អាជ្ញាធរចុះបង្រ្កាបជ្រូកបង្កកខូចគុណភាព កាលពីខែកុម្ភៈ។ រូបថត ក.ប.ប
ភ្នំពេញៈ អ្នកនៅក្នុងវិស័យចិញ្ចឹមសត្វកម្ពុជា (ជ្រូក) មានជំនឿថា វិធានការរបស់រដ្ឋាភិបាលស្តីពីការហាមឃាត់ការនាំចូលសាច់បង្កក រយៈពេល ៦ ខែដែលចាប់ផ្តើមពីសប្តាហ៍ក្រោយ នឹងជួយលើកទឹកចិត្តអ្នកចិញ្ចឹមសត្វឱ្យខិតខំពង្រឹង និងពង្រីកការចិញ្ចឹមសត្វក្នុងស្រុកឡើងវិញ ខណៈរយៈពេលប៉ុន្មានឆ្នាំចុងក្រោយនេះ អ្នកចិញ្ចឹមបានខាតប្រាក់ជាច្រើនដោយសារតែតម្លៃសាច់ជ្រូកក្នុងស្រុកមិនអាចប្រកួតប្រជែងឈ្នះសាច់បង្កកនាំចូល។ ទោះយ៉ាងណាទន្ទឹមនឹងកាលកំណត់ខិតជិតចូលមកដល់ គេសង្កេតឃើញមានការសម្រុកនាំចូលសាច់បង្កកជាច្រើនតោនក្នុង ១ ថ្ងៃៗ មកស្តុកទុកផងដែរ។
ការអនុវត្តវិធានការហាមឃាត់ការនាំចូលបណ្តោះអាសន្នសាច់បង្កកនឹងចាប់ផ្តើមពីថ្ងៃទី ១២ ខែមីនា ឆ្នាំ ២០២៤
ក្រសួងពាណិជ្ជកម្ម និងក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី ១២ ខែមករា បានចេញសេចក្ដីជូនដំណឹងពីវិធានការហាមឃាត់ការនាំចូលជាបណ្តោះអាសន្ននូវគ្រឿងក្នុង និងបំណែកសាច់បង្កក រយៈពេល ៦ ខែ។
លិខិតសរសេរថា៖ «វិធានការផ្អាកការនាំចូលដល់ថ្ងៃទី ១២ ខែកញ្ញា ឆ្នាំ ២០២៤ តែវិធានការនេះមិនអនុវត្តចំពោះគម្រោងវិនិយោគមានលក្ខណសម្បត្តិគ្រប់គ្រាន់ (គ.ល.គ) ដែលនាំចូលទំនិញខាងលើសម្រាប់ប្រើប្រាស់ជាធាតុចូលផលិតកម្មសម្រាប់ការនាំចេញឡើយ»។
ការសម្រេចនេះបានធ្វើឡើងបន្ទាប់ពីអ្នកចិញ្ចឹមសត្វនៅកម្ពុជាត្អូញត្អែរកាន់តែខ្លាំងពីការធ្លាក់ចុះតម្លៃ និងមិនអាចប្រកួតប្រជែងជាមួយសាច់បង្កកនាំចូលដែលធ្វើឱ្យម្ចាស់កសិដ្ឋានខ្លះបោះបង់ការផ្គត់ផ្គង់សាច់ក្នុងស្រុក។
បើតាមសេចក្តីជូនដំណឹង ការហាមឃាត់នោះមានដូចជា អណ្តាត ថ្លើមនៃគោក្របីបង្កក, គ្រឿងក្នុងបង្កកផ្សេងទៀតនៃសត្វគោក្របី, ថ្លើមមាន់ សាច់ និងគ្រឿងក្នុងបង្កកផ្សេងទៀតក្រៅពីស្លាប ភ្លៅ ថ្លើម និងសាច់ដែលត្រូវយកឆ្អឹងចេញ និងពោះវៀន ប្លោក និងក្រពះទាំងមូល ឬផ្នែកនៃសត្វ(លើកលែងត្រី) ស្រស់ ក្លាស្សេ បង្កក ប្រឡាក់អំបិល ត្រាំទឹកអំបិល សម្ងួត ឬឆ្អើររួច។
អ្នកក្នុងផលិតកម្មសាច់សត្វ (ជ្រូក) រំពឹងទទួលបានផលវិជ្ជមានពីវិធានការរបស់អាជ្ញាធរ
