នាវាទេសចរណ៍ ឈ្មោះ SEVEN SEAS EXPLORER បានចូលចតកំពង់ផែក្រុងព្រះសីហនុ កាលពីថ្ងៃទី ១២ ខែកុម្ភៈ។ រូបថត PSA
ភ្នំពេញៈ បន្ទាប់ពីឆ្លងកាត់ដំណាក់កាលដ៏លំបាករយៈពេលជាង ៣ ឆ្នាំជាប់គ្នារួចមក វិស័យទេសចរណ៍កម្ពុជានៅក្នុងឆ្នាំ ២០២៤ នេះត្រូវអ្នកជំនាញអះអាងថា នឹងមានភាពល្អប្រសើរឡើងវិញ ខណៈឆ្នាំ ២០២៣ ដែលទើបកន្លងផុតជាង ១ ខែមកនេះកម្ពុជាទទួលបានភ្ញៀវទេសចរបរទេសជិត ៥,៥ លាននាក់។
យោងតាមទិន្នន័យក្រសួងទេសចរណ៍ ក្នុងឆ្នាំ ២០២៣ មានភ្ញៀវទេសចរបរទេសចំនួន ៥,៤៥ លាននាក់ បានធ្វើដំណើរមកប្រទេសកម្ពុជា កើនឡើង ១៣៩,៥ ភាគរយ បើធៀបនឹងឆ្នាំ ២០២២ ក្នុងនោះភ្ញៀវជនជាតិថៃ មានចំនួនច្រើនជាងគេ គឺ ១,៨២ លាននាក់ (កើន ១១៣,៣ ភាគរយ) តាមពីក្រោយដោយជនជាតិវៀតណាមចំនួន ១,០២ លាននាក់ (កើន ១១៩,៨ភាគរយ), ចិន ០,៥៥ លាននាក់ (កើន ៤១២,៦ ភាគរយ) និងឡាវ ០,៣៧ លាននាក់ (កើន ៣០២ ភាគរយ) ក្រៅពីនោះមាន អាមេរិក កូរ៉េ ឥណ្ឌូនេស៊ី បារាំង ចក្រភពអង់គ្លេស និងម៉ាឡេស៊ី ជាដើម។
កត្តារួមផ្សំជាច្រើននឹងជួយឱ្យកម្ពុជាទទួលបានភ្ញៀវបរទេសច្រើននៅក្នុងឆ្នាំ ២០២៤
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន បានប្រាប់ ភ្នំពេញ ប៉ុស្តិ៍ថា បរិបទសេដ្ឋកិច្ចសកល និងកត្តាខាងក្នុងរបស់ប្រទេសកម្ពុជានឹងជួយឱ្យកម្ពុជាទាក់ទាញភ្ញៀវទេសចរបរទេសឱ្យមកកម្សាន្តកាន់តែច្រើនក្នុងឆ្នាំ ២០២៤ នេះ។
លោកស្រីពន្យល់ថា កត្តាខាងក្រៅដែលនឹងផ្តល់ផលវិជ្ជមានដល់វិស័យទេសចរណ៍នៅលើពិភពលោកនោះ គឺការផុតរលត់ក្តីបារម្ភការឆ្លងរាលដាលជំងឺកូវីដ ១៩ ខណៈកត្តាខាងក្នុងសំដៅដល់កិច្ចខិតខំ និងសមិទ្ធផលដែលរាជរដ្ឋាភិបាល និងផ្នែកឯកជនកម្ពុជា កំពុងធ្វើក្នុងន័យបង្កើនភាពទាក់ទាញចំណាប់អារម្មណ៍ទេសចរជាតិ និងអន្តរជាតិឱ្យដើរកម្សាន្តនៅកម្ពុជា។
លោកស្រីបានបន្តថា គន្លឹះសំខាន់ៗនៃកត្តាខាងក្នុង រួមមាន ស្ថិរភាពនយោបាយ, សន្តិសុខ, ការរៀបចំហេដ្ឋារចនាសម្ព័ន្ធផ្លូវថ្នល់, កំណើនការតភ្ជាប់ជើងហោះហើរត្រង់ជាមួយប្រទេសនានា, ការបើកដំណើរការឡើងវិញសេវាកម្មសំខាន់ក្នុងវិស័យទេសចរណ៍, ការដាក់ចេញយុទ្ធសាស្ត្រថ្មីៗរបស់រាជរដ្ឋាភិបាលក្នុងការជួយគាំទ្រ និងផ្សព្វផ្សាយវិស័យទេសចរណ៍, និងការដាក់ឱ្យប្រើប្រាស់កាន់តែទូលំទូលាយ និងសម្បូរបែបនៃប្រព័ន្ធឌីជីថល។
