មូលបត្របំណុលសាជីវកម្ម ដែលបោះផ្សាយដោយគ្រឹះស្ថានមីក្រូហិរញ្ញវត្ថុ LOLC ត្រូវបានដាក់ឲ្យជួញដូរជាសាធារណៈ នៅក្រុមហ៊ុនផ្សារមូលបត្រកម្ពុជា (CSX) នៅថ្ងៃសុក្រនេះ។ LOLC (CAMBODIA) PLC
ភ្នំពេញៈ មូលបត្របំណុលសាជីវកម្ម ដែលបោះផ្សាយដោយគ្រឹះស្ថានមីក្រូហិរញ្ញវត្ថុ LOLC ត្រូវបានដាក់ឲ្យជួញដូរជាសាធារណៈ នៅក្រុមហ៊ុនផ្សារមូលបត្រកម្ពុជា (CSX) នៅថ្ងៃសុក្រនេះ បន្ទាប់ពីមូលបត្រនេះត្រូវបានទិញអស់ទាំងស្រុង ពីវិនិយោគិនស្ថាប័នតាំងពីអំឡុងបរិវិសកម្មកាលពីថ្ងៃទី ២៦ មេសា។
គ្រឹះស្ថានមីក្រូហិរញ្ញវត្ថុ LOLC បានប្រមូលទុន ២០ លានដុល្លារ បានដោយជោគជ័យសម្រាប់ពង្រីកអាជីវកម្មរបស់ខ្លួន ដោយការបោះផ្សាយមូលបត្របំណុល ២ ប្រភេទ រួមមានមូលបត្របំណុល ដែលមានការធានាលើហានិភ័យអត្រាប្តូរប្រាក់ និងមូលបត្របំណុលមិនមានធានាហានិភ័យអត្រាប្តូរប្រាក់។
មូលបត្របំណុលនេះត្រូវបានធានាទិញដោយក្រុមហ៊ុន Yuanta Securities ហើយត្រូវបានទិញបន្តដោយវិនិយោគិនស្ថាប័នក្នុងអត្រាការប្រាក់ ៨ ភាគរយសម្រាប់មូលបត្របំណុល ដែលមានការធានាលើហានិភ័យអត្រាប្តូរប្រាក់ និងអត្រាការប្រាក់ ៩ ភាគរយសម្រាប់មូលបត្របំណុលមិនមានធានាហានិភ័យអត្រាប្តូរប្រាក់។ មូលបត្របំណុលសរុប ៨០ ម៉ឺនប័ណ្ណត្រូវបានបោះផ្សាយ និងលក់ចេញក្នុងតម្លៃ ១០ ម៉ឺនរៀលក្នុង ១ ប័ណ្ណ។
លោក ស៊ឹម តារា ប្រធានផ្នែកស្រាវជ្រាវរបស់ក្រុមហ៊ុនមូលបត្រ Yuanta Securities បានឲ្យដឹងកាលពីថ្ងៃព្រហស្បតិ៍ថា មូលបត្របំណុលទាំង ២ ប្រភេទមានការចង់ជាវច្រើន រហូតធ្វើឲ្យចំនួនបញ្ជាទិញច្រើនជាងចំនួនត្រូវលក់។ លោកថ្លែងថា៖ «មានក្រុមវិនិយោគិនដែលបានមកក្រោយបន្ទាប់ពីយើងបានបិទបញ្ជីរួច ហើយពួកគេមិនមានមូលបត្រទិញដូចដែលចង់បាននោះទេ»។
លោក តារា ឲ្យដឹងថា ក្រុមវិនិយោគិនដែលទិញមូលបត្រនេះ គឺជាក្រុមវិនិយោគិនស្ថាប័នភាគច្រើនជាធនាគារក្នុងស្រុកដែលគ្រប់គ្រងដោយបរទេស។ លោកបន្ថែមថា ខណៈមូលបត្របំណុលនេះនឹងអាចរកបានសម្រាប់ការជួញដូរនៅលើ CSX វាមិនរំពឹងថា នឹងមានការជួញដូរដ៏សកម្មដូចជាភាគហ៊ុននោះទេ ដោយសារតែមូលបត្របំណុលសាជីវកម្មជាទូទៅមិនសូវមានសកម្មភាពទិញលក់ដូចជាមូលបត្របំណុលរដ្ឋាភិបាលនោះទេ។
លោកថ្លែងថា៖ «ករណីនេះ ក៏កើតមានផងដែរនៅទីផ្សារមូលបត្ររីកចម្រើន ដោយមិនមែនតែទីផ្សារមិនទាន់រីកចម្រើនខ្លាំង ដូចជាកម្ពុជានោះទេ។ ជាក់ស្តែងដូចជាមូលបត្របំណុលសាជីវកម្ម LOLC ដោយសារតែក្រុមវិនិយោគិនភាគច្រើន គឺជាក្រុមវិនិយោគិនស្ថាប័នមានរយៈពេលវែង ជាមួយនឹងទំហំវិនិយោគធំ សកម្មភាពជួញដូរ (នៅ CSX) អាចកម្រកើតឡើង»។
អ្នកស្រី គឹម សុផានីតា ប្រធាននាយកដ្ឋានប្រតិបត្តិការទីផ្សារ CSX បានឲ្យដឹងកាលពីម្សិលមិញថា ការចុះបញ្ជីមូលបត្របំណុលទី២ នឹងផ្ដល់ទំនុកចិត្តកាន់តែច្រើនដល់ក្រុមហ៊ុននានា ដែលកំពុងពិចារណាការប្រមូលមូលនិធិតាមរយៈទីផ្សារមូលបត្រ។
ខណៈក្រុមហ៊ុននានា មានភាពស្ទាក់ស្ទើរ និងបារម្ភក្នុងការចូលទីផ្សារថ្មីនេះ ដោយរង់ចាំមើលក្រុមហ៊ុនផ្សេងទៀត អ្នកស្រី សុផានីតា បានឲ្យដឹងថា ភាគជោគជ័យនៃការចេញមូលបត្រទី២ និង IPO ជាច្រើននឹងជួយផ្ដល់ទំនុកចិត្តកាន់តែច្រើនសម្រាប់ក្រុមហ៊ុនផ្សេងទៀត។
លោកស្រីថ្លែងថា៖ «ក្រុមហ៊ុនជាច្រើនជាពិសេសគ្រឹះស្ថានហិរញ្ញវត្ថុ នៅពេលនេះកំពុងព្យាយាមក្នុងការចេញមូលបត្របំណុលនៅក្នុងទីផ្សារមូលធន ដើម្បីទទួលបានការផ្ដល់ការលើកទឹកចិត្តពន្ធ ដោយរដ្ឋាភិបាល។ ខ្ញុំផ្ដល់យោបល់ដល់ក្រុមហ៊ុនផ្សេងទៀត ដែលមិនបានគិតអំពីទីផ្សារនេះ គួរតែធ្វើវានៅពេលនេះ ដើម្បីចាប់យកអត្ថប្រយោជន៍ដ៏ធំនេះ»។
លោកស្រីបន្តថា៖ «សម្រាប់កំណើនរយៈពេលវែង ពួកគេគួរតែពិចារណាការបោះផ្សាយលក់ហ៊ុន បន្ថែមលើមូលបត្របំណុល»៕LA