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាបានឱ្យ ភ្នំពេញ ប៉ុស្តិ៍ នៅថ្ងៃទី ៤ ខែមីនាថា ឥទ្ធិពលនៃការនាំចូលសាច់ជ្រូកបង្កក (សាច់ គ្រឿងក្នុង ក្បាល...ជើង) ដែលគ្មានច្បាប់ និងគ្មានប្រភពច្បាស់លាស់បានធ្វើឱ្យផលិតកម្មនៅក្នុងស្រុកខាតបង់យ៉ាងធ្ងន់ធ្ងរក្នុងរយៈពេលប៉ុន្មានឆ្នាំមកនេះ ខណៈមុនពេលមានការនាំចូលផលិតផលបង្កកច្រើន គឺសកម្មភាពចិញ្ចឹមសត្វក្នុងស្រុកបានរីកលូតលាស់យ៉ាងឆាប់រហ័ស បន្ទាប់ពីអតីតប្រមុខរដ្ឋាភិបាលកម្ពុជា លោក ហ៊ុន សែន បានជំរុញឱ្យប្រជាកសិករ និងអ្នកវិនិយោគខិតខំបង្កើនការផលិតក្នុងស្រុកដើម្បីធានាសន្តិសុខស្បៀងក្នុងប្រទេសឱ្យបាន ១០០ ភាគរយ និងឈានទៅនាំចេញ។
លោកបានបន្តថា សម្រាប់វិធានការដែលក្រសួងពាណិជ្ជកម្ម និងក្រសួងកសិកម្ម ប្រកាសស្តីពីការហាមឃាត់បណ្តោះអាសន្នការនាំចូលផលិតផលសាច់បង្កក រយៈពេល ៦ ខែដោយគិតចាប់ពីសប្តាហ៍ក្រោយ គឺប្រាកដជារួមចំណែកលើកកម្ពស់ផលិតកម្មក្នុងស្រុក និងការពារសុខភាពអ្នកបរិភោគ។
លោកបានថ្លែងថា៖ «វិធានការហាមឃាត់នាំចូលផលិតផលសាច់បង្កករយៈពេល ៦ ខែ នឹងផ្តល់ផលវិជ្ជមានសម្រាប់ផលិតកម្មនៅក្នុងស្រុក ព្រោះក្រៅពីជួយឱ្យតម្លៃផលិតផលក្នុងស្រុកល្អជាងមុន វាក៏ជួយកាត់បន្ថយផលប៉ះពាល់សុខភាពអ្នកទទួលទានផងដែរ ខណៈផលិតផលសាច់បង្កកភាគច្រើនត្រូវបាននាំចូលដោយគ្មានច្បាប់ និងគ្មានការត្រួតពិនិត្យគុណភាព និងប្រភពទំនិញច្បាស់លាស់»។
ម្ចាស់កសិដ្ឋានចិញ្ចឹមជ្រូកប្រមាណ ១០ ០០០ ក្បាល នៅស្រុកកៀនស្វាយ ខេត្តកណ្តាល លោក ចន ហេង បាននិយាយថា បើសិនសេចក្តីជូនដំណឹងអន្តរក្រសួងដែលនឹងចូលជាធរមាននៅសប្តាហ៍ក្រោយត្រូវបានអាជ្ញាធរអនុវត្តដោយប្រសិទ្ធភាព និងជាប់ជាប្រចាំ វានឹងក្លាយជាវិធានការដ៏សំខាន់ក្នុងការជួយលើកទឹកចិត្ត និងជំរុញអ្នកចិញ្ចឹមសត្វក្នុងស្រុកឱ្យខិតខំពង្រីកការចិញ្ចឹមរបស់ខ្លួនឡើងវិញ ខណៈការខាតបង់ដែលបណ្តាលមកពីការនាំចូលសាច់សត្វបង្កកធ្វើឱ្យអ្នកចិញ្ចឹមខាតបង់ប្រាក់ជាច្រើនរួចមកហើយ។
លោកបន្ថែមថា៖ «ការនាំចូលសាច់សត្វបង្កកមិនមានច្បាប់ត្រឹមត្រូវ បានធ្វើឱ្យប៉ះពាល់យ៉ាងធ្ងន់ធ្ងរដល់ផលិតកម្មក្នុងស្រុកដោយវាមិនត្រឹមតែធ្វើឱ្យអ្នកចិញ្ចឹមខាតប្រាក់ធ្ងន់ធ្ងរ និងបោះបង់មុខរបរចោលប៉ុណ្ណោះទេ ប៉ុន្តែក៏ធ្វើឱ្យមានផលប៉ះពាល់ធ្ងន់ធ្ងរដល់សុខភាពអ្នកទទួលទានទៀតផង ពីព្រោះប្រភព និងការរក្សាទុកភាគច្រើនគឺមិនមានស្តង់ដាត្រឹមត្រូវឡើយ»។
វត្តមានផលិតផលសាច់បង្កកធ្វើឱ្យបរិមាណការលក់ធ្លាក់ចុះ
