ប្រជាពលរដ្ឋដែលពុលស្រាសមកពីខេត្តពោធិ៍សាត់ ត្រូវបានសង្គ្រោះនៅមន្ទីរពេទ្យកាល់ម៉ែត នាពេលកន្លងមក។ ហុង មិនា
ភ្នំពេញៈ ក្រសួងសុខាភិបាល បានអំពាវនាវឱ្យពលរដ្ឋចូលរួមអនុវត្តវិធីបង្ការចំនួន ១១ ចំណុច ដើម្បីការពារខ្លួនកុំឱ្យពុលចំណីអាហារក្នុងអំឡុងពេលបុណ្យចូលឆ្នាំប្រពៃណីខ្មែរខាងមុខនេះ ហើយក៏បានអំពាវនាវឱ្យពលរដ្ឋត្រូវស្វែងរកការព្យាបាលឱ្យបានលឿនបំផុត ប្រសិនបើសង្ស័យថាខ្លួនអាចពុលស្រា និងចំណីអាហារ ។ នេះបើតាមសេចក្ដីជូនព័ត៌មានរបស់ក្រសួងសុខាភិបាល ដែលចេញផ្សាយកាលពីថ្ងៃទី ៥ ខែ មេសា ។
តាមរយៈសេចក្តីជូនព័ត៌មានខាងលើស្តីពីការបង្ការជំងឺ និងបញ្ហាសុខភាព ក្នុងអំឡុងពិធីបុណ្យចូលឆ្នាំ ក្រសួងសុខាភិបាល សង្កេតឃើញថា ករណីពុលអាហារនៅតែបន្តកើតឡើងនៅតាមសហគមន៍នៃបណ្ដាខេត្តមួយចំនួន ហើយរយៈពេល ៣ ខែដើមឆ្នាំ ២០១៩ នេះ មានអ្នកពុលចំណីអាហារជាច្រើនរយនាក់ ក្នុងនោះ ក៏មានអ្នកបាត់បង់ជីវិតដែរ។ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល លើកឡើងនៅក្នុងសេចក្ដីជូនព័ត៌មានរបស់ក្រសួងសុខាភិបាល ស្ដីពីការបង្ការជំងឺ និងបញ្ហាសុខភាពក្នុងអំឡុងពិធីបុណ្យចូលឆ្នាំបែបនេះ គឺដើម្បីក្រើនរំឭកពលរដ្ឋឱ្យចេះប្រុងប្រយ័ត្នចំពោះចំណីអាហារ ដែលបរិភោគអាចធ្វើឱ្យពុល ។
លោកបញ្ជាក់ថា៖ «ខ្ញុំសូមក្រើនរំឭកប្រជាជនទាំងអស់ ឱ្យមានការប្រុងប្រយ័ត្នខ្ពស់លើបញ្ហាសុខភាព ដែលអាចកើតមាន ក្នុងអំឡុងពិធីបុណ្យចូលឆ្នាំខ្មែរប្រពៃណីជាតិ ដែលស្របគ្នាជាមួយនឹងអាកាសធាតុនៅលើផ្ទៃប្រទេស កម្ពុជា មានការកើនកម្ដៅខ្លាំង ជាពិសេសទៅលើការបរិភោគចំណីអាហារ និងភេសជ្ជៈ ការរៀបចំអាហារ និងការទុកដាក់មិនត្រឹមត្រូវ ដើម្បីចៀសផុតពីបញ្ហាឈឺពោះ ក្អួត រាករូស ដែលបណ្ដាលមកពីការបរិភោគចំណីអាហារមិនមានអនាម័យ អាហារជូរ ផ្អូម ឬការពុលស្រា បណ្ដាលមកពីការទិញស្រាមកពិសាដែលជាស្រាបានផលិត ឬបានបិតមិនមានលក្ខណៈតាមបច្ចេកទេសត្រឹមត្រូវជាដើម»។
បើតាមលោក ម៉ម ប៊ុនហេង ដើម្បីគេចផុតពីការពុលចំណីអាហារ ពលរដ្ឋ ត្រូវការពារខ្លួន ដោយអនុវត្តតាមវិធានការ ១១ ចំណុច ដូចជា ទី១ ការប្រើប្រាស់ទឹកស្អាត និងម្ហូបអាហារ ដែលស្អាតនិងឆ្អិនជានិច្ច។ ទី២ ត្រូវលាងដៃនឹងសាប៊ូ មុនពេល និងអំឡុងពេលរៀបចំម្ហូបអាហារ មុនបរិភោគ មុនពេលបញ្ចុកកូន និងក្រោយបន្ទោបង់។ ទី៣ អាហារត្រូវគ្របជានិច្ចដើម្បីចៀសវាងរុយរោម។ ទី៤ ពិនិត្យមើលចំណីអាហារដែលអាចនឹងជូរផ្អូម។ ទី៥ លាងសម្អាតបន្លែផ្លែឈើជាមួយនឹងទឹកស្អាតមុនបរិភោគ។
