ទិដ្ឋភាពតាមឆ្នេរ និងសំណង់អគារនៅក្នុងខេត្តព្រះសីហនុ។ រូបថត រ៉ាស់ហ៊ីម
ភ្នំពេញៈ មន្ត្រីជាន់ខ្ពស់ខេត្តព្រះសីហនុ និងអ្នកតំណាងផ្នែកទេសចរណ៍មើលឃើញថា ផែនការវិនិយោគដែលទឹកប្រាក់ជិត ៦០០ លានដុល្លារ របស់ក្រុមហ៊ុន Ban Dao Investment Co.,Ltd លើការសាងសង់សណ្ឋាគារលំដាប់ផ្កាយ ៥ និងមជ្ឈមណ្ឌលពាណិជ្ជកម្មនៅក្រុងព្រះសីហនុឆ្លុះបញ្ចាំងអំពីទំនុកចិត្តមកលើសេដ្ឋកិច្ចកម្ពុជា និងជាការឆ្លើយតបនឹងការងើបឡើងវិញនៃវិស័យទេសចរណ៍។
ខេត្តព្រះសីហនុ គឺជាទិសដៅនៃការវិនិយោគខ្ពស់ជាងគេនៃបណ្តាខេត្តតាមតំបន់ឆ្នេរ
កាលពីពេលថ្មីៗនេះ រាជរដ្ឋាភិបាលកម្ពុជាតាមរយៈក្រុមប្រឹក្សាអភិវឌ្ឍន៍កម្ពុជា(CDC) បានអនុម័តគម្រោងវិនិយោគរបស់ក្រុមហ៊ុន Ban Dao Investment Co., Ltd ដែលមានទុនវិនិយោគ ៥៧៤ លានដុល្លារ ដើម្បីសាងសង់សណ្ឋាគារលំដាប់ផ្កាយ៥ ដែលមាន ២ ៨៧០ បន្ទប់ នៅក្នុងមូលដ្ឋានពយតាម៉ូង នៃសង្កាត់លេខ ៤ ក្រុងព្រះសីហនុ ខេត្តព្រះសីហនុ។
លោក ឡុង ឌីម៉ង់ អភិបាលរងខេត្តព្រះសីហនុ និងជាអ្នកនាំពាក្យរដ្ឋបាលខេត្តព្រះសីហនុ បានប្រាប់់ ភ្នំពេញ ប៉ុស្តិ៍ កាលពីថ្ងៃទី ៦ ខែមីនាថា លោកទើបទទួលបានព័ត៌មានពីគម្រោងវិនិយោគដ៏ធំមួយនេះបន្ទាប់ពីលោកបានចូលប្រជុំនៅ CDC កាលពីសប្តាហ៍មុន។
លោកថ្លែងថា៖ «ជាការពិត នេះគឺជាគម្រោងវិនិយោគដ៏ធំដែលឆ្លុះបញ្ចាំងអំពីការជឿជាក់ពីសំណាក់វិនិយោគិនបរទេសចំពោះខេត្តព្រះសីហនុយើង។ គម្រោងដែលមានទឹកប្រាក់ជិត ៥៧០ លានដុល្លារនេះនឹងសាងសង់សណ្ឋាគារលំដាប់ផ្កាយ ៥ ដែលមានចំនួន ២ ៨៧០ បន្ទប់ និងតំបន់ពាណិជ្ជកម្មដ៏ធំមួយ និងមានទីតាំងស្ថិតនៅពយតាម៉ូង សង្កាត់លេខ ៤ ក្រុងព្រះសីហនុ ខេត្តព្រះសីហនុ»។
លោកបញ្ជាក់ថា៖ «សម្រាប់គម្រោងមួយនេះគឺពិតជាការវិវឌ្ឍថ្មីមួយទៀតសម្រាប់ខេត្ត ដែលនៅតែជាខេត្តដ៏ទាក់ទាញមួយ ស្របពេលដែលយើងមើលឃើញអំពីការត្រឡប់មកវិញនៃភ្ញៀវទេសចរបរទេសជាបណ្តើរៗ ដូច្នេះវត្តមានរបស់សណ្ឋាគារលំដាប់ផ្កាយ ៥ និងមជ្ឈមណ្ឌលពាណិជ្ជកម្មនេះនឹងដើរតួនាទីសំខាន់ក្នុងការបម្រើ និងផ្តល់សេវានានាដល់ភ្ញៀវទេសចរដែលមកទស្សនាខេត្តព្រះសីហនុ។ ការណ៍នេះគឺជាការរួមចំណែកដល់វិស័យទេសចរណ៍ និងសេដ្ឋកិច្ចជាតិយើងដែរ»។
