សកម្មភាពប្រកួតរបស់វីរកីឡាការិនី អ៊ុក ស្រីមុំ កន្លងមក។ ឈន ណន
ភ្នំពេញៈ ដោយត្រូវបានបង្កើតឡើងនៅឆ្នាំ ១៩៩២ សហព័ន្ធកីឡាប៊ូល និងប៉េតង់កម្ពុជា ក្រោមការដឹកនាំរបស់លោក សុខ អាន នាពេលនោះបានវិវឌ្ឍខ្លួនពីការលេងបែបកម្សាន្ត ដើម្បីបញ្ចេញញើស និងបាយបានទៅជាប្រភេទកីឡាដែលមានសក្តានុពលក្នុងការប្រកួតប្រជែងដណ្តើមយកមេដាយជូនជាតិ បន្ទាប់ពីក្រុមនេះ បានបង្ហាញវត្តមានជាលើកដំបូង ក្នុងការប្រកួតស៊ីហ្គេមឆ្នាំ ២០០១ នៅប្រទេសម៉ាឡេស៊ី។
នៅក្នុងដំណើរការងាររយៈពេល ៧ អាណត្តិ ចាប់តាំងពីឆ្នាំ ១៩៩២ រហូតមកទល់បច្ចុប្បន្ន សហព័ន្ធកីឡាប៊ូល និងប៉េតង់កម្ពុជាដណ្តើមបានមេដាយពីការប្រកួតលើឆាកអន្តរជាតិជូនប្រទសជាតិច្រើនជាងគេ គឺគិតត្រឹមថ្ងៃទី ៣១ ខែធ្នូ ឆ្នាំ ២០២៣ សហព័ន្ធនេះបានមេដាយសរុបចំនួន ៤១៣ ក្នុងនោះមានមេដាយមាស ១១៧ ប្រាក់ ១៤៥ និងសំរឹទ្ធចំនួន ១៥១។
ជាមួយនឹងលទ្ធផលដ៏ត្រចះត្រចង់នេះ ក្រុមប៉េតង់កម្ពុជា បានបង្កើតកំណត់ត្រាល្អៗជាច្រើនដែលធ្វើឱ្យមានភាពល្បីរន្ទឺខ្លាំងលើឆាកអន្តរជាតិ ជាពិសេសការឈ្នះបានមេដាយមាសចំនួន ៥ លើកជាប់ៗគ្នាលើវិញ្ញាសាវាយយកពិន្ទុក្នុងការប្រកួតជើងឯកពិភពលោក ដោយក្នុងនោះវីរកីឡាការិនី កែ ឡេង ដែលបានចូលនិវត្តន៍កាលពីឆ្នាំ ២០២០ បានឈ្នះចំនួន ៤ លើកជាប់ៗគ្នា ហើយវីរកីឡាការិនី អ៊ុក ស្រីមុំ បានឈ្នះបន្ថែម ១ លើកទៀត សម្រាប់ការប្រកួតជើងឯកពិភពលោកនៅប្រទេសអេស្ប៉ាញ កាលពីខែវិច្ឆិកា ឆ្នាំ ២០២១។
ទោះបីជាយ៉ាងណា ការមិនអាចដណ្តើមបានមេដាយមាស គឺបានត្រឹមមេដាយប្រាក់ ៦ និងមេដាយសំរឹទ្ធ ៤ ក្នុងនាមជាម្ចាស់ផ្ទះ សម្រាប់ការប្រកួតស៊ីហ្គេម លើកទី ៣២ ឆ្នាំ ២០២៣ បានក្លាយជាការបរាជ័យមួយដែលសហព័ន្ធកីឡាប៊ូល និងប៉េតង់កម្ពុជា មិនអាចសម្រេចគោលដៅដ៏ធំរបស់ខ្លួនតាមការដាក់សម្ទុះមេដាយមាសរបស់គណៈកម្មាធិការជាតិ CAMSOC។ បញ្ហានេះ រួមទាំងចំណុចខ្វះខាតមួយចំនួនទៀត ត្រូវបានថ្នាក់ដឹកនាំសហព័ន្ធ លើកយកមកពិភាក្សា ហើយបានកំណត់នូវផែនការ និងទិសដៅជាក់លាក់ដើម្បីពង្រឹងចំណុចខ្វះខាតទាំងនោះឱ្យមានភាពប្រសើរវិញ។
