លោកនាយករដ្ឋមន្ត្រី ហ៊ុន សែន អញ្ជើញទទួលស្វាគមន៍ និងជូនផ្កាកុលាបដល់អ្នកដំណើរនាវាចរណ៍ Westerdam កាលពីថ្ងៃសុក្រ។ រូបថត AFP
ភ្នំពេញៈ ប្រធានាធិបតីអាមេរិកលោក ដូណាល់ ត្រាំ និងអង្គការទេសចរណ៍ពិភពលោក (UNWTO) កោតសរសើរកម្ពុជាសម្រាប់សកម្មភាពមនុស្សធម៌ដែលបានអនុញ្ញាតឲ្យនាវានេះចូលចតនៅកំពង់ផែខេត្តព្រះសីហនុ ខណៈមន្ត្រីបានអះអាងថា គិតត្រឹមថ្ងៃសៅរ៍មានមនុស្សជាង ១២០០ នាក់បានចុះពីនាវា MS Westerdam ហើយជាង ១ ០០០ នាក់បានចាកចេញពីកម្ពុជា។
កាលពីថ្ងៃសៅរ៍លោកប្រធានាធិបតី ត្រាំ បានសរសេរនៅលើបណ្ដាញធ្វីធើរថា៖ «សូមអរគុណប្រទេសកម្ពុជាដ៏ស្រស់ស្អាតសម្រាប់ការទទួលយកនាវា Westerdam ឲ្យចូលចតនៅកំពង់ផែរបស់លោក។ សហរដ្ឋអាមេរិកនឹងចងចាំនូវសេចក្ដីសុភាពរាបសារបស់អ្នក»។
ស្រដៀងគ្នានេះដែរអង្គការទេសចរណ៍ពិភពលោក UNWTO ដែលជាភ្នាក់ងារឯកទេសរបស់អង្គការសហប្រជាជាតិបានសរសេរលើបណ្ដាញធ្វីធើរកាលពីថ្ងៃសុក្រថា៖ «នាវា MS Westerdam បានចូលចតនៅកំពង់ផែក្នុងប្រទេសកម្ពុជាដោយមានភ្ញៀវទេសចរ និងបុគ្គលិកនាវា ២០០០ នាក់នៅលើនាវា។ ជាថ្មីម្ដងទៀតទេសចរណ៍បានបង្ហាញនូវសមត្ថភាពរបស់ខ្លួនដែលមានតែមួយក្នុងការនាំយកប្រជាជនមករួមគ្នាក្នុងគ្រាលំបាកដែលនេះជាការអបអរដល់មនុស្សជាតិរួមរបស់យើងដោយមិនគិតពីជាតិសាសន៍ យែនឌ័រ ឬសាសនា»។
អគ្គលេខាធិការអង្គការទេសចរណ៍ពិភពលោក លោក Zurab Pololikashvili ក៏បានសរសេរលិខិតមួយជូនទៅលោកនាយករដ្ឋមន្ត្រី ហ៊ុន សែន ដោយបង្ហាញនូវការកោតសរសើរអស់ពីចិត្តចំពោះការឆ្លើយតបដោយមនុស្សធម៌ដែលគួរឲ្យកត់សម្គាល់ចំពោះជោគវាសនារបស់នាវានេះ។
លិខិតរបស់លោកសរសេរថា៖ «យើងពិតជាមានមោទនភាពណាស់សម្រាប់ការបង្ហាញពីសាមគ្គីភាពដែលអន្តរជាតិកោតសរសើរយ៉ាងខ្លាំងលើកម្ពុជាដែលកិច្ចការនេះយើងសង្ឃឹមថានឹងជំរុញទឹកចិត្តប្រទេសផ្សេងទៀតឲ្យធ្វើឲ្យបានលើសនេះ ហើយផ្ដល់នូវការគាំទ្រនៅតាមទីកន្លែង និងតាមពេលវេលាចាំបាច់»។
លិខិតរបស់លោក Zurab Pololikashvili បន្តថា៖ «ខ្ញុំសូមបញ្ជាក់សាជាថ្មីនូវការកោតសរសើរយ៉ាងខ្លាំងរបស់ UNTWO សម្រាប់ភាពក្លាហានរបស់ប្រទេសកម្ពុជា និងការបញ្ជាក់យ៉ាងកក់ក្ដៅអំពីក្ដីស្រឡាញ់ក្នុងភាពជាបងប្អូនប្រឆាំងនឹងភាពមិនពិតទៅលើអ្នកដំណើរ ២០០០ នាក់ដែលជាប់នៅលើសមុទ្រ»។
