យឯកទេសនេះ»។
ស្វែងយល់ពីអាការត្រចៀករួមតូច (មីក្រូធា)
វេជ្ជបណ្ឌិត Thruong Mai Thy គ្រូពេទ្យឯកទេសខាងរោគត្រចៀកកុមារដែលមានមូលដ្ឋាននៅទីក្រុង Palo Alto រដ្ឋកាលីហ្វ័រនីញ៉ាដោយផ្តោតលើលក្ខខណ្ឌនៃត្រចៀកច្រមុះនិងបំពង់ក (ENT) និយាយថា Microtia គឺជាជំងឺពីកំណើតដែលត្រចៀកខាងក្រៅបានអភិវឌ្ឍតិចតួចខុសប្រក្រតី ឬអត់មានតែម្ដង។
មូលហេតុរបស់វាមិនច្បាស់លាស់ដែលទំនងជាពាក់ព័ន្ធនឹងកត្តាហ្សែននិងបរិស្ថាន។ វាកើតឡើងចំពោះមនុស្សម្នាក់ក្នុងចំណោម១ម៉ឺននាក់ពីកំណើតដែលជាធម្មតាប៉ះពាល់ដល់ត្រចៀកម្ខាងជាញឹកញាប់ខាងស្តាំហើយច្រើនតែកើតមានចំពោះបុរស។
ការព្យាបាលពាក់ព័ន្ធនឹងការបង្កើតត្រចៀកឡើងវិញនិងប្រហែលជាឧបករណ៍ជំនួយការស្តាប់។ ខណៈពេលដែលមូលហេតុភាគច្រើនមិនត្រូវបានដឹងវាមិនជាប់ទាក់ទងនឹងសកម្មភាពរបស់ឪពុកម្តាយអំឡុងពេលមានផ្ទៃពោះនោះទេ។ ទោះបីជាមានបញ្ហាប្រឈមដែលអាចកើតមានក៏ដោយ កុមារដែលមានត្រចៀកខុសប្រក្រតី អាចដឹកនាំជីវិតដែលបំពេញបានហើយឪពុកម្តាយត្រូវបានលើកទឹកចិត្តឱ្យពង្រឹងភាពពិសេសរបស់ពួកគេនិងការគោរពខ្លួនឯង។ វេជ្ជបណ្ឌិត Mai Thy និយាយថា៖«អ្នកមានអាការត្រចៀក Microtia អាចស្ដាប់ឮ តែខ្សោយហើយសរសៃប្រសាទក្នុងត្រចៀកដំណើរការជាធម្មតាគ្រាន់តែសំឡេងមិនអាចចូលបាន»។
ការកាត់ឆ្អឹងជំនីរមកច្នៃជាត្រចៀកថ្មី
ការកាត់ឆ្អឹងជំនីរមកច្នៃជាត្រចៀកថ្មីសម្រាប់អ្នកជំងឺ Microtia ពាក់ព័ន្ធនឹងការប្រើប្រាស់ឆ្អឹងជំនីរផ្ទាល់ខ្លួនរបស់អ្នកជំងឺដែលជាធម្មតាត្រូវប្រើឆ្អឹងជំនីរទី ៦ ទី ៧ និងទី ៨ ដើម្បីបង្កើតទម្រង់ត្រចៀកថ្មី។ អ្នកស្រី Mai Thy ឱ្យដឹងថា៖«បន្ទាប់មកឆ្អឹងខ្ចីនេះត្រូវបានឆ្លាក់ចេញជារាងត្រចៀក រួចដេរភ្ជាប់ជាមួយសាច់ក្បែរត្រចៀក»។
ដំណើរការវះកាត់នេះមានប្រសិទ្ធភាពបំផុត នៅពេលអនុវត្តលើកុមារអាយុពី៨ទៅ១០ឆ្នាំដោយសារឆ្អឹងជំនីររបស់ពួកគេមានការអភិវឌ្ឍល្អជាង។
ជាធម្មតាវាត្រូវការ ២ ដំណាក់កាលដើម្បីបញ្ចប់ការផលិតត្រចៀកថ្មី។ បច្ចេកទេសនេះត្រូវបានគេពេញចិត្តសម្រាប់ការរួមបញ្ចូលជាលិកាធម្មជាតិរបស់វា។ ទោះបីជាដំណើរការវះកាត់ទាំង ២ ត្រូវបានធ្វើដោយជោគជ័យក៏ដោយអ្នកដែលមាន Microtia មិនអាចបង្កើនសមត្ថភាពស្តាប់របស់ពួកគេបានទេ ដោយសារការវះកាត់ពាក់ព័ន្ធនឹងភាពស្រស់ស្អាតខាងក្រៅប៉ុណ្ណោះ។
ស្ថិតក្នុងបញ្ជីរង់ចាំ
