ភ្ញៀវទេសចរចូលមកទស្សនាប្រាសាទអង្គរវត្ត មុនការរីករាលដាលជំងឺកូវីដ ១៩។ រូបថត ភ្នំពេញ ប៉ុស្តិ៍
ភ្នំពេញៈ វិស័យឯកជនរំពឹងថា កម្ពុជានឹងបើកទ្វារទូលាយជាងមុនក្នុងការទទួលទេសចរអន្តរជាតិដែលចាក់វ៉ាក់សាំងរួចរាល់ទៅតំបន់សៀមរាបអង្គរ ចាប់ពីត្រីមាសទី ៤ ឆ្នាំ ២០២១ តទៅ ក្រោយពីរដ្ឋមន្ត្រីក្រសួងទេសចរណ៍បានលើកសំណើនេះទៅលោកនាយករដ្ឋមន្ត្រី ហ៊ុន សែន កាលពីពេលថ្មីៗនេះ។
រដ្ឋមន្ត្រីក្រសួងទេសចរណ៍លោក ថោង ខុន កាលពីថ្ងៃទី ៧ ខែមេសា ឱ្យដឹងថា លោកបានស្នើសុំឱ្យលោកនាយករដ្ឋមន្ត្រី ហ៊ុន សែន ពិចារណាពីការបើកទ្វារទទួលភ្ញៀវទេសចរអន្តរជាតិដែលចាក់វ៉ាក់សាំងបង្ការជំងឺកូវីដ ១៩ រួចរាល់ដោយឱ្យពួកគេមកទស្សនាគោលដៅទេសចរណ៍សៀមរាប-អង្គរ ចាប់ពីត្រីមាសទី៤ ឆ្នាំ ២០២១ តទៅ ខណៈដែលការគ្រប់គ្រងសហគមន៍នៅខេត្តសៀមរាបអង្គរស្ថិតក្នុងភាពល្អប្រសើរព្រមជាមួយនឹងការជំរុញដំណើរការចាក់វ៉ាក់សាំងឱ្យបានលឿនដល់មន្ត្រីរាជការ អ្នកបម្រើការក្នុងឧស្សាហកម្មទេសចរណ៍ និងវិស័យផ្សេងៗទៀត។
ប្រធានសមាគមទីភ្នាក់ងារទេសចរណ៍កម្ពុជា អ្នកស្រី ឆាយ ស៊ីវលីន បានប្រាប់ភ្នំពេញប៉ុស្តិ៍កាលពីថ្ងៃព្រហស្បតិ៍ថា ក្នុងនាមអ្នកនៅក្នុងវិស័យទេសចរណ៍ អ្នកស្រីពិតជាចង់ឱ្យវិស័យនេះមានជីវិតឡើងវិញណាស់ ព្រោះរយៈពេលជាង ១ ឆ្នាំមកហើយដែលវិស័យនេះត្រូវជាប់គាំង។ ការបើកឱ្យមានភ្ញៀវទេសចរអន្តរជាតិឡើងវិញ មិនត្រឹមតែធ្វើឱ្យអ្នកនៅក្នុងវិស័យនេះទទួលបានចំណូល និងការងារប៉ុណ្ណោះទេ ប៉ុន្តែវាក៏ជាការបញ្ជាក់ពីភាពជោគជ័យរបស់កម្ពុជាក្នុងការគ្រប់គ្រងការឆ្លងរាលដាលជំងឺកូវីដបានផងដែរ។
អ្នកស្រីថ្លែងថា៖ «យើងពិតជាចង់ឱ្យវិស័យនេះចាប់ផ្តើមឡើងវិញ»។
ទោះយ៉ាងណាអ្នកស្រីលើកឡើងថា ដោយសារវិស័យមួយនេះគ្មានសកម្មភាពយូរមកហើយ ដូច្នេះបើអាចសូមឱ្យរដ្ឋាភិបាលប្រកាសពីការអនុញ្ញាតឱ្យបានឆាប់ ដើម្បីឱ្យវិស័យឯកជនមានពេលគ្រប់គ្រាន់សម្រាប់រៀបចំធនធានមនុស្សរបស់ខ្លួនឡើងវិញ។
យោងតាមអ្នកស្រី ស៊ីវលីន វិបត្តិនៃការឆ្លងរាលដាលកូវីដ ១៩ បានធ្វើឱ្យវិស័យទេសចរណ៍កម្ពុជាត្រូវការពេលយ៉ាងតិច ៥ ឆ្នាំទើបអាចមានភាពល្អប្រសើរដូចឆ្នាំ ២០១៩។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជាបានប្រាប់ថា ដើម្បីធានាបានទំនុកចិត្តពីគ្រប់ភាគីពាក់ព័ន្ធ គេត្រូវតែកំណត់ពីលក្ខខណ្ឌមួយចំនួនឱ្យច្បាស់លាស់ ដើម្បីធានាថានឹងមិនមានការឆ្លងរាលដាលជំងឺកូវីដ១៩ ក្នុងចំណោមភ្ញៀវទេសចរ និងអ្នកពាក់ព័ន្ធ។ លោកបានបន្តថា ការកំណត់នោះអាចមានការកំណត់ពីលក្ខខណ្ឌការចាក់វ៉ាក់សាំង (ប្រភេទ និងរយៈពេលចាក់វ៉ាក់សាំង) ការកាត់បន្ថយពេលធ្វើចត្តាឡីស័ក និងការកំណត់ពីកាតព្វកិច្ចមួយចំនួនដែលភ្ញៀវ និងអ្នកពាក់ព័ន្ធត្រូវធ្វើ។