លោក តាំង ម៉េងគា អ្នកចែកចាយបន្ត និងលក់សាច់ជ្រូកនៅផ្សារអូរឫស្សី (ចែមុំ) បាននិយាយថា វត្តមានរបស់សាច់ជ្រូកបង្កកក្នុងរយៈពេលប្រហែលជាង ១ ឆ្នាំមកនេះបានធ្វើឱ្យការលក់របស់គាត់ធ្លាក់ចុះពាក់កណ្តាល គឺពី ១ ថ្ងៃជាង ៥០ ក្បាលមកត្រឹមចន្លោះពី ២០-៣០ ក្បាលប៉ុណ្ណោះ។ បើអាជ្ញាធរអាចហាមឃាត់ការនាំចូលសាច់បង្កកបានដោយប្រសិទ្ធភាពការលក់សាច់ជ្រូកក្នុងស្រុកប្រាកដជាកើនឡើង។
លោកប្រាប់ថា៖ «ការលក់សាច់ជ្រូកក្នុងស្រុកបានធ្លាក់ចុះជាបន្តបន្ទាប់ក្នុងរយៈពេលជាង ១ ឆ្នាំមកនេះ។ ការធ្លាក់ចុះ គឺទាំងបរិមាណ និងតម្លៃ។ អ្នកចិញ្ចឹមតូចៗបានខាតបង់ប្រាក់ និងបោះបង់មុខរបរមួយនេះស្ទើរអស់»។
តម្លៃសាច់ជ្រូកក្នុងស្រុកមិនអាចប្រកួតប្រជែងផលិតផលនាំចូល
លោក ចន ហេង បានប្រាប់ថា បច្ចុប្បន្នជ្រូករស់នៅកសិដ្ឋានមានតម្លៃជាមធ្យមក្នុងរង្វង់ជិត ៨ ០០០រៀលក្នុង ១ គីឡូក្រាម ខណៈការចំណាយថ្លៃដើមផលិតគឺលើសពី ៩ ០០០ រៀល។ សម្រាប់តម្លៃផលិតផលជ្រូកបង្កក គឺមានតម្លៃទាបច្រើនបើធៀបនឹងផលិតផលក្នុងស្រុក។
លោកបន្ថែមថា វត្តមានរបស់សាច់បង្កកគឺមានស្ទើរគ្រប់កន្លែងទាំងអស់ ហើយត្រូវបានគេយកទៅប្រើប្រាស់ច្រើនក្នុងពិធីបុណ្យ និងរៀបអាពាហ៍ពិពាហ៍ ដោយសារវាមានតម្លៃទាប។ ទាក់ទងនឹងតម្លៃចំណីសត្វលោកបានប្រាប់ថា ក្នុងរយៈពេល ២-៣ ឆ្នាំនេះ គឺមិនមានអ្វីប្រែប្រួលច្រើនទេ។
សម្រាប់លោក តាំង ម៉េងគា តម្លៃសាច់ជ្រូកក្នុងស្រុកដែលបោះទៅឱ្យអ្នកលក់បន្តនៅក្នុងថ្ងៃទី ៤ ខែមីនា គឺប្រមាណ ១២ ០០០ រៀលក្នុង ១ គីឡូក្រាម ខណៈតម្លៃសាច់ជ្រូកបង្កកនៅក្រោម ១០ ០០០ រៀល។
ក្រុមឈ្មួញកំពុងសម្រុកនាំចូលផលិតផលសាច់បង្កកមកស្តុក
ទោះយ៉ាងណា ទន្ទឹមនឹងក្តីសង្ឃឹមខាងលើ លោក ស្រ៊ុន ពៅ ក៏បានលើកឡើងពីបញ្ហាប្រឈមផងដែរ ដោយលោកនិយាយថា ខណៈកាលបរិច្ឆេទវិធានការហាមឃាត់ការនាំចូលសាច់បង្កកជាបណ្ដោះអាសន្នជិតមកដល់ គេសង្កេតឃើញបណ្តាក្រុមហ៊ុននាំចូលសាច់បង្កក កំពុងខិតខំបង្កើនការនាំចូលរបស់ខ្លួនកាន់តែសកម្មជាងមុន។ ការនាំចូលភាគច្រើនធ្វើឡើងតាមព្រំដែនប្រទេសថៃ។
លោកលើកឡើងថា៖ «បើតាមព័ត៌មានពេលនេះក្រុមឈ្មួញនាំចូលសាច់បង្កកកំពុងសម្រុកនាំចូលសាច់បង្កកយ៉ាងច្រើនមកស្តុកទុកក្នុងប្រទេសមុនពេលការអនុវត្តវិធានការហាមឃាត់ចាប់ផ្តើម។ បើតាមការព្យាករក្នុង ១ ថ្ងៃ អាចមានផលិតផលសាច់បង្កកពី ១០ ទៅ ២០ កុងតឺន័រត្រូវបាននាំចូល។ នេះគឺជាការត្រៀមរបស់ក្រុមឈ្មួញសម្រាប់បញ្ចេញលក់សាច់បង្កកនៅលើទីផ្សារកម្ពុជា»។
បើតាមប្រធានសមាគមអ្នកចិញ្ចឹមសត្វកម្ពុជា សាច់ជ្រូកបង្កកភាគច្រើនត្រូវបាននាំមកពីប្រទេសតំបន់អឺរ៉ុប ដោយផ្នែកខ្លះនៃសាច់ទាំងអស់នោះមិនត្រូវបានគេបរិភោគឡើយ៕