លោកស្រីថ្លែងថា៖ «ឆ្នាំ ២០២៤ នេះខ្ញុំមានការរំពឹងខ្ពស់ថា វិស័យទេសចរណ៍កម្ពុជានឹងមានកំណើនខ្ពស់ជាងឆ្នាំ ២០២៣។ កំណើនភ្ញៀវទេសចរ ពិសេសទេសចរបរទេស នឹងជួយឱ្យកម្ពុជារក្សាបានកំណើនប្រាក់ចំណូលគ្រួសារ និងសេដ្ឋកិច្ចជាតិ»។
យោងតាមលោកស្រី ស៊ីវលីន កិច្ចខិតខំរបស់ប្រមុខរដ្ឋាភិបាល លោក ហ៊ុន ម៉ាណែត ដែលទៅជួបពិភាក្សា និងផ្សព្វផ្សាយពីសក្តានុពលវិស័យទេសចរណ៍ជាមួយបណ្តាថ្នាក់ដឹកនាំប្រទេសនានា និងក្រុមហ៊ុនអន្តរជាតិធំៗ កំពុងក្លាយជាកម្លាំងចលករ និងជាមេដែកដ៏មានថាមពលក្នុងការទាក់ទាញភ្ញៀវទេសចរ និងអ្នកវិនិយោគបរទេសឱ្យធ្វើដំណើរមកកម្ពុជា។
ចំនួនភ្ញៀវទេសចរអន្តរជាតិនៅតាមគោលដៅសំខាន់ៗបានបង្ហាញសញ្ញាវិជ្ជមានជាបន្តបន្ទាប់
ប្រធានក្រុមហ៊ុនទេសចរណ៍ PTM Travel & Tours Co.,Ltd លោក សសារិន បានឱ្យដឹងថា បន្ទាប់ពីការរីករាលដាលជំងឺកូវីដ ១៩ រមណីយដ្ឋានទេសចរណ៍នានា ពិសេសទេសចរណ៍ធម្មជាតិគឺទទួលបានការចាប់អារម្មណ៍ច្រើនពីសំណាក់ភ្ញៀវ ខណៈរដ្ឋាភិបាល និងផ្នែកឯកជនក៏កំពុងខំផ្សព្វផ្សាយ និងលើកកម្ពស់ទេសចរណ៍ធម្មជាតិផងដែរនាប៉ុន្មានឆ្នាំចុងក្រោយនេះ។
លោកប្រាប់ថា៖ «វាជាឱកាសមួយដែលយើងត្រូវរួមដៃគ្នាព្រោះវាអាចផ្តល់នូវផាសុកភាព សុវត្ថិភាព និងអនាម័យសម្រាប់ភ្ញៀវទេសចរ ខណៈប្រទេសកម្ពុជាមានទាំងតំបន់ទេសចរណ៍បែបប្រវត្តិសាស្ត្រ ធម្មជាតិ សមុទ្រ និងរមណីយដ្ឋានកែច្នៃ ជាច្រើន»។
បន្ថែមពីលើនេះ លោក អនហេង សុភ័ក្រ ប្រធានសមាគមមគ្គុទេសក៍ទេសចរណ៍ភាសាចិនកម្ពុជា បានឱ្យដឹងថា បន្ទាប់ពីការគំរាមកំហែងពីជំងឺកូវីដ ១៩ បានបិទបញ្ចប់ចំនួនភ្ញៀវបរទេសដែលធ្វើដំណើរមកកម្ពុជាកាលពីឆ្នាំ ២០២៣ បានកើនឡើងគួរឱ្យកត់សម្គាល់ ហើយចំនួននេះត្រូវបានព្យាករថានឹងកើនបន្ថែមទៀតក្នុងឆ្នាំ ២០២៤ នេះ។
