គម្រោង​អង្គរ​គឺជា​គម្រោង​កុមារ​ជួយ​កុមារ


Content image - Phnom Penh Post

តាំងពី ឆ្នាំ​២០០៦​មក មន្ត្រីរដ្ឋបាល សាស្ត្រាចារ្យ និង​បុគ្គលិក សិក្សា​មកពី​សាលា​នានា នៅ​ភាគ​ខាង​លិច​ប្រទេស​អូស្ត្រាលី បាន​បន្ត​ផ្តល់​ការ​គាំទ្រ​ជា​ធនធាន​អប់រំ និង​ការ​គាំទ្រ​ផ្នែក​បច្ចេកទេស​ទៅ​សាលា «បងស្រី​កម្ពុជា»​មួយ​នៅក្នុង​ខេត្ត​កំពង់ស្ពឺ​ដែល​មាន​ទីតាំង​ប្រមាណ​ជា ៥០​គ.ម ភាគ​និរតី​នៃ​រាជធានី​ភ្នំពេញ​។

លោក សម សាមេត្តា ប្រធាន​មន្ទីរ អប់រំ យុវជន និង​កីឡា ខេត្ត​កំពង់ស្ពឺ បាន​ឲ្យ​ដឹង​ថា គម្រោង​អង្គរ “ANGKOR Project” គឺជា​គម្រោង​មួយ​ដែល​កំពុង តែ​ដំណើរការ​ដោយ​បណ្តា​អ្នក​ស្ម័គ្រចិត្ត ដែល​មកពី​ស្ថាប័ន​អប់រំ​នានា ពី​តំបន់​ភាគ​ខាង​លិច​នៃ​ប្រទេស​អូស្ត្រាលី និង​ទទួល​បាន​ការ​គាំទ្រ​ពី​លោកស្រី សារិន អូណែល ដែល​ជា​អគ្គនាយក​នៃ​អគ្គនាយកដ្ឋាន​អប់រំ​។ លោក​បាន​ឲ្យ​ដឹង​ថា​គម្រោង​នេះ​ត្រូវ បាន​បង្កើតឡើង​ដើម្បី​ផ្តល់​នូវ​ការ​ពង្រឹង​បរិស្ថាន​សិក្សា​នៅ​តាម​សាលា​នានា ក៏ ដូចជា​អភិវឌ្ឍ​សមត្ថភាព​លោកគ្រូ អ្នកគ្រូ​កម្ពុជា​។ គម្រោង​អង្គរ ក៏​ជា​គម្រោង​ដែល​ផ្តល់​ឱកាស​ឲ្យ​សិស្ស​នៅ​សាលា​នា​ភាគ​ខាង​លិច​ប្រទេស អូស្ត្រាលី​មក​បង្កើន​ការ​យល់​ដឹង​អំពី​ប្រជាជាតិ​នៅ​អាស៊ី ពិសេស​កម្ពុជា បញ្ហា​ភាពក្រីក្រ និង​ជំនួយ​ជា​សកល​ផង​ដែរ​។

140124_08a
លោកស្រី ណាតាលី តារ សហការី
Content image - Phnom Penh Post
Content image - Phnom Penh Post