ទស្សនៈរបស់ផ្នែកឯកជនចំពោះភាពទាក់ទាញនៃខេត្តព្រះសីហនុ
ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា (PATA) លោក ធួន ស៊ីណាន បានមើលឃើញថា បើទោះបីខេត្តព្រះសីហនុទទួលរងផលប៉ះពាល់ខ្លាំងបន្ទាប់ពីការផ្ទុះវិបត្តិសុខភាពសកល ការថមថយនៃសេដ្ឋកិច្ច ជាពិសេសការជាប់គាំងនៃគម្រោងវិនិយោគជាច្រើនក្តី ប៉ុន្តែខេត្តនេះនៅតែជាទិសដៅទេសចរណ៍ក្នុងតំបន់ឆ្នេរ និងវិនិយោគដ៏រស់រវើក។
លោកបញ្ជាក់ថា៖ «ជាការពិត យើងទាំងអស់គ្នាបានមើលឃើញនឹងភ្នែកថា បន្ទាប់ពីមានរឿងរ៉ាវជាច្រើនកើតឡើងរាប់ចាប់ពីការផ្ទុះនៃជំងឺកូវីដ ១៩ ការបន្តអូសបន្លាយនៃសង្គ្រាមរុស្ស៊ី-អ៊ុយក្រែន និងការថមថយនៃសេដ្ឋកិច្ចសកល ខេត្តព្រះសីហនុក៏ដូចជាខេត្តសៀមរាប គឺទទួលរងការធ្លាក់ចុះភ្ញៀវទេសចរបរទេសយ៉ាងគំហុក។ ប៉ុន្តែអ្វីដែលខ្ញុំមើលឃើញនោះ គឺខេត្តនេះនៅតែជាទិសដៅទេសចរណ៍ និងវិនិយោគដ៏ទាក់ទាញ ដោយសារយើងមានកោះច្រើន និងឆ្នេរខ្សាច់ស្អាត ជាពិសេសគម្រោងវិនិយោគដែលធ្លាប់ជាប់គាំងក៏ចាប់ផ្តើមដំណើរការ»។
ការជួយអន្តរាគមន៍របស់រដ្ឋាភិបាល
នាយករដ្ឋមន្ត្រីកម្ពុជា លោក ហ៊ុន ម៉ាណែត កាលពីខែមករា ឆ្នាំ ២០២៤ បានប្រកាសដាក់ចេញ «កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ ២០២៤» ក្នុងគោលបំណងដើម្បីជំរុញសកម្មភាពធុរកិច្ច និងការវិនិយោគ សំដៅប្រែក្លាយខេត្តព្រះសីហនុឱ្យទៅជាខេត្តដែលមានសក្តានុពលសេដ្ឋកិច្ចលើគ្រប់វិស័យ។
«កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ ២០២៤» ត្រូវបានរៀបចំឡើងដោយឈរលើទស្សនទានគោលចំនួន ៤ គឺ ១. កែប្រែមុខមាត់ខេត្តព្រះសីហនុឱ្យទៅជាខេត្តមានមូលដ្ឋានសេដ្ឋកិច្ច ពឹងផ្អែកលើឧស្សាហកម្ម, ទេសចរណ៍ និងការវិនិយោគ, ២. ដោះស្រាយបញ្ហាប្រឈមជាក់ស្តែង ដែលផ្តល់លទ្ធផលរហ័ស, ៣. ការដាក់ចេញវិធានការអនុវត្តជាក់ស្តែង ដែលមានលក្ខណៈជាការបំពេញបន្ថែមប្រកបដោយសង្គតិភាពទៅនឹងគោលនយោបាយ និងយុទ្ធសាស្ត្រនានារបស់រាជរដ្ឋាភិបាល, និង៤. បង្កើនល្បឿននៃការធ្វើបរិវត្តកម្ម និងការអភិវឌ្ឍឧស្សាហកម្ម ក្នុងខេត្តព្រះសីហនុ ឱ្យមានតម្លៃបន្ថែម និងមានឧត្តមភាពប្រកួតប្រជែងខ្ពស់។
