ទិដ្ឋភាពថ្ងៃលិចនៅចំកណ្តាលនៃបង្គោលអគ្គិសនីនៅទីក្រុងភ្នំពេញនាពេលកន្លងមក។ ហេង ជីវ័ន
ភ្នំពេញៈ ក្រុមហ៊ុនថាមពល B Grimm Solar Power 1 ដែលជាបុត្រសម្ព័ន្ធរបស់ B Grimm Power Plc មានមូលដ្ឋាននៅថៃបានបញ្ចប់កិច្ចព្រមព្រៀងទិញ-លក់ជាមួយក្រុមហ៊ុន Ray Power លើគម្រោងដំឡើងបន្ទះថាមពលសូឡា ៣០ មេហ្គាវ៉ាត់នៅខេត្តបន្ទាយមានជ័យ។ នេះបើតាមសេចក្តីប្រកាសព័ត៌មានចេញផ្សាយកាលពីថ្ងៃទី ១៤ មករា។
នៅក្នុងឯកសារដែលបានដាក់ផ្សារហ៊ុនរបស់ប្រទេស ថៃ កិច្ចព្រមព្រៀងនេះត្រូវបានអនុម័តដោយអាជ្ញាធរកម្ពុជា។ ឯកសារបានឲ្យដឹងថា៖ «ក្រុមហ៊ុនចង់ធ្វើបច្ចុប្បន្នភាពដំណើរការកិច្ចព្រមព្រៀងនេះដែលការទិញលក់ភាគហ៊ុនត្រូវបានបញ្ចប់ជាផ្លូវការ និងត្រូវបានយល់ព្រមពីអាជ្ញាធររួចរាល់ហើយ»។
ក្នុងឯកសារដាក់ទៅផ្សារហ៊ុនកាលពីខែវិច្ឆិកា ក្រុមហ៊ុន B.Grimm Solar Power បានប្រកាសថា ក្រុមហ៊ុនបានចូលទៅក្នុងកិច្ចព្រមព្រៀងទិញ-លក់ជាមួយ Ray Power ជាមួយនឹងតម្លៃ ៣០ ម៉ឺនដុល្លារ។
លោក វ៉ិចទ័រ ហ្សូនា អ្នកនាំពាក្យ និងជាអគ្គនាយកនៃនាយកដ្ឋានថាមពលនៅក្រសួងរ៉ែ និងថាមពលធ្លាប់បានលើកឡើងថា ការដំឡើងបន្ទះថាមពលសូឡាត្រូវបានសាងសង់ឡើងលើផ្ទៃដី ៤០ ហិកតា នៅក្នុងក្រុងសិរីសោភណ្ឌ ខេត្តបន្ទាយមានជ័យ។
កម្ពុជាបានអនុម័តគម្រោងថាមពលសូឡាដែលមានសមត្ថភាព ៤១០ មេហ្គាវ៉ាត់ ហើយក្រុមហ៊ុននេះនឹងពិភាក្សាលម្អិតពីតម្លៃលក់ជាមួយអគ្គិសនីកម្ពុជា (EdC)។ នេះបើតាមសេចក្តីរាយការណ៍។
សេចក្តីរាយការណ៍លើកមុនឲ្យដឹងថា កិច្ចព្រមព្រៀងបានផ្តល់សិទ្ធិឲ្យក្រុមហ៊ុន B Grimm Power អភិវឌ្ឍគម្រោងថាមពលសូឡាដែលមានរយៈពេល ២០ ឆ្នាំ ក្នុងកិច្ចព្រមព្រៀងជាមួយ EdC។
ក្រុមហ៊ុន B Grimm Power Plc បានចំណាយថវិកាជាង ១,២៦ ពាន់លានដុល្លារ វិនិយោគគម្រោងថាមពលរបស់ខ្លួនដែលនឹងសម្រេចគោលដៅឲ្យបាន ៥ ០០០ មេហ្គាវ៉ាត់ ត្រឹមឆ្នាំ ២០២២ ដែលក្រុមហ៊ុនបានផ្តោតលើការអភិវឌ្ឍថាមពលបៃតង់ ដូចជា ថាមពលសូឡា ថាមពលខ្យល់ និងគម្រោងវារីអគ្គិសនីក្នុងបណ្តាប្រទេសនៅអាស៊ី ដូចជា ម៉ាឡេស៊ី កម្ពុជា កូរ៉េខាងត្បូង និងហ្វីលីពីន៕
