ភ្ញៀវទេសចរងូតទឹកធ្លាក់ដ៏ត្រជាក់ស្រេង នៅភ្នំត្បែង ខេត្តព្រះវិហារ នាពេលកន្លងមក។ ហុង មិនា
ភ្នំពេញ៖ យ៉ាងហោចណាស់រមណីយដ្ឋានទេសចរណ៍ប្រមាណ ២០០ កន្លែង ត្រូវបានគេរំពឹងថា នឹងដំណើរការអាជីវកម្មឡើងវិញ បន្ទាប់ពីបញ្ចប់ការហាមឃាត់ការធ្វើដំណើរ និងការបញ្ចប់ការបិទរមណីយដ្ឋានទេសចរណ៍នៅទូទាំងប្រទេស។
កាលពីថ្ងៃទី ២៥ ខែមេសា រដ្ឋាភិបាលកម្ពុជាបានសម្រេចបញ្ចប់ការហាមឃាត់ការធ្វើដំណើរ និងការបញ្ចប់ការបិទរមណីយដ្ឋានទេសចរណ៍នៅទូទាំងប្រទេស លើកលែងតែរមណីយដ្ឋាននៅក្នុងខេត្ត-ក្រុង ដែលត្រូវបានបិទខ្ទប់។
លោក តុប សុភ័ក្រ មន្រ្តីនាំពាក្យក្រសួងទេសចរណ៍ប្រាប់ ភ្នំពេញ ប៉ុស្តិ៍ថា នៅកម្ពុជាមានរមណីយដ្ឋាន និងគោលដៅទេសចរណ៍ដែលមានសក្តានុពលសរុបចំនួន ៥៥៧ កន្លែង រួមបញ្ជូលទាំងរមណីយដ្ឋានទើបនឹងបង្កើតថ្មីនៅក្នុងដំណាក់កាលជំងឺកូវីដ ១៩។
លោក សុភ័ក្រ រំពឹងថា រមណីយដ្ឋាន (សហគមន៍ទេសចរណ៍ គោលដៅទេសចរណ៍) យ៉ាងតិចចំនួន ២២៥ នឹងបើកដំណើរការឡើងវិញ បន្ទាប់ពីរដ្ឋាភិបាលបញ្ចប់ការហាមឃាត់ការធ្វើដំណើរ និងការបញ្ចប់ការបិទរមណីយដ្ឋានទេសចរណ៍នៅទូទាំងប្រទេស។
លោកថ្លែងថា៖ «ការបើករមណីយដ្ឋានទេសចរណ៍តាមគោលការណ៍របស់រាជរដ្ឋាភិបាលនេះ គឺយើងបើកតែនៅតំបន់ដែលអត់មានវិធានការបិទខ្ទប់ប៉ុណ្ណោះ ដូច្នេះតំបន់បិទខ្ទប់ដូចជារាជធានីភ្នំពេញ ក្រុងតាខ្មៅ និងក្រុងព្រះសីហនុ និងខេត្តមួយចំនួនទៀតនឹងមិនអនុញ្ញាតឲ្យបើកជាដាច់ខាត»។
លោកជឿថា ការបើកដំណើរការរមណីយដ្ឋានទេសចរណ៍ឡើងវិញនេះ នឹងជួយឲ្យមានសកម្មភាពសេដ្ឋកិច្ចនៅតាមមូលដ្ឋាន។
លោកមានប្រសាសន៍ថា៖ «ជារួមយើងអាចនិយាយបានរមណីយដ្ឋាន កន្លែងកម្សាន្ត ដែលជាគោលដៅទេសចរណ៍សក្តានុពល ពិតជាធ្វើឲ្យប្រជាពលរដ្ឋរបស់យើង និងភ្ញៀវទេសចរយើងទៅលំហែកម្សាន្តក្នុងដំណាក់កាលជំងឺកូវីដ ១៩ នេះ យើងត្រូវមានការប្រុងប្រយ័ត្នខ្ពស់ និងគោរពតាមគោលការណ៍ក្រសួងសុខាភិបាលជាប្រចាំ»។
អ្នកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា (CATA) បានស្វាគមន៍ចំពោះរាជរដ្ឋាភិបាលបើកឲ្យមានការធ្វើដំណើរឆ្លងកាត់មួយទៅខេត្តមួយ (លើកលែងតែខេត្តបិទខ្ទប់) និងបើករមណីយដ្ឋានទេសចរណ៍ឡើងវិញនៅពេលនេះ។
អ្នកស្រី ស៊ីវលីន ឲ្យដឹងថា ការបើកឲ្យដំណើរការរមណីយដ្ឋានឡើងវិញ នឹងជួយដល់អាជីវកម្មក្នុងវិស័យទេសចរណ៍ងើបឡើងវិញជាបណ្តើរៗនៅតាមមូលដ្ឋាន។
អ្នកស្រីនិយាយថា៖ «ការបើករមណីយដ្ឋានទេសចរណ៍ទូទាំងប្រទេសឡើងវិញនឹងជំរុញឲ្យមនុស្សដើរកម្សាន្តច្រើន បន្ទាប់ពីបិទខ្ទប់មួយរយៈពេលខ្លី។ ការចេញដើររបស់ប្រជាពលរដ្ឋអាចជួយដល់ម្ចាស់អាជីវកម្មទទួលបានចំណូលក្នុងការស្តារអាជីវកម្មឡើងវិញផងដែរ»។
របាយការណ៍ស្ថិតិទេសចរណ៍ឆ្នាំ ២០២០ បង្ហាញថា វិបត្តិជំងឺកូវីដ ១៩ បានជះឥទ្ធិពលយ៉ាងខ្លាំងដល់វិស័យទេសចរណ៍នៅកម្ពុជាដោយប្រាក់ចំណូលពីទេសចរណ៍អន្តរជាតិដែលកម្ពុជាទទួលបានក្នុងឆ្នាំ ២០២០ មានត្រឹម ១,០២៣ ពាន់លានដុល្លារ ធ្លាក់ចុះ ៧៩,២ ភាគរយ បើធៀបនឹងឆ្នាំ ២០១៩ ដែលមានចំនួន ៤,៩១៩ ពាន់លានដុល្លារ។
របាយការណ៍នេះ ឲ្យដឹងថា ភ្ញៀវទេសចរអន្តរជាតិមកប្រទេសកម្ពុជា មានចំនួន ១,៣១ លាននាក់ ថយចុះ ៨០,២ ភាគរយ ធៀបនឹងឆ្នាំ ២០១៩ ដែលមានចំនួន ៦,៦១ លាននាក់៕