ដោយសារតែមានអ្នកចុះឈ្មោះច្រើន រួមទាំងបញ្ហាខ្វះលក្ខខណ្ឌមួយចំនួន អ្នកជំងឺជាច្រើនត្រូវបន្ដរង់ចាំដល់បេសកកម្មបន្ទាប់ៗទៀត។ និយាយមុនពេលវះកាត់កែលម្អទម្រង់ត្រចៀកថ្មី យុវជន យូ លៃវីន ដែលមានអការត្រចៀកខ្ជិបតូចម្ដាង ថ្លែងអំពីអារម្មណ៍ភ័យខ្លាចនិងរំភើបក្រោយខកខានពេលវេលាវះកាត់អំឡុងពេលកូវីដ ១៩។ យុវជន រៀនថ្នាក់ទី ១១ ដែលឪពុកម្ដាយជូនមកពិនិត្យសុខភាពមុនពេលវះកាត់ប្រាប់ភ្នំពេញប៉ុស្ដិ៍ថា៖ «ខ្ញុំឃើញគេធ្វើត្រចៀកស្អាតរួចហើយ ខ្ញុំអត់សូវភ័យនិងមានចិត្ដអន្ទះសាចង់ស្អាតដូចអ្នកដទៃដែរ»។
ពង្រឹងជំនាញវះកាត់នៅកម្ពុជា
ក្រុមការងារមកពីសហរដ្ឋអាមេរិកក៏បានគាំទ្រដល់អ្នកស្ម័គ្រចិត្តក្នុងស្រុកចំពោះប្រតិបត្តិការវះកាត់បបូរមាត់ឆែបក្រអូមមាត់ឆែបនិងការខូចទ្រង់ទ្រាយមុខផ្សេងទៀត។ បេសកកម្មប្រចាំឆ្នាំនេះគឺជាឱកាសមួយសម្រាប់ការផ្ទេរចំណេះដឹងដោយក្រុមវេជ្ជសាស្ដ្រ NWMV ខណៈដែលអ្នកស្ម័គ្រចិត្តមួយចំនួនក៏ជាសាស្ត្រាចារ្យនៅក្នុងសាកលវិទ្យាល័យល្បីៗនៅសហរដ្ឋអាមេរិកផងដែរ។
វេជ្ជបណ្ឌិត Sam Most ដែលបណ្ដុះបណ្ដាលក្រុមគ្រូពេទ្យកម្ពុជា ឱ្យដឹងថា៖ «NWMV បានចាប់ផ្តើមបេសកកម្មមកកម្ពុជាក្នុងឆ្នាំ ២០០៦ ហើយធ្វើការក្នុងភាពជាដៃគូជាមួយមន្ទីរពេទ្យមិត្តភាពខ្មែរ-សូវៀតជាមជ្ឈមណ្ឌលអប់រំនិងបង្រៀនផ្នែកវេជ្ជសាស្ត្រដ៏សំខាន់»។
អ្នកស្រី Andrea 'Andy' Mangione Standish ស្ថាបនិកនិងជាប្រធានមូលនិធិ Standish ថ្លែងថា អ្នកស្រីអរគុណចំពោះភាគីពាក់ព័ន្ធទាំងអស់ដែលចូលរួមក្នុងគម្រោងដែលនាំអ្នកជំនាញរបស់សហរដ្ឋអាមេរិកមកកម្ពុជា។«សូមអរគុណដល់វេជ្ជបណ្ឌិតដែលធ្វើការជាមួយលោកវេជ្ជបណ្ឌិតសារុំដែលពួកគេបានចំណាយពេលវេលាជាច្រើនឆ្នាំធ្វើការវះកាត់ដល់អ្នកជំងឺមាត់ឆែប»។
លោកសាស្ត្រាចារ្យងី ម៉េងប្រធានមន្ទីរពេទ្យមិត្តភាពខ្មែរ-សូវៀតបានទទួលស្គាល់ការសាទរជាអន្តរជាតិចំពោះការវះកាត់បបូរមាត់និងក្រអូមមាត់និងបានលើកឡើងពីជំនាញដែលកំពុងរីកចម្រើនក្នុងការវះកាត់ត្រចៀក Microtia។
លោកងី ម៉េង ថ្លែងប្រាប់ភ្នំពេញប៉ុស្ដិ៍នៅមុខសាលចុះឈ្មោះអ្នកជំងឺថា៖«យើងទទួលស្គាល់ថា ការវះកាត់មាត់និងក្រអូមមាត់ឆែបគឺជាជំនាញដែលទទួលបានការកោតសរសើរពីអ្នកជំនាញអន្ដរជាតិ។ ប៉ុន្ដែអាការត្រចៀក Microtia យើងកំពុងតែស្ថិតក្នុងការបណ្ដុះបណ្ដាលពីជំនាញមកពីបណ្ដាប្រទេសនានាជាពិសេស ក្រុមគ្រូពេទ្យស្ម័គ្រចិត្ដមកពីសហរដ្ឋអាមេរិក»៕