លោក​បាន​បន្ត​ទៀតថា នៅក្នុង​អំឡុង​រយៈពេល ៧​ឆ្នាំ កន្លង​ទៅ​នេះ ជា គោលការណ៍ គឺថា សាស្ត្រាចារ្យ និង​បុគ្គលិក​មន្ទីរអប់រំ​នៅ​ភាគ​ខាង​លិច​អូស្ត្រាលី ត្រូវមាន​មូលនិធិ​ធ្វើ​ដំណើរ​ផ្ទាល់​ខ្លួន​របស់​គេ​មក​កម្ពុជា ដើម្បី​គាំទ្រ និង​ជួយ​សាលា​«បងស្រី​»​នៅក្នុង​ខេត្ត កំពង់ស្ពឺ​។ នៅ​ភាគ​ខាង​លិច​ប្រទេស​អូស្ត្រាលី កុមារ​ដែល​កំពុង​សិក្សា​នៅ​សាលាបឋមសិក្សា និង​មធ្យមសិក្សា គេ​មាន​កម្មវិធី​ប្រមូល​មូលនិធិ​នៅ​សាលា​របស់​ពួកគេ​ដើម្បី​ទិញ​សម្ភារ សិក្សា និង​វិធីសាស្ត្រ​បង្រៀន របៀប​រក​ប្រភព​ទឹក សាងសង់​បង្គន់ បំពាក់​អគ្គិសនី និង​កសាង​សាលារៀន​ដើម្បី​ជួយ​កុមារ​កម្ពុជា​ឲ្យ​ទទួល​បាន​បរិយាកាស​សិក្សា ដ៏​ប្រសើរ​មួយ​។

ពាក្យ​ស្លោក​ពី​គម្រោង «​កុមារ​ជួយ​កុមារ​» (Children Helping Children) នេះ​បាន​បង្ហាញ​អំពី​សារៈសំខាន់ និង​ជំរុញ​ឲ្យ​កុមារ​ដែល​មាន​លទ្ធភាព​ចេះ​ជួយ​យក​អាសា​ដល់​កុមារ​ដទៃ​ទៀត​។ សាលា​ទាំងនោះ ក៏ បាន​បញ្ចូល​នូវ​កម្មវិធី​ផ្សង​សន្សំសំចៃ​នានា ដើម្បី​ធានា​ថា គ្រប់​កាក់​គ្រប់​សេន​ត្រូវ​បាន​ចំណាយ ដើម្បី​កែលម្អ​ការអប់រំ ព្រម​ទាំង​សុខុមាលភាព​កុមារ និង​គ្រូបង្រៀន​នៅ​កម្ពុជា​។ គ្រប់​មូលនិធិ​ទាំងអស់​ត្រូវ​បាន​ផ្តល់ ជូន​ទៅ​សាលា​បងស្រី​ទាំងអស់ ដែល​ស្ថិត​នៅ ក្រោម​កម្មវិធី​ឧបត្ថម្ភ​ដោយ​ធនាគារ​អេអិនហ្សិត រ៉ូយ៉ាល់ (ANZ Royal)​។

បណ្តា​គ្រូបង្រៀន​អូស្ត្រាលី​ទាំងនោះ មិន​ផ្តល់​ត្រឹម​តែ​ធនធាន និង​ហេដ្ឋារចនាសម្ព័ន្ធ​ជា​រូបវ័ន្ត​ទៅ​តាម​បណ្តា​សាលា​ទាំងនោះ​ទេ ប៉ុន្តែ​ពួកគេ​ក៏​បាន​ចំណាយ​ពេលវេលា​របស់​ពួកគេ​នៅ​តាម​សាលា​គំរូ​នៅ​កម្ពុជា​នានា ដើម្បី​បាន​ជា​ជំនួយ​ដល់​ការ បង្ហាត់បង្ហាញ​អំពី​ការ​បង្រៀន និង​ការ​សិក្សា ព្រមទាំង​យុទ្ធសាស្ត្រ​សហការ​ដើម្បី​គុណភាព​នៃ​ការ​បង្រៀន​ផង​ដែរ​។

