អាជីវករលក់សាច់ជ្រូកតាមបណ្ដោយផ្លូវវេងស្រេង ក្នុងសង្កាត់កាកាប ខណ្ឌពោធិ៍សែនជ័យ។ ហេង ជីវ័ន
ភ្នំពេញៈ ប្រទេសកម្ពុជា មានអត្រាអតិផរណាទាបបំផុតក្នុងឆ្នាំ ២០២៣ គឺចំនួន ២,១ ភាគរយ ធ្លាក់ចុះពី ៥,៤ ភាគរយ បើធៀបនឹងឆ្នាំ ២០២២ ដោយសារផលិតផលសំខាន់ៗមួយចំនួនទាក់ទងប្រេងឥន្ធនៈ និងឧស្ម័នបានធ្លាក់ចុះយ៉ាងខ្លាំង។ ក្រុមអ្នកជំនាញអះអាងថា អត្រាអតិផរណាទាបក៏ឆ្លុះបញ្ចាំងពីភាពល្អប្រសើរនៃផលិតកម្មក្នុងស្រុក ដោយកម្ពុជាបានក្លាយជាប្រទេសសំខាន់ក្នុងការផ្គត់ផ្គង់គ្រឿងឧបភោគបរិភោគនៅលើទីផ្សារតំបន់ និងពិភពលោក។
ឧបសគ្គខាងក្រៅមិនប៉ះពាល់ធ្ងន់ធ្ងរដល់ផលិតកម្មក្នុងស្រុក
ទោះបីសេដ្ឋកិច្ចពិភពលោកកាលពីឆ្នាំ ២០២៣ មានភាពមិនច្បាស់លាស់ដែលបណ្តាលមកពីសង្គ្រាមរវាងរុស្ស៊ី-អ៊ុយក្រែន ដែលកំពុងបន្ត និងការប្រកួតប្រជែងភូមិសាស្ត្រនយោបាយនៅក្នុងចំណោមប្រទេសមហាអំណាច ក៏បានជំរុញឱ្យតម្លៃស្បៀងអាហារកើនឡើងតិចតួចប៉ុណ្ណោះ ជាពិសេសការធ្លាក់ចុះតម្លៃប្រេងឆៅដែលនាំឱ្យតម្លៃម្ហូបអាហារផ្សេងទៀតធ្លាក់ចុះយ៉ាងខ្លាំង។
បើយោងតាមរបាយការណ៍ប្រចាំឆ្នាំ ២០២៣ របស់ធនាគារជាតិនៃកម្ពុជា (NBC) អតិផរណារួមរបស់កម្ពុជានៅឆ្នាំ ២០២៣ មានកម្រិត ២,១ ភាគរយ ទាបជាងឆ្នាំ ២០២២ (៥,៤ ភាគរយ) ដោយសារការថយចុះថ្លៃក្រុមទំនិញ និងសេវាពាក់ព័ន្ធ និងប្រេងឥន្ធនៈ និងការថមថយអតិផរណាម្ហូបអាហារ។
NBC បានឱ្យដឹងថា ថ្លៃក្រុមទំនិញ និងសេវាពាក់ព័ន្ធនឹងប្រេងឥន្ធនៈបានថយចុះ ២,៧ ភាគរយ បន្ទាប់ពីកើនឡើងគួរឱ្យកត់សម្គាល់ដល់ ១១,១ ភាគរយនៅឆ្នាំ ២០២២ ព្រោះតម្លៃប្រេងឆៅពិភពលោកថយចុះមកវិញ ២៨,១ ភាគរយ ពីជាមធ្យម ១០០,៨ ដុល្លារអាមេរិកក្នុង ១ បារ៉ែលនៅឆ្នាំ ២០២២ មក ៧៧,៧ ដុល្លារនៅក្នុងឆ្នាំ ២០២៣។ នៅកម្ពុជាថ្លៃសាំងធ្លាក់ចុះ ៥,៦ ភាគរយធៀបនឹងកំណើន ២៤,៤ ភាគរយនៅឆ្នាំ ២០២២ ថ្លៃឧស្ម័នធ្លាក់ចុះ ៤,៧ ភាគរយធៀប ៥,៤ ភាគរយ។
