ផ្នែកឯកជនកម្ពុជាទៅចូលរួមវេទិកាធុរកិច្ច និងវិនិយោគកម្ពុជា-អេមីរ៉ាតអារ៉ាប់រួម។ សហការី
ភ្នំពេញៈ ផ្នែកឯកជនមានសុទិដ្ឋិនិយមថា ការចូលជាធរមាននៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងព្រះរាជាណាចក្រកម្ពុជា និងប្រទេសអេមីរ៉ាតអារ៉ាប់រួម ព្រមទាំងវេទិកាធុរកិច្ច និងវិនិយោគកម្ពុជា-អេមីរ៉ាតអារ៉ាប់រួម ដែលបានរៀបចំនៅប្រទេសអេមីរ៉ាតអារ៉ាប់រួម នឹងជួយជំរុញកិច្ចសហប្រតិបត្តិការផ្នែកពាណិជ្ជកម្ម អចលនទ្រព្យ និងទេសចរណ៍រវាងប្រទេសទាំង ២ ឱ្យបោះជំហានទៅមុខកាន់តែលឿន។
បន្ទាប់ពីបានចំណាយពេលជួបចរចា និងពិភាក្សាគ្នាលើកដំបូងកាលពីខែតុលា ឆ្នាំ ២០២២ នៅទីក្រុងអាប៊ុយដាប៊ី ប្រទេសអេមីរ៉ាតអារ៉ាប់រួម និងបានប្តូរមករាជធានីភ្នំពេញ ទៅវិញទៅមកជាច្រើនលើក កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងព្រះរាជាណាចក្រកម្ពុជា និងប្រទេសអេមីរ៉ាតអារ៉ាប់រួម ត្រូវបានចុះហត្ថលេខាជាផ្លូវការនៅរាជធានីភ្នំពេញ កាលពីថ្ងៃទី ៨ ខែមិថុនា ឆ្នាំ ២០២៣ និងបានចូលជាធរមានកាលពីថ្ងៃទី ៣១ ខែមករា ឆ្នាំ ២០២៤។
ក្នុងគោលបំណងដើម្បីប្រកាសអំពីការចូលជាធរមាននៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយកម្ពុជា-អេមីរ៉ាតអារ៉ាប់រួម និងដើម្បីផ្សព្វផ្សាយអំពីកាលានុវត្តភាពធុរកិច្ច និងវិនិយោគ ក៏ដូចជាការពង្រឹងទំនាក់ទំនងពាណិជ្ជកម្មរវាងប្រទេសទាំង ២ ឱ្យកាន់តែប្រសើរ កាលពីថ្ងៃទី ២៧ ខែកុម្ភៈ ឆ្នាំ ២០២៤ នៅមណ្ឌលសភាពាណិជ្ជកម្ម និងឧស្សាហកម្មអាប៊ុយដាប៊ី មានរៀបចំវេទិកាធុរកិច្ច និងវិនិយោគកម្ពុជា-អេមីរ៉ាតអារ៉ាប់រួម លើកទី ៣ ដែលមានការអញ្ជើញចូលរួមពី លោកស្រី ចម និម្មល រដ្ឋមន្ត្រីក្រសួងពាណិជ្ជកម្មកម្ពុជា និងលោក Ahmed bin Ali Al Sayegh រដ្ឋមន្ត្រីក្រសួងការបរទេសអេមីរ៉ាតអារ៉ាប់រួម ព្រមទាំងមានការចូលរួមពីតំណាងសភាពាណិជ្ជកម្ម និងក្រុមហ៊ុនរដ្ឋ និងឯកជនជាច្រើននៃប្រទេសទាំង ២។