កាលពីថ្ងៃព្រហស្បតិ៍ នាវាទេសចរណ៍ MS Westerdam បានមកចតនៅកំពង់ផែខេត្តព្រះសីហនុដោយមានភ្ញៀវទេសចរ ១៤៥៥ នាក់មកពីប្រទេសចំនួន ៤១ ក្នុងនោះមានជាង ៦០០ នាក់ជាជនជាតិអាមេរិកាំង។ នាវានេះក៏មានបុគ្គលិកបម្រើការ ៨០២ នាក់ផ្សេងផងដែរ។ នាវានេះបានចាកចេញពីទីក្រុងហុងកុងកាលពីថ្ងៃទី ១ កុម្ភៈ ហើយគ្រោងចូលចតនៅកំពង់ផែយូគោហាម៉ា ប្រទេសជប៉ុននៅថ្ងៃទី ១៥ ខែកុម្ភៈ។ ប៉ុន្តែកំពង់ផែនេះរួមទាំងប្រទេសមួយចំនួនទៀតបានបដិសេធ។
លោកនាយករដ្ឋមន្ត្រី ហ៊ុន សែន កាលពីថ្ងៃសុក្របានធ្វើដំណើរទៅខេត្តព្រះសីហនុដើម្បីទទួលស្វាគមន៍ភ្ញៀវទេសចរដែលចុះពីនាវានោះដោយផ្ទាល់។ លោកបានថ្លែងថា មនុស្សមិនគួរត្រូវបានរើសអើងដោយគ្រាន់តែការសង្ស័យថាមានផ្ទុកមេរោគកូរ៉ូណានោះទេ។
លោកបានបញ្ជាក់ថា៖ «ប្រទេសខ្លះ អ្នកខ្លះប្រហែលចោទជាសំណួរថា បើកូរ៉ូណាមាននៅលើនាវានេះ តើកម្ពុជានឹងឲ្យចូលចតឬទេ? ខ្ញុំអាចឆ្លើយដោយសារច្បាស់ថា បើមានអ្នកជំងឺដោយជំងឺនេះនៅលើនាវា ខ្ញុំនឹងអនុញ្ញាតឲ្យនាវានេះចូលចតភ្លាម តាមតែអាចធ្វើបាន»។ លោកបន្ថែមថា វាមិនមែនជាពេលវេលាដែលត្រូវភ័យខ្លាច ឬរើសអើងទេ ប៉ុន្តែជាពេលដែលត្រូវសាមគ្គីគ្នាដោះស្រាយបញ្ហា។
លោកបានបញ្ជាក់ថា អគ្គលេខាធិការនៃអង្គការសុខភាពពិភពលោក Tedros Adhanom Ghebreyesus មានបំណងនិយាយទូរស័ព្ទជាមួយលោកពីកិច្ចការមនុស្សធម៌នេះ ។
កាលពីថ្ងៃព្រហស្បតិ៍លោក Tedros Adhanom Ghebreyesus ក៏បានកោតសរសើរកម្ពុជាសម្រាប់សាមគ្គីភាពនេះ។ លោកសរសេរនៅលើទំព័រធ្វីធើររបស់លោកថា លោកបាននិយាយទូរស័ព្ទជាមួយរដ្ឋមន្ត្រីក្រសួងសុខាភិបាលកម្ពុជាលោក ម៉ម ប៊ុនហេង ពីការផ្ដល់ការគាំទ្រចាំបាច់សម្រាប់អ្នកដំណើរ។
កាលពីថ្ងៃម្សិលមិញលោក ឃាង ភារម្យ អ្នកនាំពាក្យសាលាខេត្តព្រះសីហនុបានប្រាប់ឲ្យដឹងថា មនុស្ស ១ ២៥៤ នាក់បានចាកចេញពីនាវាហើយក្នុងរយៈពេល ២ ថ្ងៃគឺថ្ងៃសុក្រ និងថ្ងៃសៅរ៍។
ប៉ុន្តែអ្នកនាំពាក្យអាកាសចរស៊ីវិលលោក ស៊ិន ចាន់សេរីវុត្ថា បានឲ្យដឹងពីម្សិលមិញដែរថា តាមតួលេខពីជើងហោះហើរមានមនុស្ស ២៦៤ នាក់បានចាកចេញពីកម្ពុជានៅថ្ងៃសុក្រ ហើយចំនួន ៩២៨ នាក់ទៀតបានចាកចេញកាលពីថ្ងៃសៅរ៍។
ស្របពេលជាមួយគ្នានេះមានបញ្ហាប្រឈមខ្លះកំពុងកើតមានសម្រាប់អ្នកព្យាយាមវិលត្រឡប់ទៅប្រទេសវិញ នៅពេលអាជ្ញាធរសុខាភិបាលម៉ាឡេស៊ីបានប្រកាសថា ស្ត្រីជនជាតិអាមេរិកាំងអាយុ ៨៣ ឆ្នាំម្នាក់ត្រូវបានធ្វើតេស្ត ២ ដង ហើយឃើញមានផ្ទុកជំងឺ Covid-19។
