ពេលគោរពទង់ជាតិរបស់សិស្ស និងគ្រូនៅសាលាបឋមសិក្សាសម្តេចព្រះរាជអគ្គមហេសី នរោត្តមមុនីនាថ សីហនុ (ឧដុង្គ)។ ផា លីណា
ដើម្បីលើកកម្ពស់គុណភាពនៃការអប់រំនៅក្នុងប្រទេសកម្ពុជាឲ្យមានភាពកាន់តែប្រសើរ ក្រសួងអប់រំ យុវជន និងកីឡា នាឆ្នាំសិក្សា ២០១៧-២០១៨ នេះបានសហការជាមួយអង្គការសកម្មភាពសម្រាប់បឋមសិក្សានៅកម្ពុជា (Kampuchean Action For Primary Education) ដើម្បីដាក់បញ្ចូលនូវកម្មវិធីថ្មីមួយដែលមានឈ្មោះថា «សាលាជំនាន់ថ្មី» នៅតាមសាលាគំរូចំនួន ៣ នៅក្នុងប្រទេសកម្ពុជា។
លោក អ៊ូ សំអេលីត នាយកសាលាបឋមសិក្សាសម្តេចព្រះរាជអគ្គមហេសី នរោត្តមមុនីនាថ សីហនុ (ឧដុង្គ) បាននិយាយថាសាលាជំនាន់ថ្មីគឺជាឈ្មោះកម្មវិធីសិក្សាថ្មីមួយរបស់ក្រសួងអប់រំ យុវជន និងកីឡាដែលមានគោលបំណងធ្វើការពង្រឹងសមត្ថភាពបន្ថែមចំពោះសិស្សនៅកម្ពុជា ដើម្បីឲ្យពួកគេអាចចូលរួមប្រកួតប្រជែងជាមួយសិស្សនៅបណ្តាប្រទេសនានាលើសកលលោក។
លោកបានបន្តថា កម្មវិធីសាលាជំនាន់ថ្មីផ្តោតលើមុខវិជ្ជាសំខាន់ៗមួយចំនួនមានដូចជា វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (Science, Technology, Engineering and Mathematics។
លោក សំអេលីត មានប្រសាសន៍ថា៖ «សាលាជំនាន់ថ្មីគឺជាកម្មវិធីដ៏ពិសេសដែលនឹងជួយពង្រឹងសមត្ថភាពសិស្សនៅកម្ពុជាឲ្យពួកគេអាចចូលរួមក្នុងការប្រកួតប្រជែងចំណេះដឹងជាលក្ខណៈអន្តរជាតិបានប្រកបដោយភាពជោគជ័យ»។
កម្មវិធីសាលាជំនាន់ថ្មីមានភាពខុសគ្នាពីកម្មវិធីដែលសាលាចំណេះដឹងទូទៅនានាកំពុងអនុវត្តមួយចំនួនដូចជា ៖
-ការសិក្សាមាន ២ ពេលក្នុង ១ ថ្ងៃ (៧ ម៉ោង) ចាប់ពីថ្ងៃចន្ទ ដល់ថ្ងៃសៅរ៍
-សិស្សក្នុង ១ ថ្នាក់ត្រូវបានកំណត់ចន្លោះពី ៣០-៣៥ នាក់
-មានសម្ភារឧបទេសគ្រប់គ្រាន់ក្នុងការរៀន និងបង្រៀន
-មានកម្មវិធីសិក្សាភាសាបរទេស និងកុំព្យូទ័រជាដើម។
សម្រាប់ឆ្នាំសិក្សា ២០១៧-២០១៨ នេះក្រសួងអប់រំ យុវជន និងកីឡា បានចាប់ផ្តើមអនុវត្តកម្មវិធីនេះនៅសាលាគោលដៅចំនួន ៣ ដែលរួមមាន វិទ្យាល័យព្រះស៊ីសុវត្ថិ (ក្រុងភ្នំពេញ) សាលាបឋមសិក្សាអង្គរបាន (ខេត្តកំពង់ចាម) និងសាលាបឋមសម្តេចព្រះរាជអគ្គមហេសី នរោត្តមមុនីនាថ សីហនុ (ឧដុង្គខេត្តកំពង់ស្ពឺ)។
ថ្នាក់រៀនមួយនៃសាលាសម្តេចព្រះរាជអគ្គមហេសី នរោត្តមមុនីនាថ សីហនុ។ផា លីណា
បន្ទាប់ពីសាលាទាំង ៣ ខាងលើនៅពេលខាងមុខក្រសួងក៏គ្រោងនឹងបញ្ចូលកម្មវិធីនេះទៅតាមបណ្តាសាលានានានៅទូទាំងប្រទេសផងដែរ។
បើតាមលោក សំអេលីត បញ្ជាក់ថាបច្ចុប្បន្នដំណើរការកម្មវិធីសាលាជំនាន់ថ្មីនៅសាលារបស់លោកមិនទាន់បានពេញលេញនៅឡើយទេ តែវានឹងដំណើរការពេញលេញនៅឆ្នាំសិក្សា ២០១៨-២០១៩។
បច្ចុប្បន្នសាលាបឋមសិក្សាសម្តេចព្រះរាជអគ្គមហេសី នរោត្តមមុនីនាថ សីហនុ (ឧដុង្គ) មានសិស្សកំពុងសិក្សាកម្រិតបឋមសិក្សាចំនួន ១៤០៤ នាក់
(ស្រី ៦៨៣ នាក់) និងកម្រិតមត្តេយ្យសិក្សាចំនួន ១២០ នាក់។
សាលាជំនាន់ថ្មី គឺជាឈ្មោះកម្មវិធីសិក្សាថ្មីមួយដែលត្រូវបានបង្កើតឡើងដំបូងនៅកម្ពុជាដោយអង្គការសកម្មភាពសម្រាប់បឋមសិក្សានៅកម្ពុជា។ កម្មវិធីនេះត្រូវបានអង្គការកំពុងអនុវត្តនៅសាលាប្រហែល ១០ នៅកម្ពុជា៕