តាមខ្លឹមសារដែលត្រូវបានបង្ហាញក្នុងសន្និបាតបូកសរុបលទ្ធផលការងារ ឆ្នាំ ២០២៣ និងលើកទិសដៅ ឆ្នាំ ២០២៤ របស់សហព័ន្ធកីឡាប៊ូល និងប៉េតង់កម្ពុជានៅទីស្នាក់ការគណៈកម្មាធិការអូឡាំពិកកម្ពុជា កាលពីថ្ងៃទី ២០ ខែមករា បានឱ្យដឹងថា នៅឆ្នាំ ២០២៤ នេះ សហព័ន្ធនឹងពង្រីកខ្ទង់ចំណាយរហូតជាង ២៨ ម៉ឺនដុល្លារអាមេរិក ដោយផ្តោតសំខាន់ទៅលើការពង្រឹងការងារបណ្ដុះបណ្ដាលបច្ចេកទេសកម្រិតខ្ពស់។
លោក សុខ សូកាន ប្រធានសហព័ន្ធកីឡាប៊ូល និងប៉េតង់កម្ពុជាបានថ្លែងក្នុងសន្និបាតនោះថា៖ «ក្នុងឆ្នាំ ២០២៤ នេះ យើងនឹងជំរុញនិងពង្រឹងសហព័ន្ធរបស់យើងដោយយើងត្រូវចំណាយច្រើនរហូតដល់ ១ ១៤៥ លានរៀល (ជាង ២៨ ម៉ឺនដុល្លារអាមេរិក) ក្នុងនោះយើងបានបង្កើនការងារបណ្តុះបណ្តាលតាមបច្ចេកទេសថ្មីរបស់យើងពី ៥ ភាគរយ កាលពីឆ្នាំមុនទៅ ២០ ភាគរយនៅឆ្នាំនេះ ចំណែកការប្រកួតក្នុងប្រទេសប្រហែល ៣៤ ភាគរយ និងប្រកួតនៅក្រៅប្រទេស ៣២ ភាគរយ ខណៈពេលនេះយើងមានចំណូលក្នុងដៃសល់ពីឆ្នាំមុន ១៤៥ លានរៀលគឺនៅខ្វះចូល ១ ពាន់លានរៀលទៀត»។
រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ លោក សុខ សូកាន បានឱ្យដឹងទៀតថា ឆ្នាំនេះ សហព័ន្ធ នឹងផ្តល់អាទិភាពទៅលើការពង្រឹងសមត្ថភាពស្ថាប័នគឺសមាគម សម្ព័ន្ធ និងក្លិបនៅទូទាំងប្រទេសកម្ពុជា ហើយការពង្រឹងលើការបណ្តុះបណ្តាលពាក់ព័ន្ធនឹងបច្ចេកទេស និងយុទ្ធសាស្ត្រ ក្នុងពេលប្រកួតជាចំណុចអាទិភាពចម្បងជាងគេ ដោយសារប្រទេសនៅក្នុងតំបន់ពេលនេះ មានសមត្ថភាពកើនឡើងគួរឱ្យកត់សម្គាល់។
ចំពោះចំណុចនេះ លោក សូកាន បញ្ជាក់ថា៖ «ឆ្លងកាត់ការប្រកួតស៊ីហ្គេម ឆ្នាំ ២០២៣ យើងបានឃើញច្បាស់ទាំងអស់គ្នានូវការកើនឡើងនៃសមត្ថភាពគូប្រកួតរបស់យើងនៅក្នុងតំបន់ គឺបច្ចេកទេសលេងរបស់គាត់មានការកើនឡើងគួរឱ្យចាប់អារម្មណ៍ ហេតុដូច្នេះបានជាសហព័ន្ធសម្រេចថា នៅឆ្នាំនេះ យើងចាំបាច់ត្រូវតែបង្កើនបច្ចេកទេសកម្រិតខ្ពស់របស់យើងគឺការជំរុញបើកវគ្គបណ្តុះបណ្តាលបច្ចេកទេស ហើយក្នុងនោះដែរ រាល់វិញ្ញាសាប្រឡងធ្វើតេស្តប្រចាំខែ យើងនឹងបញ្ចូលវិញ្ញាសាថ្មីបន្ថែមទៅលើវិញ្ញាសាចាស់ រួចទើបធ្វើការថ្លឹងថ្លែងការផ្តល់ពិន្ទុសម្រាប់វិញ្ញាសាទាំងនោះ»។