អ្នកដំណើរម្នាក់ឈ្មោះ Abraham Youssef ដែលទំនងជាធ្វើដំណើរទៅអូស្ត្រាលីបានសរសេរលើធ្វីធើរថា អ្នកដំណើរខ្លះ រកមិនឃើញជើងហោះហើរភ្ជាប់ពីទីក្រុងគូឡាឡាំពួ ប្រទេសម៉ាឡេស៊ី ប៉ុន្តែទីបញ្ចប់ពួកគេចាកចេញដោយទុករបស់របរចោល។ លោកថា ជើងហោះហើរខ្លះត្រូវបានដាក់ឲ្យរង់ចាំ ឬលុបចោល។
អ្នកដំណើរជនជាតិអាមេរិកាំងម្នាក់ទៀតឈ្មោះ Christina Kerby បានសរសេរថា អ្នកស្រីនៅបន្តស្នាក់ក្នុងសណ្ឋាគារនៅទីក្រុងភ្នំពេញពីម្សិលមិញ ហើយអ្នកដំណើរជាច្រើនដែលនៅសណ្ឋាគារជាមួយគ្នាត្រូវបានធ្វើតេស្តរកមើល Covid-19។
បើទោះជាម៉ាឡេស៊ីបានប្រកាសថា ជនជាតិអាមេរិកាំងវ័យ ៨៣ ឆ្នាំមានផ្ទុក Covid-19 ក៏ដោយ អាជ្ញាធរសុខាភិបាលកម្ពុជាបានស្នើសុំឲ្យភាគីម៉ាឡេស៊ីបញ្ជាក់ឲ្យច្បាស់ម្ដងទៀត។ លោករដ្ឋមន្ត្រីក្រសួងសុខាភិបាល ម៉ម ប៊ុនហេង កាលពីម្សិលមិញបានសរសេរលិខិតជូនលោក Datuk Seri Dr. Haji Dzulkefly រដ្ឋមន្ត្រីក្រសួងសុខាភិបាលម៉ាឡេស៊ី។
ដោយយោងលើករណីស្ដ្រីវ័យ ៨៣ ឆ្នាំលោក ម៉ម ប៊ុនហេង សរសេរថា៖ «ចំពោះករណីនេះ ខ្ញុំស្នើសុំឲ្យឯកឧត្តមពិនិត្យម្ដងទៀតទៅលើការធ្វើតេស្តលើករណីវិជ្ជមានគួរឲ្យសង្ស័យនេះ ដែលជាលទ្ធផលវិជ្ជមានដំបូងបំផុត ដើម្បីបញ្ជាក់ពីភាពត្រឹមត្រូវនៃករណីនេះ»។
ជុំវិញករណីនេះក្រសួងសុខាភិបាលក៏បានចេញសេចក្ដីប្រកាសព័ត៌មានទាមទារឲ្យភាគីម៉ាឡេស៊ីពិនិត្យឲ្យបានម៉ឺងម៉ាត់។ ក្រសួងបញ្ជាក់ថា កម្ពុជាកំពុងពិនិត្យសុខភាពករណីសង្ស័យបុគ្គលដែលមានវីរុសកូរ៉ូណាថ្មី ក្នុងចំណោមអ្នកទេសចរដែលត្រូវធ្វើដំណើរតាមជើងហោះហើរនៅថ្ងៃទី ១៦ កុម្ភៈ ម្សិលមិញ។
ក្រសួងសុខាភិបាលបញ្ជាក់ថា កម្ពុជាអនុវត្តយ៉ាងហ្មត់ចត់តាមស្តង់ដាប្រតិបត្តិ និងនិយតកម្មសុខភាពអន្តរជាតិឆ្នាំ ២០០៥ (IHR 2005) ព្រមទាំងបន្តពិភាក្សាជាមួយអង្គការសុខភាពពិភពលោក មជ្ឈមណ្ឌលប្រយុទ្ធនឹងជំងឺឆ្លងសហរដ្ឋអាមេរិក CDC និងវិទ្យាស្ថានប៉ាស្ទ័រដើម្បីទប់ស្កាត់ការឆ្លងវីរុសនេះនៅកម្ពុជា។
អ្នកស្រី Emily Zeeberg អ្នកនាំពាក្យស្ថានទូតអាមេរិកប្រចាំកម្ពុជាបានថ្លែងតាមអ៊ីមែលពីម្សិលមិញថា ស្ថានទូតបានទទួលដំណឹងអំពីស្ត្រីជនជាតិអាមេរិកាំងដែលម៉ាឡេស៊ីថាមានផ្ទុកវីរុសកូរ៉ូណា។ អ្នកស្រីថា មន្ត្រីកុងស៊ុលរបស់អាមេរិកកំពុងធ្វើការជាមួយកម្ពុជា និងម៉ាឡេស៊ី និងបុគ្គលិកសុខាភិបាលដើម្បីដោះស្រាយបញ្ហាជំងឺកូរ៉ូណា។ អ្នកស្រីថ្លែងថា អ្នកដំណើរទាំងអស់ត្រូវបានពិនិត្យសុខភាពមុនពេលចាកចេញពីនាវា។ អ្នកដែលរាយការណ៍ថាមានជំងឺត្រូវបានធ្វើតេស្តរកមើលវីរុស Covid-19៕
វីដេអូ៖