NBC បញ្ជាក់ថា៖ «អតិផរណាម្ហូបអាហារបានថមថយមក ៣,២ ភាគរយ ធៀបនឹង ៥ ភាគរយនៅឆ្នាំ ២០២២ ដោយសារការថយសម្ពាធពីចំណាយថ្លៃដើមដូចជា ជីកសិកម្ម ប្រេងឥន្ធនៈ និងថ្លៃដឹកជញ្ជូន ស្របពេលការផ្គត់ផ្គង់ផលិតផលកសិកម្មក្នុងស្រុកបន្តកើនឡើង»។
ការណ៍នេះដោយសារអតិផរណាម្ហូបអាហារសំខាន់ៗបានថយចុះ ដូចជា ថ្លៃអង្ករពី ២,៤ ភាគរយមក ១,៥ ភាគរយ, សាច់ពី ៤,៣ ភាគរយមក ២,៥ ភាគរយ,ត្រីពី ៥ ភាគរយមក ៤,២ ភាគរយ, ថ្លៃបន្លែពី ៧,៩ ភាគរយមក ៥,១ ភាគរយ, និងថ្លៃផ្លែឈើពី ៧,៧ ភាគរយមក ៤,២ ភាគរយ។
សម្រាប់អតិផរណាស្នូល បានថយមកកម្រិត ២ ភាគរយ ធៀបនឹង ៤,៤ ភាគរយនៅឆ្នាំ ២០២២ ដែលបណ្តាលមកពីឥទ្ធិពលនៃការថយថ្លៃទំនិញ និងសេវាពាក់ព័ន្ធប្រេងឥន្ធនៈ និងកម្រិតទាបនៃអតិផរណាម្ហូបអាហារ។
ចំពោះអតិផរណាទំនិញ និងសេវាស្នូលសំខាន់ៗបានថមថយដូចជាក្រុមភោជនីយដ្ឋាន ចុះពី ៦,៦ ភាគរយមក ២,១ ភាគរយ, ក្រុមសម្លៀកបំពាក់ និងស្បែកជើងថយពី ៧,៤ ភាគរយមក ៣,១ ភាគរយ, ថ្លៃក្រុមកម្សាន្ត និងវប្បធម៌ ថយពី ៥,៦ ភាគរយមក ៣,១ ភាគរយ និងថ្លៃក្រុមដឹកជញ្ជូនមិនរាប់បញ្ចូលទំនិញ និងសេវាពាក់ព័ន្ធប្រេងឥន្ធនៈ ថយពី ២,១ ភាគរយមក ១,១ ភាគរយ។ នេះបើយោងតាម NBC។
លោកស្រី ជា សិរី ទេសាភិបាលនៃ NBC បានថ្លែងក្នុងកម្មវិធីសន្និបាតបូកសរុបការងារប្រចាំឆ្នាំ ២០២៣ កាលពីចុងខែមករាថា អតិផរណាកម្ពុជាក្នុងឆ្នាំ ២០២៣ បានថយចុះមកវិញត្រឹម ២,១ ភាគរយធៀបនឹងអត្រាខ្ពស់ ៥,៤ ភាគរយកាលពីឆ្នាំ ២០២២។
លោកស្រីបន្តថា កម្ពុជារក្សាបានតម្លៃប្រាក់រៀលធៀបនឹងដុល្លារអាមេរិកឱ្យមានស្ថិរភាពល្អប្រសើរ ដោយមានអត្រាប្រែប្រួលទាបជាង ២ ភាគរយប៉ុណ្ណោះ បើធៀបនឹងការប្រែប្រួលតម្លៃរូបិយប័ណ្ណនៅប្រទេសមួយចំនួន។
លោកស្រីថ្លែងថា៖ «ស្ថិរភាពអត្រាប្តូរប្រាក់បានរួមចំណែកសំខាន់ក្នុងការពង្រឹងជំនឿចិត្តវិនិយោគិន គ្រប់គ្រងសម្ពាធអតិផរណាបានមួយផ្នែកក៏ដូចជារក្សាស្ថិរភាពម៉ាក្រូសេដ្ឋកិច្ច»។
