![](https://pppkhmer.sgp1.digitaloceanspaces.com/image/main/20242/1_2_2024_dacfafff.jpg)
គំនូរជីវចល ដែលដាក់ប្រកួតយកពាននៅឆ្នាំនេះ។ រូបថត Phare Creative Studio
បាត់ដំបង: នៅក្នុងអាណាចក្រនៃគំនូរជីវចលនិងសេរីភាពក្នុងការច្នៃប្រឌិត ឆ្នាំ ២០២៣ គឺជាឆ្នាំដ៏អស្ចារ្យសម្រាប់ស្ទូឌីយោគំនិតច្នៃប្រឌិតកម្ពុជាហ្វារ (PCS) ជាសហគ្រាសសង្គមរបស់កម្ពុជា ដែលអភិវឌ្ឍលើវិស័យសិល្បៈគំនូរជីវចលប្រកបដោយប្រសិទ្ធភាព និងច្នៃប្រឌិត។
(PCS) បានទទួលដំណឹងល្អពីការជ្រើសរើសចូលរួមប្រកួតពានរង្វាន់ World Summit Awards (WSA) ឆ្នាំ ២០២៤ ដែលតំណាងឱ្យប្រទេសកម្ពុជាក្នុងប្រភេទវប្បធម៌ និងបេតិកភណ្ឌជាមួយជំនូរជីវចលបរិស្ថាន «បុត្រីនៃមាតាធម្មជាតិ» ដែលបង្ហោះលើអ៊ីនធឺណិតកាលពីឆ្នាំ ២០១៩។
យោងតាម (PCS) បានឱ្យដឹងថា ចំពោះការជ្រើសរើសក្នុងបញ្ជីប្រកួតពានរង្វាន់នេះទទួលស្គាល់មាតិកាឌីជីថលដ៏ល្អបំផុតនិងប្រកបដោយភាពច្នៃប្រឌិតបំផុតពីជុំវិញពិភពលោកដែលជះឥទ្ធិពលជាវិជ្ជមានដល់សង្គម។
លោក ហួត ដារ៉ា នាយកប្រតិបត្តិសហគ្រាសសង្គមហ្វារបានថ្លែងថា៖«យើងមានកិត្តិយសណាស់ដែលត្រូវបានតែងតាំងបន្ទាប់ពីរយៈពេល ១៦ ឆ្នាំនៃការបង្កើតរបស់កម្ពុជាដើម្បីប្រយោជន៍សង្គម ការការពារកុមារ សមភាពយេនឌ័រ សិទ្ធិកម្មករ ការអភិរក្សបរិស្ថាន ការការពារសុខុមាលភាពសង្គមនិងការពង្រឹងអំណាចតាមរយៈសិល្បៈ»។
វាជាការសម្គាល់លើកទី ១ នៃគំនូរជីវចលរបស់ (PCS) ដែលត្រូវបានដាក់បញ្ចាំងនៅបរទេសក្នុងមហោស្រពនានាពីប្រទេសចិនដល់ហ្សកហ្ស៊ី។
គំនូរជីវចលនេះត្រូវបានដាក់បញ្ចាំងនៅក្នុងមហោស្រពភាពយន្តអន្តរជាតិចំនួន ៥ រួមទាំងមហោស្រពភាពយន្តអន្តរជាតិកម្ពុជា មហោស្រពភាពយន្តយុវជន Schenzen ឥណ្ឌូនេស៊ី CRAFT Animfest មហោស្រពគំនូរជីវចលអន្តរជាតិ Tbilisi និងមហោស្រពភាពយន្តអាស៊ីតៃប៉ិ។
លោកដារ៉ា បានបន្ដថា៖«យើងជឿជាក់លើការប្រើប្រាស់បច្ចេកវិទ្យាព័ត៌មាននិងទំនាក់ទំនងសម្រាប់ការអភិវឌ្ឍប្រកបដោយនិរន្តរភាពហើយសង្ឃឹមថា ការចូលរួមប្រកួតជំនូរជីវចលរបស់យើងនឹងជួយលើកកម្ពស់ការយល់ដឹងអំពីការងារច្នៃប្រឌិតដែលកំពុងធ្វើនៅកម្ពុជា។យើងនឹងរង់ចាំរហូតដល់ការប្រកាសអ្នកឈ្នះនៅខែកុម្ភៈឆ្នាំ ២០២៤»។
ក្នុងចំណោមស្នាដៃដែលទទួលបានការសាទររបស់ខ្លួន គំនូរជីវចល «បុត្រីនៃមាតាធម្មជាតិ» មានភាពលេចធ្លោ មិនត្រឹមតែជាព្រឹត្តិការណ៍វប្បធម៌សម្រាប់ប្រទេសកម្ពុជាប៉ុណ្ណោះទេ តែក៏ជាសារចំណេះដឹងអំពីបរិស្ថាន ដែលត្រូវបានទទួលស្គាល់ជាសកលនិងជាទីចាប់អារម្មណ៍របស់ទស្សនិកជនទូទាំងពិភពលោក។
