យន្តហោះចុះចតនៅព្រលានយន្តហោះអន្តរជាតិភ្នំពេញ នាពេលកន្លងទៅ។ ហេង ជីវ័ន
ភ្នំពេញៈ ស្របពេលស្ថានភាពការរីករាលដាលជំងឺកូវីដ ១៩ មានភាពធូរស្រាលចាប់តាំងពីចុងឆ្នាំ ២០២២ វិស័យអាកាសចរណ៍ស៊ីវិលបានចាប់ផ្តើមងើបឡើងវិញទាំងក្នុងតំបន់ និងពិភពលោក។ ការណ៍នេះវិស័យអាកាសចរណ៍ស៊ីវិលប្រទេសកម្ពុជាក៏ទទួលបាននូវកំណើនខ្ពស់កាលពីឆ្នាំ ២០២៣ ផងដែរគឺក្នុងអត្រាជាង ២០០ ភាគរយ ប៉ុន្តែនៅទាបជាងអត្រាកំណើនមុនការផ្ទុះការរីករាលដាលនៃវិបត្តិសុខភាពសកល។
ការវិលត្រឡប់មកវិញនៃទេសចរអន្តរជាតិជំរុញឱ្យការហោះហើរមានកំណើនខ្លាំង
យោងតាមរបាយការណ៍រដ្ឋលេខាធិការដ្ឋានអាកាសចរស៊ីវិល (SSCA) ក្នុងឆ្នាំ ២០២៣ កម្ពុជាទទួលបានអ្នកដំណើរតាមផ្លូវអាកាស ៥ ១១១ ៨១០ នាក់ កើន ១១៥ ភាគរយ ធៀបនឹងឆ្នាំ ២០២២។ ក្នុងនោះអ្នកដំណើរក្នុងស្រុកចំនួន ១៩ ៥៧៦ នាក់ និងអ្នកដំណើរក្រៅស្រុក ៤ ៩១៦ ០៦៤ នាក់។
យោងតាម SSCA ក្នុងឆ្នាំ ២០២៣ កម្ពុជាមានក្រុមហ៊ុនអាកាសចរណ៍សរុបចំនួន ៣៣ មានកំណើន ២៧ ភាគរយ បើធៀបឆ្នាំ ២០២២ មានចំនួន ២៦ ក្នុងនោះក្រុមហ៊ុនក្នុងស្រុកចំនួន ៤ និងក្រុមហ៊ុនក្រៅស្រុក ២៩។
ស្ថិតិជើងហោះហើរក្នុងឆ្នាំ ២០២៣ របស់អាកាសយានដ្ឋានអន្តរជាតិទាំង ៣ នៅកម្ពុជាគឺទទួលបានជើងហោះហើរសរុបចំនួន ៥១ ១៤៩ ជើង កើនពី ២៨ ៨៩៨ មានកំណើន ៧៧ ភាគរយ។ ក្នុងនោះចំនួនជើងហោះហើរក្នុងស្រុកមាន ៤ ៦៧៥ ជើង និងក្រៅស្រុកមានចំនួន ៤៦ ៤៧៤ ជើង។
ស្ថិតិជើងហោះហើររំលងលើកម្ពុជាមានចំនួន ៦៣ ០៨៧ ជើង កើនពី ៤៩ ១០២ ជើងក្នុងឆ្នាំ ២០២២។
អ្នកនាំពាក្យនៃ SSCA លោក ស៊ីនចាន់សិរីវុត្ថា បានប្រាប់ភ្នំពេញប៉ុស្តិ៍ថា តួលេខនេះ គឺបញ្ជាក់ពីភាពរីកចម្រើនជាក់ស្តែងក្នុងវិស័យអាកាសចរណ៍ស៊ីវិលរបស់ប្រទេសកម្ពុជាក្រោយពីការរីករាលដាលជំងឺកូវីដ ១៩។
លោកថ្លែងថា៖ «យើងឃើញថាផ្អែកតាមតួលេខដែលយើងមាន គឺកម្ពុជាទទួលបានកំណើនខ្ពស់កាលពីឆ្នាំ ២០២៣ បើធៀបនឹងឆ្នាំ ២០២២។ ការណ៍នេះបង្ហាញអំពីការត្រឡប់មកវិញនៃភ្ញៀវទេសចរ»។
បើតាមរបាយការណ៍ដដែលរបស់ SSCA ការដឹកជញ្ជូនតាមផ្លូវអាកាសកម្ពុជាទទួលបានកំណើនដ៏ទាបក្នុងឆ្នាំ ២០២៣ ក្នុងនោះទំនិញក្នុងស្រុកមានចំនួន ១៧ តោន និងក្រៅស្រុកមានចំនួន ៥៥ ៨៦២ តោន។
លោក ចាន់សិរីវុត្ថា បានបន្ថែមថា សម្រាប់ការដឹកទំនិញតាមផ្លូវអាកាសកាលពីឆ្នាំ ២០២៣ គឺកើនឡើងទាបដោយសារតែនៅអំឡុងពេលការផ្ទុះការរីករាលដាលជំងឺកូវីដ ១៩ ការដឹកជញ្ជូនតាមផ្លូវអាកាសមានតម្រូវការខ្ពស់ លុះដល់វិបត្តិនេះបិទបញ្ចប់ ការដឹកទំនិញតាមផ្លូវគោក និងផ្លូវទឹកក៏ចាប់ផ្តើមដំណើរការធម្មតាវិញ ជាហេតុធ្វើឱ្យការដឹកជញ្ជូនតាមផ្លូវអាកាសមានកំណើនទាបវិញ។