លោកនិយាយថា៖ «ដើម្បីឱ្យដំណើរការនេះអាចដំណើរទៅដោយជោគជ័យ និងទទួលបាននូវទំនុកចិត្តពីគ្រប់ភាគីពាក់ព័ន្ធ គឺទាមទារឱ្យក្រសួងទេសចរណ៍ត្រូវធ្វើការងារជាមួយក្រសួងសុខាភិបាល ដើម្បីរៀបចំឱ្យមាន Code of conduct សម្រាប់ភ្ញៀវទេសចរនៅក្នុងតំបន់សៀមរាប-អង្គរ»។
ជាមួយគ្នានេះលោកក៏លើកឡើងថា ដើម្បីធានាប្រសិទ្ធភាពនៃការទប់ស្កាត់ការឆ្លងរាលដាលពីបុគ្គលម្នាក់ទៅម្នាក់ ការរឹតត្បិតការធ្វើដំណើររបស់ភ្ញៀវក្នុងស្រុកដែលមិនបានចាក់វ៉ាក់សាំងទៅកម្សាន្តនៅតំបន់សៀមរាប-អង្គរក៏ជារឿងដែលរដ្ឋាភិបាលត្រូវពិចារណាផងដែរ។
លោក ខៀវ ធី ប្រធានសមាគមមគ្គុទ្ទេសក៍ទេសចរណ៍អង្គរបាននិយាយថា ការបើកទទួលភ្ញៀវទេសចរបរទេសឡើងវិញ គឺជាក្តីប្រាថ្នារបស់អ្នកនៅក្នុងវិស័យទេសចរណ៍ ប៉ុន្តែដើម្បីឱ្យវិស័យនេះមានកំណើន និងមានភាពជឿជាក់ វាក៏ទាមទារឱ្យអ្នកក្នុងវិស័យនេះទទួលបានការចាក់វ៉ាក់សាំងការពារជំងឺកូវីដ ១៩ ផងដែរ។
លោកអះអាងថា៖ «បើកម្ពុជាបើកទទួលភ្ញៀវទេសចរបរទេសចូលមកក្នុងត្រីមាសទី៤ មែន ខ្ញុំគិតថា វានឹងធ្វើឱ្យអ្នកបម្រើការក្នុងវិស័យនេះមានការងារ និងប្រាក់ចំណូលឡើងវិញ។ ទោះយ៉ាងណាដោយសារក្តីព្រួយបារម្ភ និងសេដ្ឋកិច្ចមិនទាន់មានភាពរឹងមាំ ខ្ញុំគិតថា ភ្ញៀវបរទេសមកកម្សាន្តនៅកម្ពុជានឹងមិនទាន់ចំនួនច្រើនទេ»។
យោងតាមលោក ថោង ខុន ពេលនេះក្រសួងទេសចរណ៍ទទួលបានការអនុញ្ញាតពីលោកនាយករដ្ឋមន្ត្រីឱ្យចាប់ផ្តើមធ្វើការពិភាក្សាជាមួយក្រសួងសុខាភិបាល (គណៈកម្មការចំពោះកិច្ច) ក្រសួងស្ថាប័នពាក់ព័ន្ធ រដ្ឋបាលខេត្ត និងវិស័យឯកជនរួចហើយ ដើម្បីសិក្សាអំពីការបើកទទួលកញ្ចប់ទស្សនកិច្ចចំពោះទេសចរចាក់វ៉ាក់សាំងរួច។
ទិន្នន័យក្រសួងទេសចរណ៍ឱ្យដឹងថា ក្នុងឆ្នាំ ២០២០ កម្ពុជាទទួលបានភ្ញៀវទេសចរបរទេស ១ ៣០៦ ១៤៣ នាក់ ធ្លាក់ចុះ ៨០,២ ភាគរយធៀបនឹងឆ្នាំ ២០១៩ ដែលមាន ៦ ៦១០ ៥៩២ នាក់។ ក្នុងឆ្នាំ ២០១៩ ចំណូលបានពីទេសចរអន្តរជាតិ មាន ៤,៩១ ពាន់លានដុល្លារ កើនឡើង ១២,៤ ភាគរយធៀបនឹងឆ្នាំ ២០១៨ ដែលមានចំនួន ៤,៣៧ ពាន់លានដុល្លារ៕ LA