បើតាមលោកស្រី សិរី ការរក្សាបានស្ថិរភាពអត្រាប្តូរប្រាក់រៀលធៀបនឹងដុល្លារអាមេរិក គឺជាចម្បងអាស្រ័យដោយការអនុវត្តនយោបាយរូបិយវត្ថុប្រកបដោយភាពប្រុងប្រយ័ត្ន តាមរយៈការគ្រប់គ្រងចរាចរណ៍ប្រាក់រៀលសមស្រប និងការធ្វើអន្តរាគមន៍លក់ប្រាក់ដុល្លារអាមេរិកនៅលើទីផ្សារប្តូរប្រាក់តាមការចាំបាច់។
លោកស្រីបន្តថា ការងារនេះអាចសម្រេចទៅបាន ដោយសារការរក្សាបានកម្រិតខ្ពស់គ្រប់គ្រាន់នៃទុនបម្រុងអន្តរជាតិ ដែលបានកើនដល់ប្រមាណ ២០ ពាន់លានដុល្លារអាមេរិក គឺកើនឡើង ១២,៣ ភាគរយបើធៀបនឹងឆ្នាំ ២០២២ និងស្មើជាង ៧ ខែនៃការនាំចូលទំនិញ និងសេវានាគ្រាបន្ទាន់។
ការវាយតម្លៃរបស់អង្គការហិរញ្ញវត្ថុអន្តរជាតិ
មូលនិធិរូបិយវត្ថុអន្តរជាតិកាលពីថ្ងៃទី ៣១ ខែមករា ព្យាករថា សេដ្ឋកិច្ចរបស់កម្ពុជានឹងកើនឡើង ៥,៣ ភាគរយ ក្នុងឆ្នាំ ២០២៣ ដែលជំរុញដោយការស្ទុះងើបឡើងវិញនៃវិស័យទេសចរណ៍ និងដំណើរការរឹងមាំក្នុងការនាំចេញមិនមែនសម្លៀកបំពាក់។ ទោះបីយ៉ាងណា ហានិភ័យនៅតែបន្តកើតមាន។ ជាមួយកំណើនខ្សោយជាងការរំពឹងទុកនៅអាមេរិក ដែលមានជាង ៤០ ភាគរយនៃការនាំចេញរបស់កម្ពុជា ហើយការធ្លាក់ចុះសេដ្ឋកិច្ចនៃប្រទេសចិនក៏បង្កហានិភ័យខ្លាំងផងដែរ។
អតិផរណារបស់កម្ពុជាមានការប្រែប្រួល ហើយបន្ទាប់ពីរយៈពេលនៃការធ្លាក់ចុះពីកម្រិតខ្ពស់បំផុតកាលពីខែមិថុនា ឆ្នាំមុន វាបានស្ទុះងើបឡើងវិញដល់ ៣,៩ ភាគរយកាលពីខែតុលា។ នេះបើយោងតាម IMF។
IMF បានឱ្យដឹងទៀតថា៖«ធនាគារកណ្តាលមានវិធានការគាំទ្រនៅក្នុងអំឡុងពេលការរីករាលដាលជំងឺកូវីដ ១៩ ជារឿយៗ រួមទាំងការបង្កើនលក្ខខណ្ឌតម្រូវទុនបម្រុងសម្រាប់រូបិយប័ណ្ណបរទេសផងដែរ»។
ចក្ខុវិស័យអនាគត
ទាំងស្ថាប័ន IMF និង NBC បានព្យាករថា កំណើនសេដ្ឋកិច្ចប្រទេសកម្ពុជា នឹងមានកម្រិត ៦,១ ភាគរយ និង ៦,៤ ភាគរយរៀងគ្នាសម្រាប់ឆ្នាំ ២០២៤ នេះ ដែលគាំទ្រដោយការស្ទុះងើបឡើងវិញនៃវិស័យទេសចរណ៍ និងវិស័យផលិតកម្ម ខណៈដែលអតិផរណាមានកម្រិត ៣ ភាគរយ និង ២,៥ ភាគរយរៀងគ្នា៕