ក្រៅ​អំពី ការ​ឧបត្ថម្ភ​ខាង​លើ គំនិត​ផ្តួចផ្តើម​ផ្សេងៗ​ទៀត​នៅក្នុង​គម្រោង​អង្គរ​នេះ គឺ​រួម​បញ្ចូល ទាំង​ការ​គាំទ្រ​ឲ្យ​មាន​សន្និសីទ​នៃ​ភាព​ជា​អ្នក​ដឹកនាំ​ប្រចាំ​ឆ្នាំ​សម្រាប់ បណ្តា​នាយក​សាលា​បងស្រី​នានា និង​កម្មវិធី​ទស្សនកិច្ច​សិក្សា​នៅ​តាម​សាលា​ភាគ​ខាង​លិច​នៅ​ប្រទេស​អូស្ត្រាលី​ផង​ដែរ ។ ដូច្នេះ​ដើម្បី​ឲ្យ​គម្រោង​នេះ​ជោគជ័យ សមាជិក​គណៈកម្មាធិការ​នៅក្នុង​គម្រោង​អង្គរ ព្រម​ទាំង​មន្ត្រី​អប់រំ​នានា​មកពី​ការិយាល័យ​អប់រំ​ស្រុក​នៅក្នុង​ខេត្ត​បាន ប្រឹងប្រែង​ធ្វើ​កិច្ចការ​នេះ​ខ្លាំងក្លា​ណាស់​។

កាលពី​ថ្ងៃ​ទី​១៣ ខែ​មករា ឆ្នាំ​២០១៤ កន្លង​ទៅ​នេះ សាស្ត្រាចារ្យ​អូស្ត្រាលី​ចំនួន​បី​រូប មកពី​ទីក្រុង​ភើត (Perth) គឺ​លោកស្រី ណាតាលី តារ, លោក មេនឌី រូប៊ីណិច និង លោកស្រី មេហ្គាន រ៉ូស បាន​មក​ធ្វើ​បទ​បង្ហាញ​មួយ​ជូន​សាស្ត្រាចារ្យ​កម្ពុជា​ចំនួន​៤៦​រូប មកពី​សាលាបឋមសិក្សា និង សាលា​មធ្យមសិក្សា​នានា​នៅក្នុង​ខេត្ត កំពង់ស្ពឺ​។ បទ​បង្ហាញ​នោះ គឺ​ផ្តោត​សំខាន់​នៅលើ​បញ្ហា​អក្សរសាស្ត្រ តាមរយៈ​យុទ្ធសាស្ត្រ ជំរុញ​ឲ្យ​សិស្ស​អាន​។ បទបង្ហាញ នោះ​គឺ​ធ្វើ​ជា​ភាសា​ខ្មែរ​តាមរយៈ​អ្នក​បកប្រែ​។

លោក សម សាមេត្តា បាន​ឲ្យ​ដឹង​ថា បណ្តា​សាស្ត្រាចារ្យ​ដែល​បាន​ចូលរួម​ក្នុង​កម្មវិធី​បទ​បង្ហាញ នេះ​បាន​សរសើរ និង​ចូលរួម​យ៉ាង ផុលផុស​។ បទ​បង្ហាញ​បាន​ដំណើរការ​ពោរពេញ​ដោយ​ឆន្ទៈ និង​ភាព​រស់រវើក​ពេញ​មួយ​ថ្ងៃ តាមរយៈ​ការ​ពិភាក្សា​អំពី​យុទ្ធសាស្ត្រ នៅក្នុង​ការ​សម្របសម្រួល​ការ សិក្សា​នៅក្នុង​ថ្នាក់​។

លោក​បាន​បន្ត​ទៀត​ថា គម្រោង អង្គរ​នេះ​គឺ​កំពុង​តែ​ជួយ​សាស្ត្រាចារ្យ​កម្ពុជា​ឲ្យ​កែលម្អ​វិធីសាស្ត្រ​បង្រៀន​តាមរយៈ​ការ​ឃើញ​នូវ បទពិសោធ​ដែល​កុមារ​អូស្ត្រាលី កំពុង​រៀន​និង​ត្រូវ​បាន​បង្រៀន​។ សាស្ត្រាចារ្យ​ខ្លះ​បាន​លើក​ឡើង​ថា ជាមួយ​នឹង​សិស្ស​មួយ​ថ្នាក់​រហូត​ដល់​៦០​នាក់ វា​សំខាន់​នៅ ត្រង់​ថា បទ​បង្ហាញ​នោះ​ធ្វើ​ឲ្យ​យើង​ដឹង​អំពី​វិធីសាស្ត្រ​ដែល​ត្រូវ​បង្រៀន និង​មើល​ថែទាំ​ពួកគេ​ទាំងអស់​គ្នា​។