កម្មវិធីពិសេសនេះមានគោលបំណងលើកកម្ពស់សកម្មភាពវិនិយោគ និងធុរកិច្ចក្នុងខេត្តព្រះសីហនុ សម្រាប់ឆ្នាំ ២០២៤ ឱ្យកាន់តែច្រើន និងមានសម្ទុះលឿន ដោយផ្តោតទៅលើគម្រោងវិនិយោគ ឬសកម្មភាពធុរកិច្ចចំនួន ៣ ប្រភេទ គឺ១ គម្រោងវិនិយោគ ឬសកម្មភាពធុរកិច្ចពាក់ព័ន្ធនឹងអគារកំពុងជាប់គាំង និងចាប់ផ្តើមដំណើរការអនុវត្តភ្លាមនៅក្នុងឆ្នាំ ២០២៤, ២ គម្រោងវិនិយោគ ឬសកម្មភាពធុរកិច្ច មិនជាប់ពាក់ព័ន្ធនឹងអគារជាប់គាំង ប៉ុន្តែចាប់ផ្តើមដំណើរការបានភ្លាមនៅក្នុងឆ្នាំ ២០២៤, និង ៣ ការពង្រីកគម្រោងវិនិយោគ ឬសកម្មភាពធុរកិច្ចមានស្រាប់ ស្របតាមលក្ខណវិនិច្ឆ័យជាក់លាក់ ដែលត្រូវចាប់ផ្តើមដំណើរការនៅក្នុងឆ្នាំ ២០២៤។
លោក ឡុង ឌីម៉ង់ បានឱ្យដឹងទៀតថា បន្ទាប់ពីការប្រកាសរបស់លោកនាយករដ្ឋមន្ត្រី ហ៊ុន ម៉ាណែត កាលពីចុងខែមករា ឆ្នាំ ២០២៤ លោកបានសង្កេតឃើញថា មានវិនិយោគិនជាបន្តបន្ទាប់បានមកសាកសួរព័ត៌មាន និងដាក់ពាក្យស្នើសុំវិនិយោគនៅខេត្តព្រះសីហនុ នៅក្រោមកញ្ចប់ពិសេសសម្រាប់ឆ្នាំ ២០២៤។
លោកបន្ថែមថា រហូតមកដល់ពេលនេះមានក្រុមហ៊ុន ចំនួន ៤-៥ បានដាក់ពាក្យស្នើសុំវិនិយោគ ខណៈក្រុមហ៊ុនជាច្រើនទៀតកំពុងសិក្សា និងត្រៀមដាក់ពាក្យដើម្បីទទួលបានសិទ្ធិវិនិយោគពិសេស។
លោកថ្លែងថា៖ «រហូតមកដល់ពេលនេះក្រុមការងាររបស់យើងបានទទួលសំណើពីក្រុមហ៊ុននៅក្នុងផ្នែកឯកជនប្រមាណ ៤-៥ ដែលក្នុងនេះ ២ ករណីត្រូវបានក្រុមការងារបានធ្វើការពិនិត្យ ពិភាក្សា និងវាយតម្លៃ ហើយផ្តល់ជូនកញ្ចប់លើកទឹកចិត្តពិសេសពាក់ព័ន្ធទៅនឹងបញ្ហាសារពើពន្ធ និងមិនមែនសារពើពន្ធ ដើម្បីឆ្លើយតបនឹងសំណូមពររបស់ផ្នែកឯកជនមួយចំនួនដែលស្នើសុំក្នុងការចាប់ផ្តើមសកម្មភាពវិនិយោគនៅខេត្តព្រះសីហនុ»។
លោកប្រាប់ទៀតថា សម្រាប់ស្ថានភាពវិស័យសំណង់ និងអចលនទ្រព្យនៅខេត្តព្រះសីហនុនាដើមឆ្នាំ ២០២៤ នេះគឺមានភាពល្អប្រសើរច្រើនបើធៀបនឹងដើមឆ្នាំ ២០២៣ ប៉ុន្តែវាមិនទាន់រីកចម្រើនខ្លាំងដូចមុនឆ្នាំ ២០១៩ ឡើយ។ បច្ចុប្បន្នក្នុងខេត្តព្រះសីហនុមានអគារធំៗជាច្រើន ក្នុងនោះជាង ៣៦០ អគារសាងសង់មិនទាន់រួច និងប្រហែល ១៦០១៧០ អគារទៀតសាងសង់រួច ប៉ុន្តែមិនបានបើកដំណើរការ៕