លោកបញ្ជាក់ថា៖«ខ្ញុំយល់ថា កើន ១ ភាគរយនេះគឺយើងនៅរក្សាបានកំណើនក្នុងកម្រិតមួយជាជាងពុំមានកំណើនសោះ។ ខ្ញុំមានជឿថា នៅឆ្នាំ ២០២៥ ខាងមុខយើងនឹងអាចមានកំណើនគ្រាន់បើបន្ទាប់ពីអាកាសយានដ្ឋានអន្តរជាតិតេជោដាក់ឱ្យដំណើរការទូលំទូលាយ ដូច្នេះយើងនឹងមានក្រុមហ៊ុនអាកាសចរណ៍ធំៗតភ្ជាប់មកប្រទេសកម្ពុជា ប៉ុន្តែវាក៏ត្រូវអាស្រ័យលើស្ថានភាពសេដ្ឋកិច្ច ជាពិសេសផ្នែកផលិតកម្មក្នុងស្រុក»។
វិស័យអាកាសចរណ៍នឹងបន្តកើនឡើងជាមួយការបន្តពង្រីកការហោះហើររបស់កម្ពុជា
ទិន្នន័យក្រសួងទេសចរណ៍ ឱ្យដឹងថា ក្នុងឆ្នាំ ២០២៣ មានភ្ញៀវបរទេសចំនួន ៥,៤៥ លាននាក់បានចូលមកប្រទេសកម្ពុជា ដោយចំនួននេះកើន ១៣៩,៥ ភាគរយបើធៀបឆ្នាំ ២០២២ ចំណែកប្រាក់ចំណូលពីវិស័យទេសចរណ៍អន្តរជាតិ គឺ ៣,០៤ ពាន់លានដុល្លារ កើនឡើង ១១៥ ភាគរយបើធៀបនឹងឆ្នាំ ២០២២។
ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា លោក ធួន ស៊ីណាន បានប្រាប់ ភ្នំពេញ ប៉ុស្តិ៍ថា ការទទួលបានកំណើននៃការហោះហើរតាមផ្លូវអាកាសកន្លងមកនេះ ដោយសារតែមានក្រុមហ៊ុនអាកាសចរណ៍អន្តរជាតិមួយចំនួនបានបើកដំណើរការឡើងវិញជាបន្តបន្ទាប់ គឺអាចចាត់ទុកជាចំណុចវិជ្ជមានមួយ ប៉ុន្តែវិបត្តិសេដ្ឋកិច្ចដែលបណ្តាលមកពីសង្គ្រាមនៅអ៊ុយក្រែន គឺពិតជាជះឥទ្ធិពលខ្លាំងលើការធ្វើដំណើរកម្សាន្តរបស់ប្រជាជនលើពិភពលោក។
លោកបន្ថែមថា៖ «ដើម្បីទាក់ទាញភ្ញៀវទេសចរឱ្យធ្វើដំណើរមកកម្សាន្តប្រទេសកម្ពុជាកាន់តែច្រើន គឺចាំបាច់កម្ពុជាត្រូវតែខិតខំបង្កើតឱ្យមានការហោះហើរត្រង់ទៅកាន់ទីក្រុងសំខាន់ៗនៅតាមប្រទេសនីមួយៗ ដោយមិនមែនផ្តោតតែទៅលើទីក្រុងរដ្ឋបាលមួយនោះទេ»។ លោកបានបន្ថែមថា៖«ប្រទេសឥណ្ឌា ក៏ជាទីផ្សារគោលដៅសំខាន់ដែលកម្ពុជាត្រូវតែយកចិត្តទុកដាក់ផងដែរ»។
លោក ចាន់សិរីវុត្ថា បាននិយាយថា សម្រាប់ផ្លូវធ្វើដំណើរលេចធ្លោជាងគេនៅក្នុងឆ្នាំ ២០២៣ គឺការធ្វើដំណើរលើផ្លូវអាកាសរវាងប្រទេសកម្ពុជា និងប្រទេសថៃ បន្ទាប់មកវៀតណាម ចិន និងប្រទេសឡាវ។
លោកបានថ្លែងថា៖ «ដូច្នេះផ្លូវហោះហើររវាងប្រទេសទាំង ៤ ក្នុងតំបន់គឺមានកំណើនខ្ពស់ខ្លាំងកាលពីឆ្នាំកន្លងទៅ។ សម្រាប់ឆ្នាំ ២០២៤ នេះ ខ្ញុំរំពឹងថា វិស័យអាកាសចរណ៍ស៊ីវិលយើងនឹងកាន់តែមានភាពល្អប្រសើរថែមទៀត ដោយសារតែស្ថានភាពសេដ្ឋកិច្ចសកល និងក្នុងតំបន់ហាក់មានភាពប្រសើរជាងមុន។ ការណ៍នេះនឹងជំរុញឱ្យសកម្មភាពធ្វើដំណើរតាមផ្លូវអាកាសកាន់តែមានភាពមមាញឹកជាងមុន ស្របពេលជាមួយនឹងការរៀបចំគោលនយោបាយរបស់រាជរដ្ឋាភិបាលយើងផងដែរ»៕