សាច់រឿងនេះនិយាយអំពី ធីតា ដែលត្រូវបានហៅថា បុត្រីនៃមាតាធម្មជាតិ។ នាងបានទទួលមរតកវេទមន្ដដើម្បីការពារធម្មជាតិពីគ្រប់ប្រភពនៃការបំពុលនិងការបំផ្លិចបំផ្លាញ។
រួមជាមួយមិត្តភក្តិ ២ នាក់របស់នាង ធីតា ចាប់ផ្តើមដំណើរផ្សងព្រេងទូទាំងប្រទេសកម្ពុជាជាមួយវេទមន្ដ និងសមត្ថភាពក្នុងការប្រាស្រ័យទាក់ទងជាមួយពិភពវិញ្ញាណរួមគ្នាតស៊ូការពារមាតាធម្មជាតិ។
ជាសិល្បការិនី និងជាសហអ្នកនិពន្ធរឿងនេះ ម៉ម ឡូរ៉ា បានថ្លែងថា៖ «យើងពិតជាមានមោទនភាពក្នុងការចែករំលែកភាពយន្តគំនូរជីវចលនេះឱ្យហួសពីព្រំដែនកម្ពុជា។ខ្សែភាពយន្តនេះដោះស្រាយបញ្ហាសកល៖ការការពារភពផែនដីរបស់យើង។បញ្ហាប្រឈមផ្នែកបរិស្ថានតែងតែមានមិនចេះចប់ហើយការដោះស្រាយបញ្ហានេះទាមទារឱ្យមានការខិតខំប្រឹងប្រែងជាសកល»។
គំនិតមួយនេះគឺបានផ្តើមឡើងមកពីយុទ្ធនាការកាត់បន្ថយការប្រើប្រាស់សារធាតុប្លាស្ទិក #1RiverMusicFestival ទៅជាឧបករណ៍ដ៏មានឥទ្ធិពលសម្រាប់សកម្មភាពបរិស្ថាន។
សមិទ្ធផលនេះ អាចសម្រេចបានតាមរយៈការគាំទ្រពីដៃគូសំខាន់ៗ រួមមាន ក្រសួងបរិស្ថាន UNDP នៅកម្ពុជា និងស្ថានទូតស៊ុយអែតប្រចាំកម្ពុជា។ជាងនេះទៅទៀត សហភាពអឺរ៉ុបនៅកម្ពុជានិងក្រុមហ៊ុនធានារ៉ាប់រងហ្វតតេបានចូលរួមគាំទ្របន្ថែមដើម្បីរួមចំណែកដល់ភាពជោគជ័យនៃគម្រោងនេះ។
«បុត្រីនៃមាតាធម្មជាតិ» ដែលបញ្ចូលសំឡេងដោយសិល្បករជាច្រើន ជាពិសេសតារាចម្រៀងរ៉េបដ៏ល្បីរបស់កម្ពុជា វណ្ណដា ជាចលករបំផុសយុវជនឱ្យក្លាយជាអ្នកសង្គ្រោះបរិស្ថាន និងមានចូលមើលជាង ៤ លានដង នៅលើបណ្តាញសង្គមរបស់ខ្លួន។
កញ្ញា ឡូរ៉ា ថ្លែងថា៖ «ភាពយន្តនេះបង្ហាញពីរបៀបដែលយុវជននៅកម្ពុជាកំពុងធ្វើការយ៉ាងសកម្ម ដើម្បីការពារបរិស្ថានក្នុងបំណងបំផុសគំនិតមនុស្សជុំវិញពិភពលោកឱ្យចូលរួមសកម្មភាពនេះ»។
បុគ្គលម្នាក់ដែលនៅពីក្រោយការផលិតគំនូរជីវចលយុទ្ធនាការនេះគឺលោក យ៉ាន់ អាធីសុខ ជាអ្នកបង្កើតគំនូរជីវចលនិងជាអ្នកថតវីដេអូ បានចាប់អារម្មណ៍ពេលបានឮថា«បុត្រីនៃមាតាធម្មជាតិ» ត្រូវបានជ្រើសរើសឱ្យចូលរួមប្រកួតពានរង្វាន់ឆ្នាំ ២០២៤។
លោកបានថ្លែងថា៖«ខ្ញុំរំភើបចិត្តណាស់ដែលដឹងគំនូរជីវចលបរិស្ថាននេះបានចូលរួមប្រកួតលក្ខណៈអន្តរជាតិ។ ខ្ញុំសង្ឃឹមថាវានឹងឈ្នះពានរង្វាន់ដែលជំរុញទឹកចិត្តយុវជនរបស់យើងឱ្យផ្តោតលើគំនូរជីវចល និងបញ្ហាសង្គម»។
ដោយបន្ថែមការសរសើរមួយផ្សេងទៀតចំពោះសមិទ្ធផលរបស់ពួកគេស្ទូឌីយោបានបង្ហាញពីក្តីប្រាថ្នាថ្មីមួយបន្ទាប់ពីភាពជោគជ័យក្នុងការឈ្នះការប្រកួតប្រជែងច្នៃប្រឌិតដែលផ្តួចផ្តើមដោយកម្មវិធីអភិវឌ្ឍន៍អង្គការសហប្រជាជាតិកាលពីឆ្នាំមុន។
