អតិថិជនកំពុងចាក់សាំងនៅស្ថានីយមួយក្នុងប្រទេសបូលីវី។ រូបថត AFP
ក្រុងឡុងដ៍ៈ ដោយប្រឈមនឹងការធ្លាក់ចុះកំណើនសេដ្ឋកិច្ចពិភពលោក និងស្ដុកលើសតម្រូវការដែលដាក់សម្ពាធលើតម្លៃប្រេង ប្រទេសជាសមាជិករបស់អង្គការប្រទេសនាំចេញប្រេងឆៅ (OPEC) និងប្រទេសផលិតប្រេងដៃគូរបស់ខ្លួនរំពឹងថានឹងរក្សាការកាត់បន្ថយការផលិតបន្តទៀត នៅពេលពួកគេជួបគ្នានៅទីក្រុងវីយែននៅថ្ងៃព្រហស្បតិ៍ និងថ្ងៃសុក្រសប្តាហ៍នេះ ។
ការកាត់បន្ថយទិន្នផលប្រេងឆៅចំនួន ១,២ ពាន់លានបារ៉ែល ក្នុង ១ ថ្ងៃ ពីកម្រិតទិន្នផលនៅខែតុលា ឆ្នាំ ២០១៨ ត្រូវបានរក្សាថេរត្រឹមកម្រិតនេះកាលពីខែធ្នូឆ្នាំមុន និងត្រូវបានបន្តរក្សាការកាត់បន្ថយទិន្នផលក្នុងកម្រិតនេះជាបន្តទៀតនៅក្នុងកិច្ចប្រជុំលើកមុនរបស់ OPEC កាលពីខែមិថុនា ឆ្នាំនេះ។
លោក Tomas Varga អ្នកវិភាគនៅក្រុមហ៊ុន PVM បានថ្លែងថា ប្រទេសទាំងនេះ បច្ចុប្បន្នគ្រោងនឹងរក្សាប្រសិទ្ធភាពអនុវត្តនេះរហូតដល់ខែមីនា ឆ្នាំ ២០២០ ហើយអាចត្រូវពន្យារពេល «រហូតដល់ខែមិថុនា ជាកាលបរិច្ឆេទនៃកិច្ចប្រជុំកំពូលនៅពេលបន្ទាប់» ។
យោងតាមលោក Andy Lipow មកពីសមាគមប្រេង Lipow ការកាត់បន្ថយនេះ អាចបន្តធ្វើឡើងថែមទៀត «រហូតដល់ចុងឆ្នាំ ២០២០»។
ក្រុមប្រឹក្សាគណៈកម្មការសេដ្ឋកិច្ចរបស់អង្គការ OPEC ដែលជាសូចនាករដ៏រឹងមាំមួយនៃទិសដៅរបស់អង្គការនេះបានឲ្យដឹងកាលពីសប្ដាហ៍មុនថា ការរក្សាកាត់បន្ថយដល់ឆ្នាំ ២០២០ នឹងនាំឲ្យទីផ្សារ «មានតុល្យភាព»។
ប្រទេសជាសមាជិករបស់អង្គការ OPEC អាចត្រូវបានទាក់ទាញឲ្យដើរលើផ្លូវដ៏ប្រុងប្រយ័ត្នមួយ ដោយសារបរិបទសេដ្ឋកិច្ចពិភពលោក។
សង្គ្រាមពាណិជ្ជកម្មជាមួយអាមេរិកកំពុងបង្កផលប៉ះពាល់ដល់កំណើនសេដ្ឋកិច្ចនៅប្រទេសចិនដែលជាធម្មតា ចិនគឺជាប្រទេសប្រើប្រាស់ប្រេងច្រើន ខណៈដែលសេដ្ឋកិច្ចអឺរ៉ុបបច្ចុប្បន្នក៏កំពុងស្ថិតនៅទ្រឹងផងដែរ។
លើសពីនេះ ទិន្នផលរបស់ប្រទេសផលិតប្រេងដែលមិនមែនជាសមាជិករបស់អង្គការ OPEC កំពុងកើនឡើងដល់កម្រិតខ្ពស់មិនធ្លាប់មាន ពោលគឺអាមេរិកគឺជាប្រទេសផលិតប្រេងឆៅធំជាងគេរបស់ពិភពលោកចាប់តាំងពីឆ្នាំ ២០១៨ ប្រទេសប្រេស៊ីល និងកាណាដាក៏បានបង្កើនទិន្នផល និងប្រទេសផ្សេងទៀតដូចជា ប្រទេសន័រវែស កំពុងរៀបចំផែនការក្នុងការធ្វើដូច្នេះផងដែរ។
យោងតាមការប៉ាន់ប្រមាណជាផ្លូវការចុងក្រោយបំផុតពីសហរដ្ឋអាមេរិក ស្ដុកក្នុងស្រុកសរុបរបស់អាមេរិកនៅពេលនេះមានចំនួនដ៏ច្រើនដល់ ៤៥២ លានបារ៉ែល។
ក្រុមអ្នកវិភាគបានឲ្យដឹងថា ដោយរាប់បញ្ចូលគ្នា កតា្តទាំងនេះនឹងទុកឱកាសតិចតួចដល់អង្គការ OPEC សម្រាប់ការបង្កើតយុទ្ធសាស្ត្រណាមួយ ប្រសិនបើអង្គការនេះចង់បំពេញគោលបំណងរបស់ខ្លួនដែលបានបញ្ជាក់ថា នឹងទទួលបាន «តម្លៃប្រកបដោយស្មើភាព និងស្ថិរភាពសម្រាប់ក្រុមប្រទេសផលិតប្រេង»។
តម្លៃប្រេងមានស្ថិរភាពចាប់តាំងពីកិច្ចប្រជុំចុងក្រោយរបស់អង្គការ OPEC ដោយប្រេងឆៅប្រភេទ Brent មានតម្លៃប្រហែល ៦០ ដុល្លារ ក្នុង ១ បារ៉ែល លើកលែងតែការឡើងថ្លៃនៅក្នុងខែកញ្ញា ដោយសារការវាយប្រហារលើទីតាំងផលិតប្រេងនៅប្រទេសអារ៉ាប៊ីសាអ៊ូឌីត ខណៈប្រេងឆៅ WTI ថ្លៃប្រហែល ៥៥ ដុល្លារ៕ LA
