ប្រជាពលរដ្ឋមកលេងឆ្នេរនេសាទ ក្នុងស្រុកស្រែអំបិល ខេត្តកោះកុង មុនការរីករាលដាលជំងឺកូវីដ ១៩។ ហុង មិនា
ភ្នំពេញ៖ រាជរដ្ឋាភិបាលកម្ពុជាបានបន្តអនុវត្តន៍ការហាមឃាត់ការធ្វើដំណើរ និងបានសម្រេចបិទរមណីយដ្ឋានទេសចរណ៍នៅទូទាំងប្រទេសជាបណ្តោះអាសន្ន សម្រាប់រយៈពេល ៨ ថ្ងៃបន្តទៀត ចាប់ពីថ្ងៃនេះ រហូតដល់ថ្ងៃទី ២៨ ខែ មេសា ឆ្នាំ ២០២១ ដើម្បីទប់ស្កាត់ការឆ្លងរាលដាលនៃជំងឺកូវីដ ១៩។
គួរបញ្ជាក់ផងដែរថា ប្រមុខរាជរដ្ឋាភិបាលកម្ពុជា កាលពីថ្ងៃទី ០៦ ខែមេសា បានចេញសេចក្តីសម្រេចហាមឃាត់ការធ្វើដំណើរ និងការបិទរមណីយដ្ឋានទេសចរណ៍នៅទូទាំងប្រទេសជាបណ្តោះអាសន្នសម្រាប់រយៈពេល ១៤ ថ្ងៃ គិតចាប់ពីម៉ោងសូន្យនៃថ្ងៃទី ៧ ខែមេសា រហូតដល់ថ្ងៃទី ២០ ខែ មេសា ឆ្នាំ ២០២១ ក្នុងគោលបំណងប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ ១៩ ពីភូមិសាស្ត្រនៃខេត្តមួយ ទៅភូមិសាស្ត្រនៃខេត្តមួយទៀត។
សេចក្តីសម្រេចដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីថ្ងៃទី ១៧ ខែមេសា ស្តីពីការបន្តហាមឃាត់ការធ្វើដំណើរ និងបិទរមណីយដ្ឋានទេសចរណ៍នៅទូទាំងប្រទេសជាបណ្តោះអាសន្ននេះ មានអានុភាពអនុវត្តបន្តរហូតដល់មានបទប្បញ្ញត្តិថ្មីមកជំនួស៕