ជ័យជម្នះនេះ កើតចេញពីយុទ្ធនាការបរិស្ថានដ៏មានឥទ្ធិពលរបស់ពួកគេ «Fight the Monster,#Beat Plastic»។ យុទ្ធនាការនេះ បានទទួលការចាប់អារម្មណ៍នៅពេលដាក់បង្ហាញនៅក្រសួងបរិស្ថានកម្ពុជាក្នុងអំឡុងពេលវេទិកាជាតិប្លាស្ទិកលើកទី ៣ កាលពីខែមេសា។ លើសពីគំនូរជីវចល PCS បានបង្កើតយុទ្ធនាការ «គ្មានសំរាម ផ្តើមពីអ្នក!» ដែលគោលគំនិតនៃយុទ្ធនាការនេះ ត្រូវបានបង្កើតឡើងសម្រាប់មូលនិធិអាស៊ីដើម្បីដោះស្រាយផលប៉ះពាល់អវិជ្ជមាននៃការបំពុលសំណល់មកលើបរិស្ថាន និងការអភិវឌ្ឍវិស័យទេសចរណ៍ក្នុងក្រុងក្រចេះ។
![](https://pppkhmer.sgp1.cdn.digitaloceanspaces.com/image/main/20242/1_2_2024_vanda.jpg)
នៅក្នុងការផ្លាស់ប្តូរជាប្រវត្តិសាស្ត្រ PCS បានបង្ហាញគម្រោងគំនូរជីវចលកម្មសិទ្ធិបញ្ញា (IP) ដំបូងរបស់ខ្លួនរឿង «បួង សួង» ក្នុងឱកាសបុណ្យចូលឆ្នាំខ្មែរ។ដឹកនាំដោយលោក មៀលកុសល គម្រោងនេះលាយបញ្ចូលគ្នារវាងចលនា 2D និង 3D ដែលបង្ហាញពីយុគសម័យថ្មីនៃបច្ចេកវិទ្យានៅកម្ពុជា។
លោក ដារ៉ា បានថ្លែងថា៖ «យើងខិតខំផលិតមាតិកាដែលមានប្រសិទ្ធភាពបំផុតជាមួយដៃគូផ្តល់មូលនិធិរបស់យើងហើយនៅពេលណាដែលអាចធ្វើទៅបានយើងចង់បង្កើតមាតិកាបន្ថែមទៀតដោយខ្លួនឯង»។
នៅក្នុងនិទានរឿងដ៏ពិសេស «បួងសួង» ទេវតា ព្រះនាមកិមិរាទេវី ចុះមកការពារផែនដី អមដោយចាតុម្មហារាជិកា អម្ពរពណ៌សេត (ស) ។លោកកុសល ដែលជាផលិតករ បានប្រាប់ភ្នំពេញប៉ុស្តិ៍ថា៖«គំនូរជីវចលរយៈពេល ២ នាទីគឺផ្តោតទៅលើប្រពៃណី និងវប្បធម៌នៃបុណ្យចូលឆ្នាំខ្មែរតាមរយៈការស្រាវជ្រាវអំពីប្រវត្តិរបស់ទេវតា ព្រះនាមកិមិរាទេវីនិងចាប់ផ្ដើមបង្កើតជាសាច់រឿងថ្មីរបស់យើង»។
លោក ដារ៉ា បានបន្ដថា ក្នុងនាមជាអង្គការប្រកបដោយភាពច្នៃប្រឌិតវាពិតជាមានសារៈសំខាន់ខ្លាំងណាស់ក្នុងការចុះហត្ថលេខាលើការផលិតគំនូរជីវចលផ្ទាល់ខ្លួនដែលអនុញ្ញាតឱ្យអ្នកនិពន្ធ និងសិល្បករមានសេរីភាពទាំងស្រុង។ច្បាប់តែមួយគត់នោះគឺបង្កើតសាច់រឿងដែលមានសារៈសំខាន់ និងមានអត្ថន័យសម្រាប់ប្រជាជនកម្ពុជា៕
![](https://pppkhmer.sgp1.cdn.digitaloceanspaces.com/image/main/20242/1_2_2024_31_1_2024_2story1.jpg)
![](https://pppkhmer.sgp1.cdn.digitaloceanspaces.com/image/main/20242/1_2_2024_plastic_monster_of_the_beat_plastic_campaign_presented_at_the_ministry.jpg)