លោកថ្លែងថា៖ «ក្នុងនាមប្រតិបត្តិករទេសចរណ៍យើងមានសុទិដ្ឋិនិយមថា ប្រទេសកម្ពុជានឹងទទួលបានកំណើនភ្ញៀវទេសចរច្រើនបន្ថែមទៀត ពិសេស ជនជាតិចិន ខណៈឆ្នាំ ២០២៤ រដ្ឋាភិបាលប្រទេសទាំង ២ កំណត់ថាជាឆ្នាំផ្លាស់ប្ដូរវប្បធម៌ និងប្រជាជន»។
ចំណូលពីទេសចរអន្តរជាតិកើនជាង ១១៥ ភាគរយ ក្នុងឆ្នាំ ២០២៣
ទិន្នន័យក្រសួងទេសចរណ៍ ឱ្យដឹងថា ក្នុងឆ្នាំ ២០២៣ វិស័យទេសចរណ៍អន្តរជាតិបានផ្តល់ចំណូលចូលសេដ្ឋកិច្ចកម្ពុជា ប្រមាណ ៣,០៤ ពាន់លានដុល្លារ កើនឡើង ១១៥ ភាគរយ ពីចំនួន ១,៤១ ពាន់លានដុល្លារ កាលពីឆ្នាំ ២០២២។
ប្រធានសមាគមមគ្គុទ្ទេសក៍ទេសចរអង្គរលោក ខៀវ ធី បានប្រាប់ថា កាលពីឆ្នាំ ២០១៩ វិស័យទេសចរណ៍បានចូលរួមចំណែកយ៉ាងច្រើនក្នុងការផ្តល់ចំណូលសម្រាប់គ្រួសារ និងសេដ្ឋកិច្ចជាតិ ពិសេសអ្នកនៅខេត្តសៀមរាប។
លោកបន្តថា ដើម្បីអាចទាក់ទាញភ្ញៀវបរទេសឱ្យធ្វើដំណើរមកកម្ពុជាច្រើន គឺទាមទារឱ្យរដ្ឋាភិបាល និងផ្នែកឯកជនត្រូវរួមគ្នាធ្វើកិច្ចការមួយចំនួនដូចជា ការធានាសុវត្ថិភាព, បរិស្ថានអនាម័យ, សេវាកម្ម, វត្ថុអនុស្សាវរីយ៍ដែលលក់ឱ្យភ្ញៀវគឺមានគុណភាពល្អ, ការបង្កើតរមណីយដ្ឋានថ្មីៗ, និងការភ្ជាប់ជើងហោះហើរអន្តរជាតិទៅគោលដៅទេសចរណ៍ឱ្យបានច្រើនជាងមុន។
លោកលើកឡើងថា៖ «ក្នុងនាមអ្នកនៅក្នុងវិស័យទេសចរណ៍យើងពិតជាចង់ឱ្យភ្ញៀវទេសចរបរទេសធ្វើដំណើរមកកម្ពុជា។ ចំនួនភ្ញៀវទេសចរ និងការស្នាក់នៅយូរនឹងជួយឱ្យអ្នកក្នុងវិស័យនេះទទួលបានចំណូលច្រើន»។
នាវាទេសចរណ៍ ឈ្មោះ SEVEN SEAS EXPLORER បានចូលចតកំពង់ផែក្រុងព្រះសីហនុ កាលពីថ្ងៃទី ១២ ខែកុម្ភៈ។ រូបថត PSA
កម្ពុជារំពឹងទទួលបានកំណើនភ្ញៀវទេសចរពីប្រទេសធំបន្ថែមទៀត
ក្នុងមហិច្ឆតាទាក់ទាញភ្ញៀវបរទេសឱ្យធ្វើដំណើរមកកម្ពុជាកាន់តែច្រើនរាជរដ្ឋាភិបាលកម្ពុជាក៏បាននិងកំពុងខិតខំបង្កើនការផ្សព្វផ្សាយទៅគោលដៅធំៗមួយចំនួន ពិសេសប្រទេសនៅក្នុងតំបន់ដែលមានប្រជាជនច្រើនដូចជា ឥណ្ឌា និងឥណ្ឌូនេស៊ី ជាដើម។