វេទិកាធុរកិច្ច និងវិនិយោគកម្ពុជា-អេមីរ៉ាតអារ៉ាប់រួម ជំរុញឱ្យវិនិយោគិនប្រទេសទាំង ២ សម្លឹងឃើញឱកាសទៅវិញទៅមក
ស្ថាបនិក និងជាម្ចាស់ក្រុមហ៊ុន Keller Williams Cambodia និងក្រុមហ៊ុន Khmer Real Estate លោក គីម ហ៊ាង ដែលទើបត្រឡប់មកពីចូលរួមក្នុងវេទិកា Cambodia-United Arab Emirate Business and Investment Forum បានប្រាប់ ភ្នំពេញ ប៉ុស្តិ៍ នៅថ្ងៃទី ២៩ ខែកុម្ភៈថា ក្នុងនាមជាវិនិយោគិនខ្មែរ ១ រូប លោកពិតជាមើលឃើញពីឱកាស និងអត្ថប្រយោជន៍ជាច្រើនដែលនឹងកើតពីកិច្ចសហប្រតិបត្តិការរវាងប្រទេសកម្ពុជា និងអេមីរ៉ាតអារ៉ាប់រួម ដែលជាប្រទេសមានសេដ្ឋកិច្ចរីកចម្រើនលើពិភពលោក។
លោកបន្តថា កម្ពុជា-អេមីរ៉ាតអារ៉ាប់រួម នឹងមានឱកាសច្រើនក្នុងការពង្រឹង និងពង្រីកកិច្ចសហប្រតិបត្តិការផ្នែកពាណិជ្ជកម្ម ដោយផ្តើមចេញពីវិស័យទេសចរណ៍ ខណៈពី ១ ឆ្នាំៗទៅ ១ ឆ្នាំ ចំនួនប្រជាជនខ្មែរធ្វើដំណើរទៅកម្សាន្តនៅប្រទេសអេមីរ៉ាតអារ៉ាប់រួម បានកើនឡើងជាបន្តបន្ទាប់ ប៉ុន្តែសម្រាប់ទេសចរអេមីរ៉ាតអារ៉ាប់រួម មកកម្ពុជា គឺមានចំនួនតិចតួចដោយសារតែកង្វះការផ្សព្វផ្សាយ។
លោកបានថ្លែងថា៖ «នៅក្នុងដំណើរទស្សនកិច្ចជាលើកដំបូងទៅប្រទេសអេមីរ៉ាតអារ៉ាប់រួម ខ្ញុំបានមើលឃើញពីឱកាសយ៉ាងច្រើនដែលប្រទេសទាំង ២ អាចធ្វើជាមួយគ្នា ខណៈប្រទេសអេមីរ៉ាតអារ៉ាប់រួម រួមទាំងប្រទេសនៅតំបន់អារ៉ាប់ក្បែរៗនោះ គឺសុទ្ធតែជាប្រទេសអ្នកមាន និងជាប្រទេសដែលមានគោលនយោបាយវិនិយោគដ៏ល្អ និងទាក់ទាញបំផុត»។
លោកបន្តថា៖ «ផ្អែកលើស្ថានភាពទូទៅនៅប្រទេសអេមីរ៉ាតអារ៉ាប់រួម ខ្ញុំមើលឃើញថា ផលិតផលកសិកម្មរបស់កម្ពុជាគឺមានឱកាសច្រើនក្នុងការចាប់យកចំណែកទីផ្សារនៅទីនោះ ដោយសារតែផលិតផលកសិកម្មកម្ពុជាមានគុណភាពល្អ តម្លៃសមរម្យ ហើយតម្រូវការនៅទីនោះក៏មានច្រើនដែរ»។
វិស័យអចលនទ្រព្យកម្ពុជាអាចរៀនពីប្រទេសអេមីរ៉ាតអារ៉ាប់រួម
ទាក់ទងនឹងវិស័យអចលនទ្រព្យ និងសំណង់ លោក គីម ហ៊ាង បានអះអាងថា ប្រទេសនៅតំបន់អារ៉ាប់ គឺមានភាពរីកចម្រើនខ្លាំង ហើយទីផ្សារនៅក្នុងប្រទេសអេមីរ៉ាតអារ៉ាប់រួម គឺបានទាក់ទាញវិនិយោគិនបរទេសឱ្យទៅវិនិយោគ និងទិញច្រើនផងដែរ។