ទី៦ សម្អាតសម្ភារប្រើប្រាស់ចម្អិនម្ហូបអាហារឱ្យបានត្រឹមត្រូវ។ ទី៧ ចម្អិនអាហារឱ្យបានឆ្អិនល្អ ជាពិសេស សាច់សត្វស្លាប ស៊ុត និងអាហារសមុទ្រ។ ទី៨ ទុកដាក់ចំណីអាហារឆៅ និងឆ្អិនដាច់ដោយឡែកពីគ្នា។ ទី៩ កុំរក្សាទុកអាហារក្នុងកម្ដៅធម្មតាលើសពី ២ ម៉ោង ។ ទី១០ មិនត្រូវរក្សាទុកអាហារច្រើនថ្ងៃ ទោះជាស្ថិតក្នុងកម្រិតសីតុណ្ហភាពក៏ដោយ និងទី១១ កុំប្រើប្រាស់ចំណីអាហារហួសកាលកំណត់ប្រើប្រាស់ ។
ប៉ុន្តែបើមានបញ្ហាពុលអាហារ ឬរោគសញ្ញាពុលស្រា ដូចជា ឈឺក្បាល ក្អួត ឈឺពោះ វិលមុខ ស្រវាំងភ្នែក សន្លប់ ប្រកាច់ ពិបាកដកដង្ហើម គឺត្រូវស្វែងរកការពិនិត្យ និងព្យាបាលជាបន្ទាន់នៅមណ្ឌលសុខភាព ឬទៅមន្ទីរពេទ្យដែលនៅជិតផ្ទះ ។
តួលេខពីក្រសួងសុខាភិបាល ក៏បញ្ជាក់ថា គិតចាប់ពីអំឡុងឆ្នាំ ២០១៨ ដល់ខែ មីនា ឆ្នាំ ២០១៩ គឺមានករណីពុលចំណីអាហារ និងស្រាកើតឡើងចំនួន ៣០ លើក និងបានធ្វើឱ្យមនុស្សពុលសរុប ១ ៣០៤ នាក់ ហើយអ្នកស្លាប់សរុបមាន ២៧ នាក់។
ភ្នំពេញប៉ុស្ដិ៍ មិនអាចទាក់ទងសុំការបញ្ជាក់បន្ថែមពីលោក លី សូវ៉ាន់ មន្ត្រីនាំពាក្យនៃក្រសួងសុខាភិបាលបានទេពីម្សិលមិញ។
ប៉ុន្តែលោក ឈ្នាង សុវត្ថា ប្រធានមន្ទីរសុខាភិបាលខេត្តក្រចេះ ជាខេត្តដែលធ្លាប់កើតមានករណីពុលស្រាក្រោយបង្អស់នៅក្នុងខែ តុលា ឆ្នាំ ២០១៨ ដែលបណ្តាលឲ្យមនុស្ស ៥ នាក់ស្លាប់ក្នុងចំណោមអ្នកពុលសរុប ៧៨ នាក់ ប្រាប់ភ្នំពេញប៉ុស្តិ៍ ពីម្សិលមិញ ថា ចាប់ពីខែ មករា ឆ្នាំ ២០១៩ មក គឺខាងមន្ទីរសុខាភិបាលខេត្តបានចុះទៅប្រជុំនៅតាមឃុំ ដោយអញ្ជើញមេភូមិ និងអ្នកផលិតស្រាទាំងអស់ មកអប់រំអំពីការផលិត និងការចរាចរណ៍ស្រា ព្រមទាំងប្រធានបទស្ដីពីសុវត្ថិភាពចំណីអាហារផងដែរ ។
លោកថ្លែងថា៖«ទី១ យើងប្រាប់អ្នកផលិត (ស្រា) កុំឱ្យគាត់យកស្អីមួយមកលាយស្រាឱ្យខ្លាំង ហើយក៏កុំជឿថា អាហ្នឹងជាមេស្រា ដើម្បីកុំឱ្យមានការភាន់ច្រឡំ ។ ឱ្យគាត់ផលិតឱ្យបានត្រឹមត្រូវ ហើយផលិតខុសគាត់នឹងមានទោស។ ទី២ យើងពន្យល់ប្រជាពលរដ្ឋកុំឱ្យគាត់ពិសាស្រាសដែលគ្មានប្រភពច្បាស់លាស់ ព្រោះអាចបង្កឱ្យមានគ្រោះថ្នាក់ ហើយយើងបង្ហាញអំពីលទ្ធផលគ្រោះថ្នាក់កន្លងមក ដើម្បីឱ្យគាត់បានជ្រាប» ។
លោក ឈ្នាង សុវត្ថា បន្ថែមថា ការចុះទៅអប់រំអំពីវិធានការទប់ស្កាត់ការពុលស្រា និងចំណីអាហារនេះ ធ្វើឡើងនៅតាមឃុំដែលធ្លាប់ជួបបញ្ហាមុនគេ ជាពិសេសនៅតាមតំបន់រស់នៅរបស់ក្រុមជនជាតិភាគតិចដែលពួកគេចូលចិត្តពិសាស្រាច្រើន ៕