ជាមួយផែនការនេះ សហព័ន្ធ នឹងចេញវិញ្ញាបនបត្រសម្រាប់គ្រូបង្វឹក ៣ កម្រិតគឺកម្រិត C សំដៅលើគ្រូបង្វឹកដែលអាចរៀបចំការប្រកួតបាន ចំណែកកម្រិតBជាគ្រូបង្វឹក អាចរៀបចំការប្រកួតបានហើយនិងចេះធ្វើបទបង្ហាញដល់កូនសិស្សពីរបៀបបោះប៊ូល និងចូលប៊ូលទៀត រីឯកម្រិត A ជាកម្រិតខ្ពស់ជាងគេនោះ គឺគ្រូបង្វឹក ត្រូវតែចេះរៀបចំការប្រកួតផង ចេះធ្វើបទបង្ហាញផងនិងចេះវិភាគប៊ូលទៀតដើម្បីរៀបចំយុទ្ធសាស្ត្រឱ្យត្រូវក្នុងការលេង ហើយលក្ខខណ្ឌនៃបទប្បញ្ញត្តិនៃការបណ្តុះបណ្តាលនេះ ត្រូវបានទទួលស្គាល់ និងឯកភាពពីគណៈកម្មាធិការប្រតិបត្តិរបស់សហព័ន្ធប៊ូល និងប៉េតង់កម្ពុជារួចហើយ។
យ៉ាងណាក៏ដោយ ជាមួយផែនការបណ្តុះបណ្តាលបច្ចេកទេសគ្រូបង្វឹកកម្រិតខ្ពស់នេះ សហព័ន្ធកីឡាប៊ូល និងប៉េតង់កម្ពុជា បណ្តុះបណ្តាលបានគ្រូបង្វឹកកម្រិត A ចំនួន ៧ នាក់ និងគ្រូបង្វឹកកម្រិត B ចំនួន ៣ នាក់ហើយ ដោយអ្នកទាំង ១០ នេះ ត្រូវបានប្រគល់វិញ្ញាបនបត្របញ្ជាក់ការសិក្សានៅក្នុងសន្និបាតកាលពីថ្ងៃទី ២០ ខែមករារួចហើយ។ ជាមួយគ្នានោះសហព័ន្ធក៏បានតែងតាំងទីប្រឹក្សាចំនួន ៦ នាក់បន្ថែមទៀតជាឥស្សរជនឆ្នើមៗដែលបានលះបង់ និងរួមចំណែកជួយវិស័យកីឡាប៉េតង់កម្ពុជា ជាច្រើនឆ្នាំកន្លងមក។
ចំពោះគម្រោងបណ្តុះបណ្តាលបន្ទាប់លោក សុខ សូកាន បានបញ្ជាក់ថា៖ «ចាប់ពីខែកុម្ភៈ ក្នុងឆ្នាំ ២០២៤ នេះ សហព័ន្ធ នឹងចុះទៅបណ្តុះបណ្តាលគ្រូបង្វឹក នៅតាមខេត្ត ព្រមទាំងប្រឡងធ្វើតេស្តចេញវិញ្ញាបនបត្រគ្រូបង្វឹកកម្រិត C មុនគេ រួចទើបបន្តរៀបចំវគ្គបណ្តុះបណ្តាលកម្រិត B និងកម្រិត A ទៅដល់គ្រូបង្វឹកនៅតាមខេត្តដើម្បីឱ្យពួកគាត់បានចូលរួមអភិវឌ្ឍវិស័យកីឡាប៉េតង់របស់យើងឱ្យកាន់តែមានភាពរីកចម្រើនជាមួយគ្នា»។
បន្ថែមលើនេះ សហព័ន្ធកីឡាប៊ូលនិងប៉េតង់កម្ពុជាក៏បានផ្តោតទៅលើការពង្រឹងទិសដៅការងារជាអាទិភាពចំនួន ៣ ទៀតផងដែរ គឺការពង្រឹងកិច្ចសហប្រតិបត្តិការរវាងសហព័ន្ធកីឡាប៊ូល និងប៉េតង់កម្ពុជាជាមួយសម្ព័ន្ធក្លិបនៅបណ្ដារាជធានី-ខេត្ត,ការបន្តចូលរួមការប្រកួតអន្តរជាតិ និងជំរុញការប្រកួតក្នុងប្រទេស ពិសេសកម្រិតខេត្តសម្ព័ន្ធ និងក្លិបព្រមទាំងពង្រីកវិសាលភាពកីឡាប៊ូល និងប៉េតង់កម្ពុជា។
នៅក្នុងសន្និបាតនោះដែរលោកឧបនាយករដ្ឋមន្ដ្រី ស សុខា រដ្ឋមន្ត្រីក្រសួងមហាផ្ទៃដែលជាប្រធានកិត្តិយសសហព័ន្ធកីឡាប៊ូលនិងប៉េតង់កម្ពុជាបានគាំទ្រឱ្យមានវគ្គបណ្ដុះបណ្ដាលគ្រូបង្វឹកកម្រិត A, B និងកម្រិត C នៅតាមខេត្ត និងតាមភូមិភាគនេះ ដោយលោកលើកឡើងថា នេះជាកាយវិការមួយដ៏ល្អក្នុងការបង្កើតធនធានមនុស្សចាក់ចូលដល់ថ្នាក់ក្រោមជាតិ។