លោកនិយាយថា៖ «សូម្បីតែក្នុងដំណើរទៅកាន់ទីនោះជាលើកទី១ ក៏ខ្ញុំចាប់អារម្មណ៍ចង់ទៅបើកអាជីវកម្មនោះទីនោះដោយផ្ទាល់ដែរ»។ បើតាមលោក គីម ហ៊ាង អារ៉ាប់រួមអេមីរ៉ាត គឺជាទីផ្សារឈានមុខ និងមានភាពឆ្លាតវៃបំផុតលើពិភពលោក ហើយអត្រាពន្ធភាគច្រើនគឺសូន្យ។
កម្ពុជា-អេមីរ៉ាតអារ៉ាប់រួម នឹងទទួលបានអត្ថប្រយោជន៍ពីគ្នាទៅវិញទៅមក
អនុប្រធានសភាពាណិជ្ជកម្មកម្ពុជា លោក លឹម ហេង និយាយថា កិច្ចព្រមព្រៀងពាណិជ្ជកម្មជាមួយអេមីរ៉ាតអារ៉ាប់រួម នឹងជួយឱ្យកម្ពុជាមានទីផ្សារនាំចេញទៅប្រទេសអេមីរ៉ាតអារ៉ាប់រួម និងប្រទេសក្នុងតំបន់អារ៉ាប់កាន់តែច្រើន ហើយអាចទទួលបានការចូលមកបណ្តាក់ទុនពីសំណាក់វិនិយោគិនអារ៉ាប់ (ពិសេសនៅក្នុងវិស័យប្រេងឧស្ម័ន និងថាមពល)។
លោកនិយាយថា៖ «ខ្ញុំមានសុទិដ្ឋិនិយមថា ទីផ្សារអេមីរ៉ាតអារ៉ាប់រួមនឹងចូលរួមចំណែកច្រើនក្នុងការលើកកម្ពស់ទីផ្សារនាំចេញផលិតផលកម្ពុជា ជាពិសេសទំនិញកសិផលដែលនៅអារ៉ាប់ផលិតមិនសូវបាន ប៉ុន្តែការផលិតរបស់កម្ពុជា បានកើនឡើងជារៀងរាល់ឆ្នាំ»។
អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ ធ្លាប់ប្រាប់ ភ្នំពេញ ប៉ុស្តិ៍ថា សក្តានុពលដែលប្រទេសកម្ពុជាអាចទាក់ទាញចំណាប់អារម្មណ៍ភាគីអេមីរ៉ាតអារ៉ាប់រួម មានដូចជា ធនធានប្រេង រ៉ែ និងកសិកម្ម ផលិតកម្មសាច់សត្វ ដែលជាប្រភពធនធានវិនិយោគនៅកម្ពុជា ខណៈកម្ពុជាបានសម្លឹងពីវិសាលភាពដ៏ធំធេងនៃទីផ្សារនាំចេញផលិតផលរបស់ខ្លួនជាច្រើនដូចជា ផលិតផលកសិកម្ម ផលិតផលវាយនភណ្ឌ និងគ្រឿងបង្គុំ។
លោកអះអាងថា៖ «កិច្ចព្រមព្រៀងនេះនឹងមានអ្នកវិនិយោគពីប្រទេសក្នុងតំបន់មជ្ឈិមបូព៌ាជាច្រើន ចូលមកវិនិយោគនៅកម្ពុជា ដើម្បីផលិតនាំចេញទៅទីនោះវិញ។ ការបើកទីផ្សារជាមួយប្រទេសអេមីរ៉ាតអារ៉ាប់រួម គឺដូចជាការបើកច្រកទ្វារនាំចេញទំនិញទៅកាន់ប្រទេសនៅក្នុងតំបន់នោះដែរ ព្រោះប្រទេសទាំងនោះក៏មានកិច្ចព្រមព្រៀងជាមួយគ្នាផងដែរ»៕