លោកស្រី ណាតាលី តារ គណៈសាស្ត្រាចារ្យ​នៅ​សាលាបឋមសិក្សា​ហាយហ្គេត (Highgate Primary School) បាន​បង្ហាញ​អំពី​សារៈសំខាន់​នៃ​ការ​យល់ដឹង និង​តម្លៃ​នៃ​ការ​បង្រៀន​នៅក្នុង​បរិបទ​កម្ពុជា​ថា វា​មាន​សារៈសំខាន់​ណាស់​ដែល យើង​ត្រូវ​តែ​ដឹង​អំពី​យុទ្ធសាស្ត្រ​ទាំងអស់​ដែល​អាច​នឹង​ផ្ទេរ​បទពិសោធ​មក ដល់​ថ្នាក់រៀន​នៅ​កម្ពុជា​។ ដោយសារ​តែ​សាលា​មាន​កុំព្យូទ័រ​តិចតួច មិន​មាន​ម៉ាស៊ីន​ហ្វូតូកូពី គ្រប់​សកម្មភាព​ទាំងអស់​គឺ​ត្រូវ​ធ្វើ​ដោយ​ដៃ បញ្ចុះបញ្ចូល និង​ផ្តល់​ឱកាស​ដល់​កុមារ នានា ឲ្យ​ចូលរួម​ប្រកប​ដោយ​អត្ថប្រយោជន៍​ជា​ចម្បង​។

លោកស្រី មេហ្គាន រ៉ូស គ្រូបង្រៀន​ភាសា​អង់គ្លេស​នៅ​សាលាបឋមសិក្សា ហាយហ្គេត បាន​ចំណាយ​ពេលវេលា​របស់ លោកស្រី​កាលពី​សប្តាហ៍​មុន​នេះ ទៅ​ទស្សនកិច្ច​មួយ​សប្តាហ៍​នៅ​សាលា​អំពែ​ភ្នំ ។ គាត់​ក៏​បាន​ចូលរួម​ចែក​រំលែក​អំពី​ការ​លេង​កីឡា គ្រីឃិត និង​ការ​ធ្វើ​លំហាត់ គណិតវិទ្យា​ដោយ​ប្រើ​គ្រាប់​ឡុកឡាក់។ លោកស្រី​ក៏​បាន​ផ្តល់​នូវ​សម្ភារ និង​ធនធាន​មួយ​ចំនួន​ទៅ​សាស្ត្រាចារ្យ​នៅ​សាលា​នោះ​តាមរយៈ​មូលនិធិ​ដែល​បាន​មកពី​ការ​លក់​ឡាយឡុង​របស់របរ​ចាស់ៗ ។

នៅក្នុង​ឆ្នាំ​នេះ​សាលា​មកពី ភាគ​ខាង​លិច​នៃ​ប្រទេស​អូស្ត្រាលី​នឹង​បន្ត​យក​ចិត្ត​ទុកដាក់​ស្វែងរក​មូលនិធិ​ផ្សេងៗ​ទៀត នៅក្នុង​គោលបំណង​កែលម្អ​ការ​អប់រំ និង​ជីវិត​កុមារ​នៅ​តាម​សាលា​កម្ពុជា​។

ព័ត៌មាន​បន្ថែម​អំពី​គម្រោង​អង្គរ​នេះ​អាច​ចូល​អាន​នៅ​គេហទំព័រ​របស់​នាយកដ្ឋាន​អប់រំ​តំបន់​ភាគ​ខាង​លិច​អូស្ត្រាលី ឬ​តាមរយៈ​ព្រឹត្តិបត្រ ប្រចាំ​ឆ្នាំ​២០១៣ ដែល​អាច​រក​បាន​តាម​អាសយដ្ឋាន natperth.blogspot.com​៕ MN

ព័ត៌មានថ្មីៗ