អតីតប្រធានសហព័ន្ធកីឡាប៊ូល និងប៉េតង់កម្ពុជា លោក ស សុខា បន្ថែមថា៖ «ខ្ញុំគិតថា ការដាក់ទុននេះនឹងអាចទទួលបានផលត្រឡប់មកវិញក្នុងរយៈពេល ៥ ឬ ៦ ឆ្នាំខាងមុខ ហើយបើទោះជាប៉ុន្មានឆ្នាំចុងក្រោយនេះវិស័យប៊ូល និងប៉េតង់របស់យើង វាមិនទាន់ល្អដូចអ្វីដែលយើងចង់បាន ប៉ុន្តែវានៅតែជាប្រភេទកីឡាមួយដែលយើងមានលទ្ធភាពក្នុងការបង្ហាញអន្តរជាតិថា កម្ពុជាគឺនៅនឹងដដែល។ តែក៏ដល់បន្ទាត់ក្រហមដែលយើងគួរតែពិនិត្យក្នុងការធ្វើកំណែទម្រង់ដើម្បីសម្រួច និងពង្រឹងស្មារតីគឺពង្រឹងទាំងគុណភាពនិងបរិមាណគ្រប់សមាគមក្លិបទាំងអស់»។
ជាមួយគ្នានោះ លោក ស សុខា ក៏បានអបអរសាទរពីរបាយការណ៍ប្រចាំឆ្នាំ ២០២៣ ដែលសម្រេចបានសមិទ្ធផលជាច្រើនតាមផែនការសកម្មភាព និងទិសដៅដែលសហព័ន្ធបានកំណត់ ពិសេសភាពជោគជ័យនៃការធ្វើម្ចាស់ផ្ទះកីឡាស៊ីហ្គេម-អាស៊ានប៉ារ៉ាហ្គេម ឆ្នាំ ២០២៣។ តែទោះបីជាយ៉ាងណា លទ្ធផលមួយចំនួនលោកមើលឃើញថា នៅមិនទាន់ឆ្លើយតបនឹងការចង់បាននៅឡើយទេ ដែលគ្រប់ភាគីពាក់ព័ន្ធត្រូវពិនិត្យ និងកែលម្អ ធ្វើម៉េចឱ្យសហព័ន្ធដំណើរការរលូន និងល្បីល្បាញដូចវីរកីឡាករ វីរកីឡាការិនីជំនាន់មុន។
លោកឧបនាយករដ្ឋមន្ដ្រី បានបញ្ជាក់ថា៖«យើងត្រូវទទួលស្គាល់ថា ប៉ុន្មានឆ្នាំចុងក្រោយនេះ បណ្ដាប្រទេសជិតខាងរបស់យើង គេរីកចម្រើន ឯយើងមានកម្រិតមួយដែលកំពុងធ្លាក់បន្ដិច។ អ៊ីចឹងសូមឱ្យពិនិត្យទៅលើចំណុចខ្វះខាតនេះ ហើយសូមឱ្យកីឡាករ កីឡាការិនីទាំងអស់គោរពទៅតាមវិន័យ និងការណែនាំរបស់សហព័ន្ធ និងសមាគមក្លិប ព្រោះមែនទែនទៅសហព័ន្ធ ដូចជាអ្នកសម្របសម្រួលមួយ ឯការបណ្ដុះបណ្ដាល និងការគ្រប់គ្រងធនធានទាំងអស់ គឺសមាគមក្លិប ជាតួអង្គសំខាន់ ហេតុនេះការពង្រឹងវិន័យហ្វឹកហាត់ជារឿងសំខាន់ រីឯគ្រូបង្វឹកជម្រើសជាតិត្រូវតែមានភាពម៉ឺងម៉ាត់ជាមួយកីឡាករ កីឡាការិនី»។