រដ្ឋមន្ត្រីក្រសួងទេសចរណ៍ លោក សុខ សូកេន នៅក្នុងជំនួបជាមួយនឹងលោកស្រី Devyani Khobragade ឯកអគ្គរដ្ឋទូតសាធារណរដ្ឋឥណ្ឌាប្រចាំកម្ពុជា កាលពីថ្ងៃទី ២២ ខែកញ្ញា ឆ្នាំ២០២៣ និងជំនួបជាមួយលោក Santo Darmosumarto ឯកអគ្គរដ្ឋទូតឥណ្ឌូនេស៊ីប្រចាំកម្ពុជា កាលពីថ្ងៃទី ១៣ ខែកុម្ភៈ ឆ្នាំ ២០២៤ គឺលោករដ្ឋមន្ត្រីសុទ្ធតែបានស្នើឱ្យគូសន្ទនាជួយជំរុញឱ្យភ្ញៀវទេសចរជនជាតិរបស់ពួកគេធ្វើដំណើរមកកម្សាន្តនៅកម្ពុជាឱ្យបានច្រើន ក៏ដូចជាការបង្កើនចំនួនជើងហោះហើរត្រង់មកកាន់គោលដៅទេសចរណ៍សំខាន់ៗកម្ពុជាផងដែរ។
យោងតាមគេហទំព័រ worldometers.info គិតត្រឹមថ្ងៃទី ១៥ ខែកុម្ភៈ ឆ្នាំ ២០២៤ ឥណ្ឌា គឺជាប្រទេសដែលមានប្រជាជនច្រើនជាងគេលើពិភពលោក គឺប្រមាណ ១ ៤៣៦,៨៣ លាននាក់ នាំមុខប្រទេសចិននៅលេខ ២ ដែលមានប្រជាជន ១ ៤២៥,៤៤ លាននាក់។ ចំណែកឥណ្ឌូនេស៊ី ស្ថិតនៅលេខ ៤ ដោយមានប្រជាជនសរុប ២៧៨,៩៥ លាននាក់។
កំណើនជើងហោះហើរផ្លូវអាកាស
អ្នកនាំពាក្យរដ្ឋលេខាធិការដ្ឋានអាកាសចរស៊ីវិល លោក ស៊ីន ចាន់សិរីវុត្ថា កាលពីពេលថ្មីៗនេះបានប្រាប់សារព័ត៌មានក្នុងស្រុកថា កំណើនក្នុងវិស័យដឹកជញ្ជូនតាមផ្លូវអាកាសកាលពីឆ្នាំ ២០២៣ ធៀបនឹងឆ្នាំ ២០២២ គឺចំនួន ១១៥ ភាគរយ។
លោកបន្តថា តាមរយៈការខិតខំរបស់រដ្ឋាភិបាលក្នុងការផ្សព្វផ្សាយ និងបង្កើនកិច្ចសហប្រតិបត្តិការជាមួយប្រទេស និងក្រុមហ៊ុនជាច្រើននោះ លោករំពឹងថា ចំនួនអ្នកដំណើរតាមផ្លូវអាកាសមកកម្ពុជានឹងមានច្រើនក្នុងឆ្នាំ ២០២៤ នេះ។
លោកថ្លែងថា៖ «សរុបទៅគឺយើងនៅតែមានវឌ្ឍនភាព។ ក្នុងឆ្នាំនេះវាអាចនឹងមានកំណើនទៀត។ ក្រសួងទេសចរណ៍ ក៏ដូចជារដ្ឋលេខាធិការដ្ឋានអាកាសចរស៊ីវិលបានព្យាករថា នៅចុងឆ្នាំ ២០២៤ ចំនួនទេសចរអាចវិលត្រឡប់មកស្មើនឹងចំនួនភ្ញៀវទេសចរនៅឆ្នាំ ២០១៩ វិញ»។
បើតាមលោក ចាន់សិរីវុត្ថា បន្ទាប់ពីផ្អាកអំឡុងពេលកូវីដ ១៩ ពេលនេះមានក្រុមហ៊ុនអាកាសចរណ៍តភ្ជាប់ជើងហោះហើរឡើងវិញជាមួយកម្ពុជាចំនួន ៣៤ ក្រុមហ៊ុន ខណៈឆ្នាំ ២០១៩ មានក្រុមហ៊ុនអាកាសចរណ៍ប្រតិបត្តិការជើងហោះហើរប្រហែល ៥០។
ឆ្នាំ ២០១៩ គឺជាពេលដែលប្រទេសកម្ពុជាទទួលបានភ្ញៀវអន្តរជាតិច្រើនបំផុតដោយមានចំនួន ៦,៦១ លាននាក់ កើន ៦,៦ ភាគរយ។ ចំណូលដែលកម្ពុជាទទួលបានពី ទេសចរអន្តរជាតិ ៤,៩២ ពាន់លានដុល្លារ។ វិស័យទេសចរណ៍បានរួមចំណែកក្នុងផលិតផលក្នុងស្រុកសរុប ១២,១ ភាគរយ។ នេះបើតាមក្រសួងទេសចរណ៍៕