បន្ថែមលើនេះ លោក ស សុខា បានផ្តល់ជាអនុសាសន៍ចំនួន ៧ ចំណុចឱ្យសហព័ន្ធកីឡាប៊ូល និងប៉េតង់កម្ពុជា យកទៅអនុវត្ត ដើម្បីភាពរីកចម្រើនបន្តទៅមុខទៀតគឺទី១ ស្នើឱ្យសហព័ន្ធ ត្រូវជំរុញនិងកែលម្អចំណុចខ្សោយ ដែលមាននិងបានរកឃើញកន្លងមក ហើយត្រូវខិតខំអភិវឌ្ឍសមត្ថភាពកីឡាករ កីឡាការិនីដើម្បីឆ្លើយតបទៅនឹងតម្រូវការកម្រិតជាតិ និងអន្តរជាតិ រីឯទី២ ត្រូវបន្តបណ្តុះបណ្តាលធនធានមនុស្ស ធនធានកីឡាករ កីឡាការិនីគ្រប់កម្រិត ធនធានគ្រូបង្វឹក អាជ្ញាកណ្តាល មន្ត្រីបច្ចេកទេស ដើម្បីតាមឱ្យទាន់បរិបទសកល និងបច្ចេកវិទ្យានាពេលបច្ចុប្បន្ន និងទៅអនាគត។
ចំណែកទី៣ សហព័ន្ធត្រូវបន្តបង្កើតសមត្ថភាពប្រកួតឱ្យកាន់តែផុសផុល ទាំងការប្រកួតកម្រិតក្លិប សមាគមតាមបណ្តារាជធានី-ខេត្ត ក្របខ័ណ្ឌទូទាំងប្រទេស និងក្រុមជម្រើសជាតិ ដើម្បីឱ្យស្របតាមការគាំទ្ររបស់មហាជន និងការគាំទ្រថវិកាពីក្រសួងអប់រំ យុវជន និងកីឡា ហើយទី៤ ត្រូវសិក្សា និងពិនិត្យលទ្ធភាពសមាគម ក្លិប តាមបណ្តាខេត្តឱ្យបានរឹងមាំ និងរីកចម្រើន ព្រមទាំងកែលម្អ និងកសាងហេដ្ឋារចនាសម្ព័ន្ធប្រកួតឱ្យបានល្អជាងមុន។
ចំពោះចំណុចទី៥ សហព័ន្ធ ត្រូវលើកទឹកចិត្តសម្រាប់ការប្រកួតរបស់អត្តពលិក យុវជនស្ម័គ្រចិត្ត ជាពិសេសដៃគូគាំទ្រ និងកៀរគរធនធានរូបវន្ត សម្រាប់បម្រើដល់ការរៀបចំការប្រកួតជាតិ និងអន្តរជាតិ។ ទី៦ បន្តធ្វើទំនាក់ទំនងជិតស្និទ្ធរវាងសហព័ន្ធនៅក្នុងតំបន់អាស៊ានរបស់យើង ឬជាមួយអាស៊ី និងពិភពលោកតាមរយៈការចុះអនុស្សរណៈយោគយលគ្នា និងការអភិវឌ្ឍដើម្បីនាំកម្ពុជាចូលទៅក្នុងការប្រកួតអន្តរជាតិឱ្យកាន់តែខ្ពស់ជាងមុន រីឯទី៧ បន្តខិតខំប្រឹងប្រែងចូលរួមព្រឹត្តិការណ៍នៅលើឆាកអន្តរជាតិឱ្យបានច្រើនជាងមុនដើម្បីនាំយកមេដាយ និងពានរង្វាន់ជាមោទនភាពជូនជាតិ។
បន្ថែមលើការផ្តល់អនុសាសន៍នេះ លោក ស សុខា បញ្ជាក់ថា៖ «គោលការណ៍ជោគជ័យរបស់កីឡា មិនអាចធ្វើផ្លូវកាត់កើតនោះទេ ចំណែកភាពជោគជ័យនៅក្នុងជីវិតរបស់មនុស្សយើងម្នាក់ៗក៏ដូចគ្នា ដូច្នេះខ្ញុំសូមស្នើឱ្យសហព័ន្ធក៏ដូចជាក្រុមគ្រួសារកីឡាប៊ូល និងប៉េតង់ទាំងអស់ត្រូវបន្តខិតខំប្រឹងប្រែងធ្វើម៉េចរឹតបន្តឹង អនុវត្តច្បាប់ទម្លាប់ទៅដល់កីឡាករ កីឡាការិនី ក៏ដូចជាគណៈគ្រប់គ្រងទាំងអស់ ព្រោះជោគជ័យទាំងអស់យើងត្រូវតែបង្ហាញគំរូ ដោយចាប់ផ្តើមពីយើងមុនគេ ព្រោះបើប្រៀបធៀបពីធនធានមនុស្ស និងចំនួនមនុស្សដែលយើងមានពេលនេះ គឺយើងមិនអន់ជាងគេនោះទេ»៕
